بسم الله الرحمن الرحيم
بعد
خبر
وفاة
الملك فهد رحمه الله
وجدتني اتمتم بهذه الأبيات :
يا اللي ضحى الاثنين غادرت دنياك
وشربت كاسٍ كل حي ٍ يذوقه
ما ادري قبل ماتروح وش كانت مناك
وبعض المنى تجي المنايا وتعوقه
كم عشت بالدنيا وكم طاب ممشاك
والنفس ياما حصلت ما تتوقه
من طلعتك ياما غزى الشيب علباك
في بيت ملكٍ غايصاتٍ عروقه
تضحك لك الدنيا والايام تلقاك
تضحك لها حيث السعد قام سوقه
واليوم يامرحوم للناس ننعاك
ماينفع التصفيق شربت مروقه
كان القدر يا خادم البيت ناداك
فالغيم لابد الهوى مايسوقه
هذاك يوم لو تكلفت ماخطاك
طريق للمخلوق لازم طروقه
ياخادم البيتين ماكثر عطاياك
ركبت للمعروف خيلٍ سبوقه
خدمت بيت الله ووسعت الانساك
واعطيت ضيف الله كامل حقوقه
ومسجد رسول الله تولته يمناك
والعين به شافت فعول تروقه
واهتم فكرك بخدمة كتاب مولاك
وفي خدمته شيدت له مايلوقه
وثبتْ لكل العرب صحّتْ ارياك
كم قالةٍ خاطت يمينك فتوقه
اطلب عسى الفردوس يا شيخ ملفاك
واطلب عسى يجنبك نار حروقه
ويا قبر ابو فيصل عسى الغيم يغشاك
ويسقيك من مزن تلاعج بروقه
:::::::::::::::::
منقول من موقع محافظه رفحاء
www.rafha.com
::::::::::::::