بسم الله الرحمن الرحيم
السلام عليكم ورحمة الله وبركاته
أهلا بكم أعضاء وزوار منتديات سدير ...
[ يـا سـعـد بـنـت عـمـك مـحـجـوزرة لـك !
أمتلك وظيفة , أمتلك سيارة , أمتلك شقة مفروشة .. لكن لا أمتلك رأيي في اختيار زوجة المستقبل !
جاءني أبي في ذلك اليوم واسمعوا مادار في تلك الدقائق ...
الوالد : سعد , انت ماشاء الله موظف وتمتلك شقة لازم تكمل نصف دينك ..
أنا : وأنا أفكر والله بالزواج يبوي , خلاص كل شيء جاهز الحمدلله ..
الوالد : ماشاء الله , أجل أكلم عمك نجيه الخميس الجاي ..
[ هـنـا الـصـدمـة ]
أنا : لحظو يبو محمد مو بالسرعة هذي , مافيه إلا بنت عمي ؟!
الوالد : وش فيها نورة يا سعد ناقصة يد و إلا رجل ؟! , بنت تنحط على الجرح يبرى ..
أنا : ماقلت شي , بس يبوي ما أبيها هي مثلها مثل أختي ..
الوالد : عندك بنت يعني ؟! >>> طبعا نظراته كانت نظرات شك :(
أنا : لا مو المسألة كذا , بس البنات واجد , و نورة ألف من يتمناها وبيجيها نصيبها إن شاء الله ..
الوالد : أجل , اسمع الكلام النهائي , الخميس نروح لعمك وخلك رجال ..
[ طـبـعـا هـنـا رضـخـت لـ الأمـر ]
جاء يوم الخميس , ذهبنا لـ عمي الذي لا يقل عن أبي أبدا , بعد مقدمات كـ العادة طلب الوالد
نورة لي , لـ نرى محادثتهم ..
الوالد : والله يبو خالد , سعد قدامك كبر والرجل موظف وله سكن ومابقى إلا نص دينه ..
عمي : ماشاء الله تبارك الله , سعد ينشرى والله ..
[ طـبـعـا الـطـبـخـة مـطـبـوخـة مـن قـبـل ]
الوالد : وماشاء الله نورة كبرت ومالها إلا بيت رجلها ..
عمي : إيه والله , هذا حال الدنيا الله يوفق ..
الوالد : وترانا جايين نخطب نورة لولدنا سعد وأنت عارف هم مالهم إلا بعض ..
عمي : الساعة المباركة , والله لوها ذبيحة ما عشتك , أبشر أنتم فصلوا وحنا نلبس ..
أنا : الله يسلمك , بس لو تسألها , لازم ناخذ رأيها ..
[ أنـا هنـا عـلـى أمـل إنها تـرفـض ]
عمي : لا يا سعد مالكم إلا بعض , إن شاء الله الشوفة يوم الاثنين والخميس الشيخ يجي عشان
نملككم ..
الوالد : على بركة الله , خير البر عاجله ..
أنا : على بركة الله :( ..
هنا ذهب عمي لـ نورة ليس لأن يستشيرها لكن لكي يعطيها خبر الخطبة ..
عمي : ماشاء الله تبارك الله , والله كبرتي يا نورة ..
نورة : ........ >> حياء
عمي : ترى جاني سعد اليوم وعمك ابو محمد وخطبوك والاثنين الشوفة والخميس الملكة , الله يوفقك
يابنتي بتروحين لبيت زوجك ..
[ نـورة مـن الـصـدمـة انـفـجـرت ]
نورة : يبوي سعد مثل أخوي وما عمري تخيلته زوج لي ..
عمي : الرجال وش ناقصه موظف , سكن , سيارة ومحترم وشتبين بعد ؟
نورة : بس يايبه ما أبي سعد , و سعد ماشاء الله بيلقى اللي تستحقه ..
عمي : طيب , ترى الشوفة الاثنين لاتنسين بس ..
مرت الأيام , ومرت الأيام تزوجت بنت عمي نورة , أول شهر كان شهر عادي كعريسين جديدين ...
بعدها بدأت المشاكل تتنامى بيني وبينها , التفاهم كان معدوم بيننا لم أستطع التواصل معها وهي
كذلك , لم أجد حل بعد أكثر من 5 شهور إلا " الطلاق " , هنا أصبحت نورة " مطلقة " ...
من يتحمل المسؤولية هنا ؟!
- هل الرضوخ للأمر من سعد و نورة كان سبب رئيسي علما أن الرضوخ كان لعدم إحداث مشكلة ؟
- استخدام السلطة من والدي و عمي كانت سبب رئيسي ؟
____________________________
ملاحظة : القصة غير واقعية ..
" الموضوع كتبته في أحد المنتديات بنفس الاسم "