يسعد مساكم \صباحكم بكل خير ..
اول شي يالله انك تحييني بهالمنتدى السنع ..
ماكنت ناوية تكون القصة اول مشاركاتي .. بس نظراً للمطالبه الجماهيرية 
نزلنا عند رغبتهم ..
وقررنا اننا نمحط بها فيذا .. ننتظر تعليقاتكم ..
---------------------------------------------------------------
في ليلة من هذه الليالي الباردة والجو العليل >> بدينا بالكذب من اوله .. 
أتى ابي مسرعاً : يا عيالي .. تجمعوا بسرعه .. فقد حان وقت السفر ..
تناقز دحيّم وسعيدان وانا من فوق الدرجاان .. نعم نعم ياوالدي .. جيناك ملبّين الندا << عندها وطنية .. 
ومن ثمّ قعدنا حلقة على بساط من حرير .. وفي رواية ريش نعام ..
وفي رواية قعدنا وخلاص .. لو انه على حصير .. 
بعد ذلك .. أتت القهوة مهرولة >> متأثرة بمذيع الإخبارية اللي يقول : هاهي سيارة الاسعاف تهرول ..
ههههههههههههههه مسيكين مرتبك ويبي يرزّ عمره .. بس سيارة تهرول قوية .. كنّها قهوتنا اللي تهرول قادمه .. 
قام سعيدان يريد أن يصب القهوة .. وصبّها وشربناها ,, >> لازم تفصيل ممل ,, 
قال والدي : تعرفون يا حلالي إنه قد جاء وقت السفر .. والسفر مهم وبه 7 فوائد ..
ومن وسائل السفر السيارة والطيارة والجمل .. والجمل حيوان بري يعيش في الصحراء >> مصالة ,,
وانا قررت .. انا ابو دحيّم والاقر على الله .. إننا نسافر لندن ..
سعيدان: لندن اللي جنبنا ..
الوالد : لا فوقنا وانا ابوك .. بنرقى لها بسلّم .. والله انك فهيم من يوم يومك 
دحيم : لندن اللي عندهم أفلام ؟؟
الوالد : عيب عليك .. بنروح لها للسياحة .. إلا وين الافلام ذي ؟؟
المهم .. قررت العائلة مثل ماتشرفت انهم يسافرون لندن ..
طبعا كان يوم عيد عندي .. اهلي مايسافرون بالعادة وان اجتهدوا رحنا للشرقية ..
لأن اهلي وجيههم مهيب وجيه سفرة .. لازم اذا نووا عــ السفرة >> مأخوذة من النية ..
لازم يصير شي .. يعني .. يطيح احد .. يدخل احد المستشفى ,, ينسرق بيتنا ..
إلخ .. عاد لندن مرة وحدة اكيد المرة ذي بيصير بالدولة انقلاب ..
الموووووهم .. لندن كانت حلم حياتي لذا كان من الطبيعي >> متعوب عليها .. كان من الطبيعي انه يغمى علي ويسعفوني يوم دريت اننا بنروح ..
بلاكم ماتدرون وش في لندن ؟؟؟ فيها كل علمٍ غانم ..
بس الله يبارك بذا السهيمات >> اسهم صغيرة تتناقز في كذا شركة .. الله يبارك فيهن اللي
بتخلينا نروح لــ لندن ..
طبعا الوالد متحمس اكثر .. ومجهزٍ كل شي .. والجوازات والدنيا ,,
يوم السفر ..
أنا: ياسعيدااااااااااااااااان .. شرّابي الأحمر من قال لك تاخذه يامال الوجع ؟ ؟
دحيّم: سعيداااااااااان .. جزمتي الصفرا من قال لك تصرقها >> أكيد بيطقّمها مع شرابي ..
اخوي انيق ..
أمي :سعيدان من قال لك تاخذ شلحتي الزرقا >> بلا كذب ..
جمّعنا عفوشنا وكشخنا ولبسنا .. على سنقه عشرة ,,
حنا فينا حس أناقة مثل ماتلاحظون بأخوي سعيدان .. من يومه والبنات مغير كل مارحنا
مكان يحاشرونا .. يبون رقمه .. مزيون وانيق مشكلة ..
صار لا جينا نروح يلبس سروال سنة .. وفنيلة .. يعني يبي يبتعد عن الشهرة .. وملاحقة
الفتيات ..
جينا للمطار .. طبعا طول الطريق وحنا نتهاوش من بيركب عند الدريشة .. كعادة
اي عائلة سعودية ..
