# من الذاكره .. في مره أنا وصحباتي قررنا نقوم بعمل تطوعي ، و آخترنا فئة الأطفال ؛ وحبذا يكونوا أيتام جمعية "إنسان" بس للأسف كانت صعبه شوي علينا المهم ، إستبدلناهم بأطفال جمعيه خيريه "مارح أذكر آسمها ﻷسباب خاصة" طبعا كان الهدف منها رسم الإبتسامه على وجوه الأطفال وإدخال الفرح لقلوبهم ، بإختصار "نحن نشعر بكم وأنتم جزء منا" طبعا جهزنا الفقرات وخلينا الطابع الكوميدي يغلب عليها ﻷنو الهدف إسعادهم وجهزنا الهدايا كان يوم جمميل بمعنى الكلمه ، حصلي موقفين ما أنساهم طيلة حياتي .. الموقف الأول .. كنت واقفه على المسرح ومعاي المايك كانت فقرة ألعاب وأحكيلهم مين البطل اللي بطلع أول واحد ؟ كان في ولد يأشرلي من بعيد المهم نزلت ورحت له وقربت المايك من تمه قالي : أبله أبله قلت له إيش ياعيون الأبله ؟ قالي إشرايك أنا أطلع ؟ قلت له تعال إمشي والله ﻷشيلك أنا وأوديك للمسرح ! المعلمات المتواجدات ضحكن على ردة فعلي ( بصراحه حكي الولد خرفني تجنن كلمة أبله ) الموقف الثاني .. كانت الفقره محتواها (عيله وحده) يعني الطفل يطلب مني اللي يبغاه وأسويله ، يطلب مني كيك أي شي طبعا كان أولاد وبنات جتني بنت زعنونه ياروحي ما أجملها بسم الله عليها البنت حلوة قالت عادي تحطيلي مناكير قلت طبعا ياعممري عادي جلستها بحضني وصرت أحط لها مناكير وأسولف معاها قلت لها الله مين عملك الحنا هذي ؟ قالت أمي العوده سارة قلت حلوة تجنن عليك قالت أصلا أمي وأبوي يحبوني أنا أكثر من أختي لجين قلت أكيد ياعممري ﻷنك عسسل أصلا (أنا تخرفنت مع البنت) بالصدفه رفعت راسي لقيت نورة وسعاد يناظروني ويضحكن قلت نعم إيش فيه إنتي وياها ؟ قالوا هذي دانه اللي نعرفها ؟ أول مره نشوفك كذا يتريقن علي عشان أحكي مع البنت بصوت حنون أساسا الأطفال حلوين وحبيتهم وحبيت إقبالهم الشديد علي الله يسعدهم يارب بنهاية اليوم جتنا مديرة الجمعيه وشكرتنا على الزيارة والمبادرة الحلوة اللي سويناها طبعا إحنا كمان شكرناها وتعاونهم معانا وترحيبهم فينا قالت لي كنتي جداا رائعه على المسرح والأطفال حبوك كثير وتمنوا تبقي معاهم « حكيها خجلني ماعرفت أرد بعد إبتسامات الخجل رديت عليها أصلا أطفالكم يدخلوا القلب قديش كنت مبسوطه يومها إني قدرت أسعد إنسان وفرحته أنا من طبعي لما أمسك طفل صغير تلقائي أقوله ي ماما حتى لو ماأعرفه يعني لما يحاكيني أرد عليه إيش ي ماما أو إذا كان يبكي وجاني أطبطب عليه وأقوله خلاص ي روح ماما خلص هو طبع فيني ماقدرت أغيره يجيني شعور أمومه لما أشيل طفل عاد خواتي وصحباتي مايعجبهم يتريقوا علي يقولون إنتي كل العيال أطفالك كلهم عندك ماما بسم الله علي حنونه