عدنا .. كيفكم قناصينا ان شاء الله بخير .. بصراحه انقطعت فتره طويله عن ها الموضوع وحبيت اجدد العهد .. ما فيه شيء براسي الحين سوى ( ياسر ) .. ما زلت اتذكر اول مباراه لياسر بشعار الهلال ضد فريقه القديم القادسيه .. وكانت المباراه في الشرقيه .. اتذكر كنا سهرنين انا واصدقائي قبل المباراه طبعاً بيوم .. بصراحه ناسي المكان اللي كنا مجتمعين فيه بالضبط ولكن المهم انه خارج بيوتنا.. المهم خش في الموضوع .. سهرنا تقريباً الى الساعه 3 الصباح تقريباً .. فا قلت للشباب وش رايكم نحضر المباراه ؟ قالوا الشباب مهوي انت .. مافيه وقت .. على بال ما ننام ونصحى وبعدها نحرك بالسياره .. طبعاً المشوار من الرياض الى الشرقيه ماهو طويل .. ولكن الارهاق كنا خايفين منه فقط بحكم السهر .. بس قلت يا جماعه هذي اول مباراه لياسر ضد فريقه السابق والمباراه تعني لياسر الشي الكثير فلذلك لازم نحضر .. في الاخير تمت الموافقه بشرط .. ان يصير بيننا اتصال بعد صلاة الظهر .. علشان نؤكد السفر ... طبعاً بعد صلاة الظهر من نفس يوم المباراه .. تمت الاتصالات .. وتم التأكيد ع الذهاب ولكن قلنا كل واحد يتغدى في بيتهم ... وبعدها نحرك .. الشاهد ان حركنا تقريباً ومسكنا الخط ع صلاة العصر تقريباً ووقفنا في الطريق وصلينا .. ودعسنا بالسياره متجهين الى الشرقيه .. عددنا تقريباً 5 أشخاص .. كانت رحله مميزه بصراحه ووصلنا الملعب قبل المباراه تقريباً 20 دقيقه .. بعض الشباب حسوا با الارهاق لما دخلنا الملعب .. بس قلنا مايصير يا شباب لازم .. لازم نشجع بحماس وهبال شوي فا اختلط الارهاق مع التشجيع .. انبسطنا كثير .. وصارت بعض الاستهبالات في المدرج هههههههههههههههههههههه غير قابله للنشر .. لكن استمتعنا .. وبعد المباراه تعشينا ومن ثم قررنا العوده الى الرياض .. استمتعنا بمشاهدة الزعيم في الشرقيه .. وبا التأكيد استمتعنا بمشاهدة الكبير ياسر ... الخلاصه .. أي شيء يسعد ياسر احنا بصراحه نسعد .. المحبه من الله .. وشيء لا احد يستطيع ان يخفيه .. طبعاً المحبه في الله .. هذا ما في رأسي الان .. سعدت فيكم وانتظر مشاركتكم وتفاعلكم .. سيا ..