من الحين تبي تقرأ سالفتي حياك ماتبي الباب يفوت جملp21 <<قوية بس ماعليش اهم شي تكون فاضي ماوراك لا شغل ولا مشغلة.. وان كنت مشغول اطلع وارجع لافضيت مو اذا ماعجبتك سالفتي جلست تحلطم تقول اشغلتنا واخرتنا ايه اللي اوله شرط اخره نور.p10 سالفتي الله يسلمك تقول: انه اخيرا جت لجدتي شغالة بعد مناوشات وعقد العديد من المؤتمرات و اصوات الاحتجاج التي حدثت في غرفتها وعبر اسلاك الهاتف ( اللي اشوي و تعطينا الاتصالات وسام اكثر المتصلين في اليوم مية مرة).. ــ والله ماتدخل عليp10 ــ حلفت انها ماتعتب عتبة بابي ــ ياانا ياهي ــ اقول (تلايط) وانثبر << موجهه الى خالي اللي جلست القط انا وياه وجهه وجلست ربع ساعة ادور خشمه وابشركم لقيته مع اخوي يلعب فيه ــ اخسي واقطعي << وهذي موجهه لأمي اللي ادبجت اختي من الفشيلة لدرجة اطلعت عيونها مع باب الغرفة (اكسرت خاطري المسكينة) كل هذا نماذج مقتطفة من اقوال الرفض من جدتي أما عيالها اللي هم خوالي اللي هم اخوان وخوات أمي<< اخلصي فكانت نتائج اقناعها بائت بالفشل الذريع. حتى طلعت برأسي علامة ( ! ) وجتني فكرة ان نرسل برقية لكوفي أنان ليتدخل لحل هذه الاوضاع المزرية << اخس كوفي أنان مرة وحدة <<لاتشرهون عليها بلاها ان التفتت يمين طلعت لها اخبار وان راحت يسار طلعت لها برضو اخبار عادي لو شفتوني نايمة وابربر قائلتنp10 (( اطلق الجيش الاسرائيلي قذائف صاروخية على منطقة صور مخلفتن قتلاء وجرحى من عدة عائلات لبنانية وقد ندد الملوك العرب بهذا مهددين ان ماوقفت اسرائيل الذبح والذبيح ان تجمع العالم كلهم وتروح لريسهم واذا فتح الباب عليهم قالوا: شفت ذولا اللي ورانا ؟ كلهم اصدقانا ويقولون مانحبكم)) وبعد ان اعلمتهم بفكرتي التفت علي خالي وقال ـوش قلتي؟ قلت والكشرة من باب الرجال الشرقي الى باب الحريم الغربي : اللي سمعت طال عمرك! وش رايك ؟ ماهيب فكرة صاحية؟ وجاوبني بصكة النعلة (الجزمة) على جبهتي لتخرخر الدماء وتختلط بدموعي المالحة وكل هذا يصير وامي جالسة ماقالت شي ولا سمت علي ولا جابت فوكس وملح تدهن جبهتي ماغير اناشق وعيوني تتوسل الى عطفها وحنانها ولكن لاحياة لمن تنادي.. ومرت الساعات وجبهتي كل مالها تنبت صعرير بألوان القزح قزح. وتدخلت أمي والدموع على عينيها كوابل من السيل و صرخت صرخة القهر والاستبداد : ـ لااااااااااااااااااا يايمه ياحبيتي<< حسبتها بتهاوش خالي عشاني.. انبسطت ( الظاهر بشكي اهلي عند منظمة حقوق الانسان) ـ ياحياتي انا مابقى على روحتي لديرتنا شي<< اخس لو إنا بالصمان عاد كلها حذفة عصا " مشوار 500 كلم بس " ـ مابي اروح وقلبي ناغصني عليتس مابي اروح وبالي عليتس مشغول مابي اقوم بنص الليل و مدري عن حالتس << علقت امي على مابي مابي بتنافس حليمة ابي امي ابي ابوي ابي زوجي وبدأ قلب جدتي يلين مع دموع التماسيح ووافقت على مضض وعلى شروطها الخاصة<<طرار ويتشرط << احس هالمثل داخل غلط وراح خالي وقدم على شغالة وبدأ اللهث والمراكض ورا سراب قدومها وقالوا: ـ ابشروا شهر وهي عندكم p3 "نحن في خدمة الشعب<<والله مافيه فرق بينكم وبين غيركم (وعود) على الطل ( واللبيب بالأشارة يفهمُ ) ! ومرت الساعات وتلتها الايام وتبعتها الشهور وشوي تلحقها السنين وجت الشغالة اول ماسمعت الخبر قلت: ـ حجزتها << تحسبها يد بلايستشن وبدأت صيحات الفرح تدب في بيتنا حتى سمعنا "رن رنات" الجرس و "طرقات" على بابنا لنفتحه ونلقى ولد جيران النشبة <<خرب علينا فرحتنا يقول: وش فيكم؟ من اعرس منكم؟ جاكم ولد؟ <<الله لايلومه مابقى الا نسوي اعلان بالجريدة بجيتها. وجا الليل والمسكينة مقضبينها من اول ماجت الحمام تتروش يخافون جايبة لهم فيروس انفلونزا الطيور.. (تعرفون هالايام الواحد لازم يخاف على نفسه وعلى عياله) وتطلع بعد ساعة تلق لق تقولون الماسة سوداء << تعرفون هذه من شروط الوالدة تخاف على عيالها لا تفتنهم .. والله اللي يشوفها ان يصوم سنتين ورا بعض ويمكن يحرم يدخل بيتنا p3 ( استغفر الله بس) وجا وقت النوم وبدأ اخوي الصغير اسئلته البريئة ـ ماما وين تنام فيه؟ ـ ماما كم تجلس عندنا؟ ـ ماما خليها تنام عندي! ـ ماما ش قلتي اسمها؟ ـ اليسا؟ زي اللي بالتلفزيون اللي تغني اجمل احساس؟ <<وين يااخ لهالدرجة شوفك شجر وش جاب لجاب وما سكت الا بخبطة من كف امي الناعم. <<الله لايلومها حتى انا ازعجني بأسئلته اللي ماتخلص وهجد البيت من الازعاج في حلول الساعة 3 فجرا<<قالهم نايمين بدري واقوم الساعة اربع وشوي بصلي والقى الاخوة الصغار مو بفرشهم وانزعج وينتابني الخوف الفظيع اخوتي ليسوا بغرفتهم؟! وما جا على بالي الا انهم اختطفوا <<متأثرة بالأفلام ـ الا اخواني اختطفوا<<عاد بذمتك وش فيهم من ملح يخطفون واركض لغرفة أمي : ـ يمه يمه لحقي لحقي.. يؤ وين امي لاااا اخطفوا بعد امي! واجلس اصيح واتشره على الخاطفين ليه خلوني؟ ليه ما اخذوني معهم؟ واتذكر الشغالة قلت لايكون بعد اختطفوها<<كلن على همه سرا وانا على همي سريت وافتح غرفتها لأتفاجأ بعائلتي متفرشين غرفتها نايمين << فشلونا الحين وش بتقول لأهلها عنا؟ إنـا مشافيح !! يافضيحتنا عند العربان. المهم ويجي العصر (صباحنا اللي قلًب من اول العطلة) ونروح لجدتي وندخل عليها وقلنا لها جبنا لك هديةCC ونسحبها للمطبخ ونفتح الانوار وبصوت واحد ـ (سبراااااااااايز) ـ ( هبي برث دي تو يو) و قدمنا الكيكة وعليها شموع ـ قلنا هذي الشغالة وجت يا جدتي الحنونة يالله ورينا شطارتس!! و مسكتها امي البيت و بدأت تفرجها: هذا همام فيه مألوم انتا؟ وهي ماغير ادربي الدميجة وتقول: كويس كويس ـ و هذا غرفة ماما كبير! ـ وهذا صالة وبدت التوجيهات << وصفقوني ان كان فهمت ـ مافيه يطلع برا ـ مافيه يرد على تلفون ـ انتبه لماما كبير لازم يأدي دوا م**وط ـ انا بيسافر بكرا مايبقى يسوي قلق<<ابوك يالتوجيهات وجا الغد المرتقب للعودة الى بيتنا "الصدقي" وقلب امي مرتاح هادئ البال وشدينا الرحال ومسكنا الطريق وبعد 4ساعات وشوي وصلنا بالسلامة<<الناس لوصلوا لديرتهم وش يقولون لهم؟ ( افهموها عاد) ومع ذلك لم تهدأ الاتصالات بين امي وجدتي امي رجعت لانشغال البال وجدتي بين ولولة<<مدري شلون جت هذي و صهيل<<وذي ش جابها بعد مالذي حدث؟ هذا ما سنعرفه بعد الفاصل<< كف اخلصي علينا بس اللي صاير ياجماعة الخير ان جدتي صارت هي اللي تقوم الصبح وتسوي للشغالة فطور و اذا جا الظهر قامت تصلح لها غداء ولا جا الليل شوي وتهدها وتغطيها وتقص لها قصة << والله قهر ياخسارة فرحتنا فهالشغالة ـ انا قايلتن لكم مابيها مابيها مير انتم ماتسمعون ـ جبتوها و نشبتوها بحلقي ـ الله لايبارك بكم ويقطعني يوم اسمع لهرجكم <<قوية ياجدتي ذي ـ خلصت علي الصابون والماء <<الله لايلومك ياجدتي صدق ماذبحونا هالشغالات الا بهالمياهه (هذي ايضا نبذة مقتطفة من صيحات الاحتاج من جدتي) ومع هذه الاحداث الجديدة الحاصلة في بيتنا الأوسط<<على وزن الشرق الأوسط اجتمعت بخواتي واخواني واتفقنا اننا مانجلس حول لأمي خوفن من احتمال دبجات على الظهر او تنفيس الازعاج البادي على محياها على ابنائها الرقيقين البرئين <<كثري منها الرقة والبرائة يمين وانتم يسار. ( اذكر موقف لأحد اصغر اخوتي جاااااي ودخل البيت والشرر يتطاير من عينيه وبيده بلكة مدري كيف شالها يصارخ ـ وينه وينه ؟؟ اقولكم وينه؟ طلعوه!! ـ طيب يالحبيب وش فيك؟ وش صاير؟ قال: ـ ولدتس هذا الزلابة عكرفلي بالشارع ومسح خشتي ع الرصيف. ـ طيب وش مسويله؟ مايجيك ببلاش!! ـ ماسويت فيه شي والله العظيم بس قلتله رح نظف خشمك وامسح سعابيلك(قدام عيال الجيران!!) انا قلت شي غلط؟ ـ وتحلف بعد !! لا ياحبيبي ماقلت شي غلط عداك العيب بعد المفروض مسكته وصفقته وصفقته لين يقول امي ماجابتني. شفتو عاد هذي بعض من برائة صغارنا وياماكثرها "لاتعد ولاتحصى")CC ويمر الاسبوع على هذه الاحداث والامور لا تبشر بخير من طرف جدتي وانا بفراشي واتقلب يمنة ويسرة خطرت ببالي فكرة <<ماتتوب تبي لها نعلة على خشتها هالمرة الا وهي اكلم جدتي واوضح لها ان هالشغالة انسانه من لحم ودم وان الانسان ماولد متعلم اصبري عليها شوي وحدث مافكرت به لتقول لي جدتي الحنوونه: ـ وانتي وش عليتس؟ الخلا( هذي مفردة تحتاج الى صفحة كاملة لتفسيرها)!! انا اكًبر واعلم وتعبي يروح لغيري <<طلع شغل الحموات اربي واكبر وتجي حرمة غيري وتاخذه. انا الحين بمسكها الباب للمطار. ـ لا ياجدتي اوعى اوعى تزعلp9 <<اخس يانجوى وعطتني من الحامي صاع وجمعت وجهي و شلت معي فشيلتي وجرجرت وراي هزيمتي النكراء.. لأعلن للعالم اجمع ان هناك حرب عالمية (باردة) ستحصل كل هذا بسبب (شغالة) وياقلب لاتحزن..p9 الملخص من الموضوع: 1- اللي يبي او ناوي يجيب شغالة لازم يقدم قبل يفكر ، حتى اذا فكر وقرر يلقى الشغالة عند بابه. 2- لا جبتها اصبر عليها فهمها حبة حبة طول بالك عليها 3- والمهم انتبه تجيب لجدتك مثل جدتي شغالة وبعدها ينطبق عليك المثل القائل طبخن طبختيه يالرفلاء إكليه <<شكلي بتصفق من جهة اهلي 4- لاادخل نفسك في امور اكبر منك ولاتلعب مع الكبار (يعني لاتكلموا الكبار الصغار ينطمون) ترا ماتضمن (النعال)على جبهتك..يكفي ماحصلي (خذ من اخيك عبرة) وايضا كما قال ابو نورة ( مصائب قوم عند قوم فوائد) . 5- القصة اللي قريتها اضيفت لها قليل من البهارات (المسيلمية البريئة) لتعطي تشويق واكشن. ورجاء لحد يتهمني ويفتري علي "ويقول كذابة" رجاءا.. مااسمحلكمp10 . 6-اذا ماعجبتك سالفتي لو سمحت لا تقعد ترد تقول بايخة سخيفة ترا محد حلف عليك تقراها واعتقد نبهت عليك في بداية قصتي. 7- انا تعبت من الصبح وانا اصفصف بهالسالفةوالون لذلك اسمحولي بروح انام ومابي اجي والقى الزيارات اكثر من الردود ياخي عبرونا عبروا مواهبي المبدعة ترا من ابداعاتي قصة نافست فيها نجيب محفوظ ـ الله يرحمنا برحمته ـ وبغيت اخذ عنه جائزة نوبل بس قلت يابنت خليه ياخذها مسكين انتي العمر توه قدامك مزدهر 8- يالله سلام ونشوفكم في ابداعات قادمة