ياضيقتي والهم والحزن بالدور=وكلن بيأخذ من جروحي نصيبه
صفّوا على شباك الأنفاس طابور=وإنتزعوا آهات الجروح العطيبه
ويامرحباً بالظلم والغبن والجور=ضيّفكم الخافق مواجيب طيبه
وسحايب عيوني سطع نوضها نور=وأطفت ظماكم بالدموع السكيبه
البارحه والليل حالك وديجور=ليله من الشهر المبارك غريبه
شهر رمضان اللي برى كل مسحور=ولو هو تخلا عن زيارة طبيبه
متصفد الشيطان فيها ومدحور="وحي الكتاب" وما بالكتاب ريبه
آمنت بالقرآن ناصح ودستور=وكفرت بالثالوث ويّا صليبه
والليله اللي لخبطت بعض الأمور=عندي لها حل العقول النجيبه
صحيح يمسي خاطري فيك مكسور=وصحيح لحظاتك بطئيه .. كئيبه
وصحيح فاقد فيك ياقوتة الحور=أقرب بعيده .. مدري أبعد قريبه
"نجمة سهيل" اللي لها موعد ظهور=وإذا ظهرت قلت: أرحبي يالحبيبه
وصحيح من ظلماك بالحيل مقهور=لابان في رأسي من الهم شيبه
لكن دمعي فيك مخفي ومستور=عن من يقول إن دمعة الرجل عيبه
اللي يحط إذنه على صامت السور=يبغى الشماته لاتوحى نحيبه
ينطح سواليف القفى نطحة الثور=والله يعين اللي قرونه تصيبه
مافي قوامسيه من الخلق معذور=كسّاب ذنب ويجني الذنب خيبه
من طبعه إنه يشهد الكذب والزور=ويخوض بأعراض المخاليق غيبه
والعبد بإذن الله على الجرح مأجور=مادام يرضى لاتلقى المصيبه
ويقول: سلوان الحزن شيء مقدور=وحكم القدر راضي بما لي يجيبه
وصلاة ربي عدّ قطرات البحور=على النبي وآله ومن صحيبه