شاعر تكلم بعد مـا طـول سكاتـه=وشلون يسلا وروحه كيف يقنعهـا
الله على الوقت وصدوفه وميلاتـه=والله على علـةٍ بالقلـب موقعهـا
يالله عبدك طويل الليـل مـا باتـه=تسوق نفسه على الخيره وتدفعهـا
عبدك يناجيك دايم فـي صلاواتـه=يا خالق النـاس تامرهـا وتمنعهـا
تـرد حـظٍ تشوقـنـا لرجعـاتـه=ستت سنينٍ مضت واليوم سابعهـا
وان كان عندك حزن ياوقت لي هاته=صاحبك الأحزان ما يقدر يودعهـا
اليا ضحك ضحكته ماهيب من ذاتـه=بيّن عليه التصنـع يـوم يصنعهـا
الحزن واضح على صوته ونظراته=لو كان يضحك وبسماتـه يوزعهـا
واليا بغى يشتكـي سبـة معاناتـه=يخاف محـدٍ يواسيهـا ويسمعهـا
ويضيـع مابيـن وناتـه واهاتـه=ولا عاد يقـدر يفرقهـا ويجمعهـا
واليا طراله مـن الايـام مـا فاتـه=تقول روحه من الاضلاع تنزعهـا
واليوم ماهوب شاكي غير لابياتـه=لو الدموع الزرق جفـت مدامعهـا
عسى الزمن بس يصفيلي علاقاتـه=لاقدم على حاجةٍ محـد ا يتوقعهـا
لعوض قلـبٍ تعنـى فـي بداياتـه=وارد له ضحكـةٍ مبطـي مضيعهـا