تجرحيـن و ترحلـيـن=وبعد مـدة ترجعيـن
ضايـعٍ بعـدك انــا=مـاقدرتـي تصبريـن
ليـن يبعدنـي الزمـن=عن شعـوري بالحنيـن
وعن حكايات الغـزل=وشوقي اللـي تعرفيـن
كنت اغامر لأجل أحس=ان حبّـك لـي متيـن
وكنت اشوفك كل شي=ضيّ عينـي والضنيـن
وكنت أطير بها الفضـا=بعد ما أضمك و أليـن
كان حبك لـي حيـاة=(حلوها ذيك السنيـن)
صارت أيامـي بـلاك=ضنْك و احزانٍ و شِيـن
صرت أخايل صورتـك=حاضرة في كـل حيـن
في صباحي يـوم كـان=وجهك الصافـي يبيـن
وصرت اشاهد مغربك=وانكسر كلي حزيـن
ما قويـت لهـا العنـا=هدّني وامسيت اديـن
عقلي اللي هـام بـك=واصبح لكلك رهيـن
و قلبي اللي لك عشـق=وعرشه اللـي تملكيـن
ودّي افهق لك ضلـوع=لأجل تقريـن الكنيـن
وينكشف لك وش كثر=حبـك بقلبـي دفيـن
روحي يا حب(ن) قديم=لان مـا فينـي أهيـن
كـل لحظـة عشتهـا=في كنف حلـمٍ يقيـن
وقبل ما اطوي صفحتك=ليتك انـك تسمحيـن
كلمـه بقلبـي بقـت=ولازم انـك تسمعيـن
بكـل شـوق اقولهـا=(حلوها ذيك السنيـن)