مرحبا ..ياهلا بك يامحمد نجيب=عشت سالم وسلّم لي على ابوظبي
جيتنا والسعوديه فضاها رحيب=تغري الشرق بالانوار والمغربي
لك تحيه وجمهور الهلال الرهيب=مايدور سوى الأنصاف له مطلبي
جبت لك بالقناه الرايده كم خطيب=وكل واحد ورا اسم الوطن يختبي
لاغرابه ولكن العجيب الغريب=انك تتيح ساحتها لمن يكذبي
واحدّ شاب والثاني بحقده يشيب=والهلال يتطاول باول الموكبي
وواحدً بين خلق الله ماله نصيب=لايغرك هدوم الزول والمنصبي
وواحدّ يركض لوحده كأنه غريب=ولو تقول الحقيقه قال لك مانبي
عارفينه ولكن العتب يالحبيب=لك لانك تمثل اسم (دار الظبي )
مايجمّلك بين الناس فكرً عطيب=ولاينوّر عقول الناس عقلً غبي
وطلقة الخبل لاتدوّش ولاهي تصيب=مير تجلّب عليه الزاد والمشربي
الهلال اكبر ..اكبر ..من كلام المريب=والمريب اصغر اصغر من صغير يحبي
مجده الشمس عن مجده ابد ماتغيب=لاطريتوه زيدوا صلوا على النبي
الهلال الزعيم اللي يجي بالذهيب=ويتسامى سمو ..الفـارس اليعربي
مايهزه زوابع من كلام ونحيب=ولايهمه خواطر ..من خواطر صبي
نقدر نردّها بالمثل لكنّ عيب=عيب يوم الرجل يمشي طريق الصبي
واحترامً لجمهور الهلال المهيب=لاتدفّون حزم طويق بالمنكبي