( البراقع )
البراقـع عمرهـا ماغـطـت القـلـب وحنيـنـه=والليالـي عمرهـا ماغطـت بـروق السحـايـب
يا كثر ما جـر صـوت القلـب بلحـون الغبينـه=وأنطرب دمعي وحوّل مـع لحـون القلـب ذايـب
خيّـل الحـظ وتركنـي يـا الله انـك لا تهيـنـه=للظروف القاسيه / والوقـت / ويديـن النشايـب
يا العيـون الناعسـه يـا أم المراميـش السنينـه=والله ان وقعك علـي أشـد مـن وقـع الحدايـب
لا تصديـن النظـر عنـي وتبـديـن السكيـنـه=دامني آشـوف فـي نظراتـك أطـراف اللهايـب
ماقدرتي يا الحزينه .. فـي الهـوى لا تظهرينـه=دمعة المشتاق .. ماهي مثـل دمعـة عيـن تايـب
لاحت الذكرى بعينـي - مـن لمحتـك يالحزينـه=وأبتسم من حيرتي وأقـول : يـا دنيـا العجايـب
كيف كنـا نلتقـي .... والسعـد يرعانـا بعينـه؟=وكيف صرنا نلتقي ... وإجروحنا حمراً عطايـب !
أختلف وجه الزمن - وأشحـب وعقّـد حاجبينـه=كنت اشوفك حاظر / وذا اليوم اشوفك بس !! غآيب
ما نسيـت العهـد الأول - لـو بغيتـي تنقضينـه=حافظـه حفـظ الحواجـب للعـيـون وللهدايــب
تذكريـن ايامنـا والـحـب بـاقـي تذكريـنـه؟=والبراءه يوم نسأل بعـض وش معنـى مصايـب؟
وطبعـة السجـاده برسمـات مـكـه والمديـنـه=وضحكنا وسط الركوع وهمسنا من خلـف شايـب
والشغـب والبرقـع اللـي تلبسينـه قبـل حينـه=يـوم نضحـك .! مادرينـا انـه لفرقانـا سبايـب
لا تنسيـك البراقـع طـاري الـحـب وسنيـنـه=غطوةٍ للوجه ... ماهي غطـوه لشـوق الحبايـب