ركبنا الطيارة بسلام .. صرت انا اللي عند الدريشة وجنبي سعيدان .. وعند الباب >> متأثرة ..
قصدي عــ الطرف قعد دحيم ..
وفي الطريق لــ لندن تجاذبنا أطراف الحديث .. >> قلنا لكم موضوع متعوب عليه ..
أنا: وووووووه بس اخيرا بروح لندن ,, احس كنّي بحلم من أحلام اليقظة .. وووه بس اغدي اشوف توم كروز .. ولاّ جورج كلوني >> كشخة البنت ..
ولاّ سامي الجابر .. مرة وحدة ماعندها حل وسط ..
سامي اكيد بنلقاه ,, اكيد بيسافرون .. زوجته جايبة بنت ويبون يمشّونها
سعيدان: يقولون الافرنج كلهم زين وملح .. اذكر يوم رحنا باريس يوم رقمتني الفرنسية
فيريرا >> مشكلة لا صار الواحد يكذب ..
أنا : ولاّ اشوف كاكا .. ولاّ اشوف الملك عبدالله ,,
دحيم : بروح عندهم أترزّق الله ,,
أنا: ليه الاخ بيفتح بسطة خضار ؟
دحيم : لا والله .. بطلب لجوء سياسي .. >> اخواني من يوم ماطرت السفرة وهم
يقرون بهالكتب .. يبون ثقافة .. هذا اثر من اثار الكتب ..
بعد فترة .. جت المضيفه .. طبعا بما انها تحتسي عنقليزي مافيه امل احد يجاوبها ,,
انا القّط شي بسيط ..
المضيفه : do you need any thing sweety ?
سعيدان (فاقٍ خشته) : الله يسلمتس وحنا اسعد والله ..
أنا : يالخبل وش بلاك انت .. هي تقول عسى بس مرتاحين ,,
Yes yes go go >> عندي لغه ..
الزبدة ان الحرمة نشبت من عقب ماقلته لها .. مادريت اني قايلتن لها نبي شي ..
جا ابوي وصرف الموضوع .. وحصل كل واحد منا على شربة ما ,,
وبعد الملل والانتظار والنوم والكلام في احداث المجتمع المهمة مثل :
دحيم : السعدي .. تهقى عليان نلقاه هناك ؟؟
سعيدان : لا والله عليان مصّيف في جنيف هالسنة .. اعنبو عليان وش يجيبه
يا الله على هالكم قرش يجيبهن من بسطته .. هالزود بعد بيروح لندن
دحيم : لا يعني يمكن انه ماخذٍ سلفه >> مهوب سهل اخوي ..
ولاّ مقدمٍ معروض ..
سعيدان : تهقى ؟؟ .. لا هو مايعرف لندن .. مثلنا يعني مغير يسمع بها ..
بس حنا سمعنا ورحنا .. هو توّه سمع بس مابعد راح ..
وصلنا بعد وقت طويل وشوق لملاقاة الحبايب >> كلام قصص ..
وصلنا لمطار هيثرو .. هبرو على قولة دحيم >> الثقافة والاطلاع الواسع مشكلة ..
اول ماداست اقدامنا إلى داخل الموقع >> اقتحام ..
ضاع السعدي .. الوسيم صاحب الجاذبية .. اكيد خطفته وحدة من هالشقر .. >> لا يا
توووووووووم ..
ونروح نبلّغ الدوريات >> مااقدر اطلع من نطاق ديرتي ,,
واجهنا مشكلة يوم قالوا لنا وش اسمه ,,
سووووآيدان .. ساآآدان >> هنووود .. آخر شي الساآدي ,,>> السعدي
بعد تقريباً ثلاث ساعات ونيّف ,, لقينا سعيدان ..
قاعدن يكاسر حقين بضايع المطار >> حبيب ابو الشباب ..
شدّه ابوي من قفاه وجرّه >> مظهر حضاري .. 
وقال له : ياحبيبي >> لا تكذبين ,. لا عاد تروح عنا نحتاجك >> أمووووت يالحنان .. 
رحنا مع بعض كأسرة متكاتفه >> من الخوف .. للفندق .. المشكلة عمرنا ماسافرنا
ويوم سافرنا وبدت الدهرة إلى كل شي فخم .. يازين الطفرة ..
اول مادخلنا .. كلنا عيوننا فوق >> فيه قُبّة ملونة ..
أمي : يازين بيتهم زيناه .. ازين من بيت ام مساعد هاللي بازّتن به ..
