انتهى الموسم / وجات الخاتمه بام الخساير=والخساره فالكم /ياناس يامال الخساره
لاتقولون / الظروف / ولاتقولون الدواير=والله ان الشمس ماتحجب عن الارض بستاره
امتلا الملعب في الموعد بخمسين الف زاير=وانتم اللي كنكم / اشباح / تمشي في مغاره
والله ان احساسنا نيران / تغلي بالضماير=كيف وجه الازرق المشرق /يبان بلانظاره
الهلال اكبر من اللي في ضميره عرق باير=الهلال اكبر بتاريخه / وطرياه وشعاره
لاعبين /احساسكم / اصغر من صغار الصغاير=ماعرفتوا قيمة النادي / ولامعنى وقاره
واحدً مستهتر وهمه / ملايين وعماير=ماعليه ولايحس بخاطره / ضيق وحراره
وواحدً يلعب لنفسه / تايه / وعاجز/ وحاير=دام ماقدّر( جماهير الوفا )يرقد بداره
يابو فيصل والرجال اللي تجي لك بالبشاير=ماهي اللي / مالها في حزة الشدات غاره
الضعيف اللي عزومه خايره / ماهو بثاير=لاتحطه في يمينك /لو توهج في مساره
والذي وقت الحسم /ماله من عزومه ذخاير=مايُسمى بالبشير / ولاتجي منه البشاره
افرز من رجالك / رجالً على عزم وبصاير=واترك الباقي / وكُلً ينطلق حسب اختياره
نعرف ان الحزن حزنك / لو تعلق بالمناير=انطفى نور الرياض / وهلت دموع الحضاره
لكن الشكوى على اللي / سخر الطاير لطاير=والعتب يا اميرنا من حب ممزوج بغياره
حط ميزانك / وحاسب / من تسبب بالخساير=لاعبً / والا مدرب / او يكون من الاداره
واجمع عزومك / ومثلك / ماتوقفه الخساير=وامش دربك / والصداره / مانبي غير الصداره