كلمة خبر جابت علي المصايب=ياليت مرسول الخبر كان مخفيه
قلب شقي صابه من الوقت صايب=صابه من الي كان قلبي في اياديه
تجاوبت عيني وهلت صبايب=على خفوق مات من هو يراعيه
عزيت قلبي في فراق الحبايب=ومااقدر اعزي غير قلبي واواسيه
مات ومعه القلب تحت النصايب=قلب يموت ولا بعد مات راعيه
كل يعزي صحبته والقرايب=وما احد رحم قلبي وجاله يعزيه
لو كان طلاب الخنا قلت خايب=لاهوب يسمعني ولانيب انا جيه
اناجي الحزن بضميري لهايب=نار بوسط القلب من حر مافيه
منساه لو انه من الكون غايب=ياكيف بانسى من قصيدي غناويه