انا : يمه شوفي حريم ورجال مع بعض .. واخزياه 
دحيّم : سعيدان شف عندهم بركة >> نافورة .. خلنا نروح نسبح ..
ومير ينطّ اخونا في الله دحيم بوسط البركة المزعومة .. والناس يقومون يناظرون ..
وش بلاه ذا الاهبل .. لا بعد سابح بملابسه .. ماوده يفتن احد .. 
بعد ماراح كل واحد لغرفته .. كشخت وتعدلت .. طبعا انا بحكم اني بنوتة فيني ذوق ..
ترى أهم شي الأخلاق .>>وش تبين ..
جايبتن معي استشوار امعط هالشوشة .. لايشوفني توم كروز بشوشتي ثمّن يهوّن عني >> عندها أمل ..
امي تقول : انتبهي بس لا يشمّون ريحة شلوطة >> حشى جلد غنم ..
شلوطة : رائحة تصدر عندما يوضع راس الخروف على النار .. >> يمديكم
وطلعت قلت لدادي >> لزوم الهاي كلاس .. قلت لدادي بروح بشرب كوفي ..
واركب الاصنصير وانا مدري وينّي بروح له .. ابي كوفي بس مدري وينه فيه ..
والقى ارقاااااااام كثير وحروف مدري وشّي .. اذكر ابلا عهود كانت تعطينا شي زي كذا ..
بس الحين وش تضغطين يا جيفنشيّة وش تضغطين ؟؟ ..
حقرة بقرة قلّي عمي عد العشرة ..
ضغطت رقم ونزل بي الاصنصير .. يوم فتح الباب ولاّ اشوفلك ذيك الشوفه ..
يرقصون الناس .. مدّهرين .. قلت وناسة محد عزمنا .. اغديه هاللي تقول عنه نهلة بنت ابو نهلة
راعية الفشخرة ذيك .. خلني لا جيت اعلمها اني رقصت .. بروح اشوف
ولاّ مير ادخل والجو ظلام .. ووووه ياربي تسترنا دنيا وآخرة ..
اثر نهلة صايعة وانا مدري .. ياربي لا تخسف الارض علينا ...
اثرني داخلتن ديسكو انا ووجهي .. لا مبيّنه من اولها ..
وارجع لذاك الصندوق الالكتروني >> اصنصير .. واضغط رقم مدري وين بيوديني ..
اخاف بس لا يوديني لديسكو ثاني بعد .. لا اشوى واشوف لي وجيه عادية ..
اثرني نزلت تحت .. رحت قعدت عــ الكراسي وقدامي ورقة فيها اشياء واجد ...
الوكاد انها برابيس بس مدري وشّي .. حاولت اترجم ماطلع لي شي .. >>خانني التعبير
ويجيني واحد لابس كرفته .. يا الله اكيد انه مثل ذيك المضيفة ... بينشب يعني ..
ياربي وش اسوي ؟؟ بسكت مانب قايلتن ولا كلمة ..
Hey madmosail .. what do you want to drink or eat ?
ياوجه الله .. هذا جملته اطول من هذيك .. اكيد انه يقول شي واجد ..
No no .. go go >> مازال الاصرار على هاتين الكلمتين مستمراً ..
يوم جا شوي ويجي قبالي واحد .. وووووه بس لبناني ..
مبيّن من قذلته .. ويبتسم عاد انا قلت والله لروح اسلم .. يمكن انه يعرفني ولاّ شي .,
اجي قلت : مرحبا >> تعرف السنع
قال هو :يا أهلين وسهلين انسة ...شو هالجمال يخزي العيييين..
انا تعالوا دوروني .. تقصدني انا ؟؟؟
هو: اكيد آنسة ولك فيه حدا اجمل من هيك..
انا: الله مير يسلمك والله انت احلى يابعدي>>>> ضاعت علومها....
هو: ممكن تشرفيني وتشربي معي فنجان قهوة او اللي بدك ياه..
وووووووووه فنجال قهوة ..؟ اشرب بريتز أنا .. >> بريق ..
ومير اقعد واحط رجل على رجل ,, ونقعد نسولف ..
المزيون : دخلك من وين انتي جاييّ ؟؟
أنا : جايّة من الاصنصير ..
ويقعد يضحك .. قلت هلا والله ..
هو : يا الله شو دمك خفيف .. انا عم بقصد انتي من أيّ بلد ؟؟
أنا : انا من السعودية >> أحلى ..
هو : ايه من شان هيك انا عمّ اؤول اكيد هالجمال سعودية >> حتى هو يعرف ينصب
أنا : ماتعرّفنا ..
