( كيلـو صبـر )
ياللي تبيعون الصبر ماعندكم كيلـو صبـر=جروح قلبي مرمسه وازريت اخيط فتوقهـا
ياخالقٍ ليـل ونهـار ياخالـقٍ بـر وبحـر=تعلم وش اللي تحتها تعلم وش اللي فوقهـا
تفرج لقلبٍ دامره كثـر التوجـد والسهـر=وتفرج لعينٍ همهـا قـام ايتمثنـى موقهـا
الطيب قفى مع هله والمقبلات ادهى وامـر=وشمس الرجوله غايبه لا تحترون شروقهـا
مبطى نفرق في عيال البطن وعيال الظهـر=واليوم مانقدر نفـرق حـت فـي منطوقهـا
ما عاد نلقا صاحبٍ يافي ليـا شـان الدهـر=تافي معي لا صار ابه حاجه تبـل حلوقهـا
لا خاب ظني فالقريب اللي نفاخربـه فخـر=ما الوم نفسي لو تعيف الزاد فـي طابوقهـا
الناس صايبها بلا والوقت من تالـي غبـر=قامت تزاين بالبقـر قامـت تهجـن نوقهـا
قد قالو ان الحنظله لو هي على جال النهـر=زادة مرارتها ليـا طالـت جميـع عروقهـا
واخير من مجلس هل النمات واضعاف البشر=اللي ليا حان الطلب قامت تعـض شدوقهـا
اضرب تهاتيه الخلا والخيـر كلـه فالسفـر=مادام رجلي سالمـه مافيـه شـي يعوقهـا
لو كان ماشفنا ثمان سنيـن همـال المطـر=ولا لقينـا عبلـةٍ ترهـي علـى رقروقهـا
ابا تمشى فالخلا واشب نـاري مـن سمـر=مع صاحبٍ يعطي جميع الناس كل حقوقهـا
ما اغبطك ياللي راس مالك جايبه سمن البقر=اللي يجيبه سمنها دايركـت فـي صندوقهـا