في البدايـة أحب أهنيكم بهالشهر الفضيل وتقبل الله منا ومنكم صيامنا وقيامنا وجعلنا واياكم فيه من العتقاء من النار رمضان شهر الخيرات وشهر الفضائل شهر جهاد النفس وترويضها شهر تهجر فيه المعاصي ويقبل فيه على الطاعات على عشان كذا نلاحظ فرحة من نوع خاص عند دخول هالشهر وهذا يهني هذا والاطفال والكبار يباركون لبعض حتى التوبيكات بالماسنجر كلها تهني وتبارك خخخخخ واحتفاليه انا اشوف انها محموده ولكن أن تصل لمرحلة يوصلك 48 مسج بجوالك كلها تهنيك برمضان خلال يوم ونص من ناس يمكن بعضهم ماكلمك من شهور .. ويهنئنونك بمجرد رسالة نصية محشوة بكلام جامد خالي من المشاعر لا والأدهى يمكن هالرساله تكون مكرره عندك من كذا شخص !!!! ناس فعلا تكون فاقدهم ناس بينك وبينهم مسافات وأميال تتمنى الفرصة عشان تتواصل وياهم ولكن تتفاجأ برسالة نصية اختصرت الطريق وكأنها تقول لا تعب نفسك وتدق !!!! أتوقع شركات الأتصالات يوم اطلقوا خدمة SMS كان هدفهم مختلف كليا وهو ان ان تتواصل مع الشخص اللي تبيه وبشكل فوري في حالة فيه شي يمنعك من الاتصال فيه <-- اخلص ولكن للأسف ...... تعودنا ما نأخذ من التكنولوجيا الا سلبياتها ونتعمد نستخدمها كثير من الاحيان خطأ والا وش يمنع مايكون هالشهر فرصة كبيرة للتواصل وصلة الرحم والزيارات مو شهر الفضائل رمضان ؟؟ وبالمناسبة عندي لكم سالفة حدثت لي شخصيا : في مرة من المرات وقبل فتره قريبة كنت في مراجعة لدائرة حكومية ويوم دخلت المكتب حق الموظف وسألت عنه قالوا بإجازة طيب والاوراق هذي عند مين !!! قالوا شف المكتب اللي جنبنا ورحت لهذاك المكتب وبعد السلام الا هذا الشاب وجهه جديد ماتعودت أشوفه بهالدائرة من قبل ولكن وجهه مألوف بالنسبة لي .... أخذ الأوراق مني وهو يشيك عليهم رفع راسه وقال لي انت فلان الفلاني ؟ قلت له : ايه !!!! قال تذكر ثالث / 2 ؟؟؟ تذكر المصري أحمد حق الرياضيات ؟؟ تذكر وتذكر ............ الخ لحظة لحظة أنت فلان !!! قال لي ايه انا ....... ياسبحان الله كم صار لنا متخرجين وين ارضك وين سماك انت ؟ ودخلنا بدوامه من العتب والترحيب بنفس الوقت لزم الرجال الا يعزمني على العشاء وفعلا رحت ما اطول عليكم ولكن كل ماكنت أسأله اخبار فلان واخبار علان يقول لي والله مادري !!! كيف طيب وانت اللي كنت تجمعنا من قبل وكل شي لازم يمر من عندك ... قال لي بكل بساطه كلن راح بديره وكان بينا رسايل من اول والحين مدري عنهم اغلبهم غيروا ارقامهم ......... انا ضاق صدري لان كنت متوقع بسأله بيقول لي اصبر هذاهم جايين بالطريق !!! والا خذ ارقامهم والا على الاقل ابشرك كلهم بخير !!! الشاهد من القصة ....... كيف وصلة الفرقة بين رفاق العمر وكيف وصلوا لمرحلة من الشتات وانا بنظري السبب مسج !!! <--- لحد يطلع لي يقول وشلون يعني مانرسل لأحد متفرقات رمضانيه - الى متى وحنا مايحلى لنا نجهز لرمضان الا بليلته او اول يوم فيه !!! - من المضحك المبكي تلقى عنده قائمه طويلة مليانه باوقات وقنوات المسلسلات اللي بيشوفها بالمقابل جدول التلاوة والختمه فاضي !!! - استغرب بصراحة من حال بعض الناس بالمغرب تلقى المسجد مليان يمكن حتى تصلى برى والكل يسبح ويهلل وبالعصر اذا كملوا صف واحد شي جميل ... عجبي ! - حالة هيجان فظيعه وسرعة وقطع اشارات قبل أذان المغرب بخمس دقايق ..يا أخي اللي صبرك اليوم كله مو قادر تصبر 5 دقايق وتفك خلق الله من شرك !!! نرجع ونقول رمضان شهر الفضائل والمكارم لكن ما حولك أحد - بعض الحريم تتوقع انها رايحه منتزه اذا راحت تصلى التراويح تضف بزارينها وتأخذهم معها .... خيتو تراك رايحة لمسجد لاتأذين خلق الله بصياح بزارينك حطيهم في بيتك - بالعشر الآواخر الزحمة بالأسواق والمجمعات أكثر منها من الزحمة بالمساجد في صلاة التهجد والتراويح !! - بعض الناس يجاهر بالمعصية عيني عينك .... احلف لكم انى شفته بيد زقاره وبيد بايسن في صباح رمضان هل معقوله هذا متربي هنا معنا ؟؟؟؟ - الى متى وحنا نشرب فيمتو بكل رمضان ونأكل سمبوسه المهم ماحب اطول عليكم انا موقف وتعرضت له وحبيت اناقشه وياكم من خلال كذا محور CC 1/ هل أنت مع الإكتفاء بالمعايدة أو التهنئة برساله نصية قصيرة ؟ وليش ! 2/ هل ترى أنت كشخص مستقبل أنها كافية وتغنيك عن مكالمه شخص ما تواصلت معه من زمان ؟ 3/ هل تتفق معي بان التكنولوجيا الحديثة قتلت التواصل الإجتماعي ؟