هو : معك طوني >> وووه اسمه طوني .. شو اسمك ؟؟
أنا : >> يا والله الورطة الحبن اقول لك اسمي .. بخربط .. اممم .. أنا ساندرا
هو : مو معؤوول شو اسمك حلو .. دخيله انا
شوي ولاّ هالصفقة على قفاي ,, آآآه ..
حصيصة وينتس فيه ادورتس .. امي تقول خلها تجي تكلم جدتي مزنة ..
أبووووووووك يا ساندرا .. والله ضاعت العلوم ..
قمت بكرامتي قبل هاللبناني لا يقول شي .. قلت ماصدقنا لقينا احد نبي بسولف
واثر الدعوى خاربة من بدايتها .. ايه قرادة مالي حظ ..
وحلفت ماعاد انزل اللوبي لحالي .. اخاف القى لي طوني ثاني بعد .. 
يوم جا الليل قال دادي >> مصرّة .. يالله ياعيالي سوف نأخذ جولة ع المدينة
هييييييييييييييييييييييييييه >> قراوى ..
ونلبس ونشكخ وننزل .. طبعا من يوم جينا وحنا مصدر انظار الناس ..
اكيد انها اناقتنا .. والله مشكلة .. يعني نلبس خلاقين ازين ؟؟!
المهم .. نجي وناخذ سيارة .. ونروح للهايد بارك >> سمعتهم يقولونها .. يعني مهوب خبرة ..
يوم نزلنا .. شافت امي الخضرة والدنيا .. قالت : قهر ليتني جايبتن معي ترامس القهوة
والشاهي .. >> تحسبها منتزه سلام ..
وحنا يالثلاث (سعيدان ودحيم وانا ) فاقّين هالخشش بخلق الله ..
سعيدان : دحيم شف هذي لابسة قصير .. شف ركبهن .. مهيب سود >> متأثر
دحيم : سعيدان .. شف هالرجّال معه حرمه .. خلنا نروح ناخذ لنا حريم >> حراج .. 
أنا : قوموا خلنا نمشي .. ناخذ جولة ..
رحنا نمشي يقال لنا فاهمين .. جا سعيدان شاف له وحدة وجهها فلقة قمر ..
قال : برقّمها >> يحسبنا بالسعودية ..
ويجي يتميلح .. hello
هلا يا بعد تسبدي .. ويانجوى فؤادي ..
What do you want ?
لا.. ماعندي بيجر .. الحين الناس جوالات يابعدي انتي ..
البنت مبققة عيونها .. كنّها ودها تقول وش يهذر ذا ؟؟
واجي اسحبه .. اعنبو انت بتفشّلنا بخلق الله ..
قال دقيقة يا حصيص .. تبيني البنت .. خلنا نضبط امورنا ..
أنا : حنا تونا باول يوم .. مبيّن هالسفرة بتصير قصص وحكايات ..
اقول امش يا قيس ..
رحنا وقعدنا قبل لا يصير بلاوي وكوارث ..
اثر ابو الشباب دحيم زرق من عندنا ولا ندري وين راح .. عاد ذاك عليمي بقوووووووة ..
ياربي .. بالمطار سعيدان والحين دحيم ..
متى يجي دوري عاااد ؟؟
وندور ندور .. مالقيناه
يعني شلووون ؟؟ .. نبلغ الدوريات يعني ؟؟
اخاف يمسكونه ويحطونه ضمن قائمة الارهابيين .. عاد هو وجهه يساعد ..
فهو الطفل ذو العينين العسليتين التي تحمل من العجاج الكثير ..
ذو الشعر المنسدل على كتفيه بغزارة >> أموت انا عــ الجمال الأوروبي ..
والأناقة التي تطيّح بنات حارتنا >> أهم شي الاناقة .. لها دخل بكل شي 
يا الله .. يعني مكتوب علينا الشقى .. عز الله لو قاعدين بديرتنا ابرك ..
وانا قاعدة بحزن انتظر ع الكراسي .. إلا ذاك الواحد اللي اقبل علي ..
مسيكين حالته رثة .. اثره يشحذ ,, حتى هنا فيه ,.
واطالع ياربي هالبوهة مهيب غريبتن علي ..
وين شفتك قبل ؟!
يووه .. انت نواف ولد اخو حق الرياضة .. اقول فارق يالله ..
ياحرام عمك حدّك ع الشقا ولهف الخمس واربعين كلهن ..
