السلام عليكم ورحمة الله وبركاته
نعود هنا 
مابين تكفير ذنب و بين رجوة ثواب
قدام قبلة إله الكون رافع يدي
لابُد نعمل بـ هالدنيا لـ يوم الحساب
عمر البنادم قصير ولا هو بـ سرمدي
النفس قدامها ما لذ منها و طاب
لكن عندي مبادئ و اتحداني حَدي
مادمت تَوّي صغير و نبض قلبي شباب
ابفني العمر جهد و ما يضيع أجهدي
ماني بـ عايش كما اللي عاش يطرد سراب
لي غاية(ن) كنّها أنولدت مَعَ مَوْلدي
مَرّوني الناس واجد من بعاد و قراب
ومن كثر طبع البشر مدري منين ابتدي
يا كثر من هرجهم هرجة عزيز الجناب
و لا صار وقت الشدايد بان وجه الردي
و يا قُلْ من يُنلقى لا كَشّر الوقت ناب
يتواجد آليا انتخيت و قلت يا مسندي
يا سهيل ياللي حياتك في حضور و غياب
مالي برفقتك دام إني خوي الجدي
يا ليت عندي جناح الطير و ارقا السحاب
و أنثر همومي من أنفاسي بـ شكل أبردي
مَرّات فكري خطا و مَرّات فكري صواب
مير أبرقي يالسحايب فوقنا و ارعدي
كل(ن) بصدره يمر الهم و الاكتئاب
و الرزق مكتوب حتى لو بغيت أتعدي
والله مابي كنوز الأرض و أحلا الثياب
مابي سوى راحتي و ارتاح في مرقدي
و يالله حُسْن الختام و جير عنّا العذاب
و يا جعل موتي وأنا لك مؤمن(ن) مهتدي
محمد