ماعرفتك..!! والعذر أقبح من ذنوب الخطيه::حتى شكلك ان قلت لك بعضه نسيته
أذكر عيونك حورها من الخجل زايد شويه:: بس هذا أذكر وغيره من الذكرى محيته
لا بعد اذكر..شعرك اللي يحب لعبة يديه:: سالفة شعرك لحاله لو ابشرح ماوفيته
وأذكر أن فمك حضن جمر حمر فوق ابرديه :: لاتبسم لي رحت كلي من اللهفه وجيته
وأذكر ان غمازة اخدودك عذاب ومهمهيه :: وردتني لطريق اللي ابتدي يوم انتهيه
وأذكر ان اطعونك اللي بالظهر كانت قويه:: أيه اعرفك بس اخاف الجرح يكبر لا طريته
أنتي يوم كنتي شي ثاني..كنتي شي مني وفيه::أقرب أنسانه لقلبي حطمت قلبي في بيته
تذكرين..الورد الاحمر يوم جبتي لي هديه:: قلتي تكفى لايموت الورد لك غالي شريته
مات قلبي قبل يموت الورد وجروحه نديه::في يديني جبت دم القلب للورد وسقيته
كنت أحسب اني اضحي..مادريت اني ضحيه:: كنت أحسب ان العطى يثمر بعين اللي عطيته
راحت احلام العمر.روحه كذا من غير جيه:: حتى زرعي اللي زرعته ماتوفقت وجنيته
من عقب ماكان ليه.. صار له ماهو بليه:: من خذاه!! وقلبي يسئل عنه لكن مالقيته
دايم اسمع عن خوي خان في خوة خويه:: موقف يمكن كتبته بالشعر قبل وقريته
المهـــم...ماكنت أحسه لين ماجتني بليــه:: من يديك وحسستني وخاب كل اللي هقيته
يابدويه..مو كذا رد الجمايل يابدويه :: البدااوه علمتني كيف ارد اللي خذيته
"×"في الزمن هذا.. محال الوافي يلقى وفيــه:: الزمن هذا خذلني وفي محبتـك وبكيته"×"
كنت أقول الطيبه احسن من علوم الرديه:: كنت أقول وكنت أقول ولانفعني ماحكيته
مابقا عندي كلام ولا بقا بصدري بقيه :: من تفارقنا بصدري هالعتاب ولاشكيته
هذا كله اللي عليك..وقولي انتي ماعليه:: بسمعك للصبح يمكن أسمع مابغيته
"×" شكلك اعرفه عرف الموصي للوصيه:: قلت ماعرفه..وفي قلبي أقول أني فديته"×"
أيه اعرفك والعذر أقبح من ذنوب الخطيـه:: انتي شكلك صدقيني راح اموت ولا نسيته
ثامر شبيب