الله عاد محتاج 45 حقّة عمك ؟؟ ههههههههههههههههههه عز الله تحتاجينها انتي ..
بس عاد وشو له الشحذة ؟؟
نواف : انا مسروقٍ جوازي ..
ياحرام .. تبي جواز ؟؟
7
7
7
ماسبق من حديث قيل افتراءاً على لسان الكاتبة .. مالنا علاقة حنا ...
المهم .. بعد جهد جهيد وجدنا المفقود .. قاعدن يترزق الله على قولته ,,
فاكّ القبعه حقته >> كشخة .. وقاعد يغني .. والحمدلله ماحصّلنا بقبعته غير قرش ..
اكيد ما حطّه راعيه إلا لأنه راحمه ..
لا بعد ابو الشباب يغني : سليّم سليّم ويش اسوي بــ محبوبي .. >> معذّبه الحب ..
رحنا للفندق .. وقال ابوي لازم اتخذ قرار حازم لأنكم صراحة حالة مستعصية ..
مالكم داعي بين الاجانب >> انا قايلة ..
عشان كذا اليوم الثاني بودّيكم السوق .. بعدين نحجز ونرجع ..
والدميعات تنحدر عالوجنتين حزنا على فراق لندن .. تونا جايين يامال اللي مانب قايله .. 
اليوم الثاني .. نزلنا السوق بناءاً على كلام ابوي >> ماعاد فيه دادي ..
ونجي انا وامي ندخل محل .. ملابس
أنا : يا الله .. ماعندنا زي كذا .. نفس لبس نهلة ..
أمي : يا الله الجنة يابنيتي .. شوفي ذا كم سعره ,,
عاد انا ودي اصير كشخة امي تبي فزعتي ..
وانادي واحد ابي اسأله .. وإذا بي أجد نفسي اصطدم بجدار اللغة >> فصاحة .. 
قلت وشو يعني من صعبها كلها كم كلمة ..
أنا : يا ولد .. هزا سئر كم ؟؟ يرحم امك لا تفشلني عند امي ,,
ذس ذس ..
المهم انه طلع السعر تقريبا 390 ريال ..
أنا : يمه يقول حنا مسوين تخفيضات وبما إنكم وجيهٍ سمحة .. خذوها هدية
أمي : ووووه جعله يجزاك الجنة ياوليدي ..
ومير نطلع وحنا قاشّين اللبس معنا .. اما هديه ههههههههههههه لبس يسوى له 400 ريال
طااااااااااااااااااااااااااااااااااااااااااااااااا ااط >> صوت الجهاز .. لا تدققون عاد
ويقومون يتراكضون اهل المحل .. وياخذون الكيس وانا فاطسة ضحك ..
احسن كود يسجنوننا اهم شي نقعد بلندن ..
ويمسكون أميمتي .. وانا طبعا .. ويجيبون الشرطة ..
دحيّم : ههههههههههههههه السعدي تعال شوف هالشوفه .. امك واختك ماسكينهم الهيئة ..
يقولون لبس مهوب محتشم .. ليش بنتك لابسة زلاّطي ؟؟
سعيدان : اخس يايمه شرطة مرة وحدة .. والله منتي بسهلة ..
ويحققون معنا .. طبعا جابوا مترجم لأننا لا نفقه شيء باللغة .. انتم عاد عارفين مايحتاج اعيد ..
قال ابوي : اقول ضفوا قشّكم ,, الشره مهيب عليكم عاللي يجيبكم لمّ لندن ..
يوم جينا مطار هيثرو ,, ضاعت امي >> حلى ..
يوم جينا بنركب الطيارة واناظر ورى واقول لااااااااااااااااااااااااااااااااااااااااااااااااا اااا ..
ابي لندن .. >> مسلسل ..
ويمعطني ابوي مع شوشتي اللي ماشافها توم كروز .. يا سفابه الاستشوار .. 
والريحة اللي كتمت اهل الفندق ..
ونعود ادراجنا .. إلى عاصمة الضباب .. عاصمة العجّ والحر الشديد ..
الرياض .. اصلا مايليق لنا إلا الرياض ويا الله بعد ..
مايستفاد من هالخنبقة :
1_ فرض الله الحجاب على النساء المسلمات ..
2_ الاناقة جزء مهم في اثارة مشاكلنا .. والجمال بعد ..
3_ من ياخذ بهالقصة اقول له الحمدلله والشكر .. والله انك مخفة ..
مع خالص الود ..
اللي بــ يردّ رجاء لا يكتب مشكورة ويعطيك العافيه >> ماتقلّد أحد ..