فكري تغيّر وقلبـي زايـدٍ همـه=ودموع عيني على الخدين همالـه
سبة نهار الخميس العصر يايمـه=يومٍ علي اثقل من طويق وجبالـه
دقيتنا ابغى اتطمن جيت بمطمـه=حصّلت علمٍ يهز القلـب زلزالـه
لابوك يالهاتف الجوال مـن زمـه=يغيّر الحال من دقـه الـى حالـه
ردت علي سسترٍ ماهيب مهتمـه=قالت ترا ابوك مات وميّل ظلالـه
ساعة وصلت ولقيت الناس ملتمه=ضاقت علي الوسيعـة واتحرالـه
وقّفت محتار مدري وينها اليمـه=جوني يعزون كلاً يدعـي لحالـه
قلت ابعدو عني وخلونـي اظمـه=لو لحظة تشوف عيني عينه قباله
تكفون خلوني اقرب منه واشمـه=وودعه قبل عنـي تقفـي رحالـه
قفوبه وقمتنا ادعي كاشف الغمـه=الهنا اللي علينا ما احصي افضاله
واقول يارب حرم عظمـه ودمـه=من لاهب النار واقبل صالح اعماله
واجعل مامره طهور ومانقص تمه=واسالك يارب جعل الخلد منزالـه
مرحوم يامبعد الهقـوات والهمـه=مرحوم ياللي علوم الطيب تثنالـه
مرحوم ياطيب الاخـلاق والذمـه=يامغني نفسه ويامرخـص ريالـه
ماهوب بين الرفاقه ينقـل النمـه=يدفع من اجل التوحد روحه وماله
الفضل للهِ ما اذكـر واحـد يذمـه=يالله يارب جعـل الخلـد منزالـه