بسم الله ابدا وآتعوذ من ابليس=واحكّم المعنى وأصف القوافي
واجر صوتي مع براد النسانيس=في راس (رجم الزير) مروي الشلافي
في حزةٍ تُعرف بدق الهواجيس=وحزة تذكر كل غالي ووافي
حزة قبيل إشعال ضوّ الفوانيس=وحزة تقول الشمس: قرب انصرافي
اتذكر اللي له بقلبي مغاريس=كل غرسةٍ تشكي الضما والجفافي
تبغى يفجّر قاطبات المحابيس=ويروي ضماها بالوصل والتلافي
غير الزمن دونه ودونه أشاويس=تجمعوا ضدي عسى الله يكافي
وأزريت أخفّي فاضحات الأحاسيس=هو به مع الدمعه والأشعار خافي ؟
حبه بقلبي ماله أية مقاييس=إن صح قولي : بحر ماله مرافي
والشوق يحمسني سواة المحاميس=وفرقاه كدر كل مشروب صافي
لو ثقل شوقي تحمله (ضمّر العيس)؟=والله لتبرك ماتشيل الخفافي
ياكم عشانه إذبحتني الوساويس=ولا صرت أميز بين مقفي ولافي
ياقيس هونها وهي تهون ياقيس=لابد يوم العامريه توافي
استغفر الله واتعوذ من ابليس=حان انصراف الشمس وحان انصرافي