* * * السلام عليكمـ .. بما اني سجلت بالمسابقه فلازم اكون عند كلمتي واشارك .. صحيح السفره قديمه بس لان الصور موجوده عندي ومضبطه .. فـ مالي الا هي بالوقت الحالي لضيق الوقت وبا اني الولد المؤدب الحليل اللي يسافر مع اهله وكذا قررت عام 2009 اني اسافر معهم واكون خير جليس لهم وونيس : $ .. < اشوا ان مامعك دراهم بلى ولا كان مارحت معهم وبعد مشاورات عده مع الاهل وبحكم انها ماسكه معهم على طبيعه وشئ جديد .. قررنا نسافر لديره الشغالات .. سيرلانكا .. بلد السفر / سيلانكا المدن / كولمبو - كاندي- نورلايا- بنتوته - نقمبو عدد الافراد / 7 عدد ايام الرحله / 13 يوم تكلفه الرحله / والله مدري عن ابوي بس الظاهر وكان منيب ناسي 30 الف قيمه التذكره / 1500 للبالغ ساعات الرحله / 6 ساعات جواً العمله / 1ريا ل=26 ربية // كولمبو // اتذكر اول ماوصلنا كولمبو كان المطار شئ كويس ويبشر بالخير يعني مش بطال شكله ابداً .. صحيح الريحه خياس وانتم بكرامه بس الوضع مطمئن جداً وكان يحترينا السواق اللي كنا متفقين معه من الرياض ولكن ابن الكلب تأخر وماجى وجلسنا بالمطار نشوف الجاي والحاضر والواضح ان اكثرهم القصمان الزبده جى ورحنا سكنا بفندق سيلون الأنتر كونتانينتال < صح امسه ولا كانت الغرفه بـ 80 $ شامله وجبه الفطور والعشاء .. والغداء طبعاً لوزين احلى تصبيره .. لان لو الواحد فكرر فيها هناك تصحى 8 الصبح وتفطر لين تقول ربي امين وتطلع وتتمشى وتفلها لين العصر وتجي هه تدور لك قهوه وحلويات وماتجى 6 المغرب الا وعشاهم جاهز تتعشى وتحط راسك طبعا الجو بكولمبو مهوب بعيد ابد عن الرياض جلسنا في كولمبو يومين لاننا ناوين نرجع لها في طريق العوده بعدها رحنا كاندي اووووم الفله في هالديره .. // كاندي // جوو خااااااااثر وطبيعه مش ممكنه سكنا بفندق the citadel اعلى الجبل .. عاد قم الفجر وشف الوضع المش ممكن يجيك كذا شوي مطر وشوي هواء بارد تخق ومن الوناسه تفصخ .. طبعا عادي تتمشى ويمر من جنبك فيل .. الحيوانات هناك اكثر من الاوادم وبصراحه كاندي من احلى الدير وجلسنا فيها 3 ايام طبعا كاندي تعتبر ثاني اكبر مدينه بعد كولمبو وفيها اكبر حديقه بسيرلانكا ولو اني منيب احبذ الحدايق لاني احسها شئ سامج وفيها ميتم الافيال خخخخ شئ عجيب صراحه انصح فيه // نورلايا // هذي بعد جدا ممتازه خصوصا سكنا في فندق بين الارياف .. ويمكن احسن من كاندي خخخخخخخخ مدري بس كلهم حلوات يعني تقوم الصبح وتسوي مثل بيتر وتنتظر هايدي تجيك .. تقوم وتفطر وتتمشى بين الشلالات والحدايق شئ مش ممكن تروح لحديقه ولا تروح لحق الفيله وتركب فيل وتتمشى تحس انك بفيلم .. تجلس تبطح ومعك ترمس شاهي وكلن من يمر يشوفك تحس انك شئ شاذ جلسنا في نورلايا 3 ايام وكانت جدا ممتعه كديره لان كلها شلالات واشياء كذا ممش ممكنه الوصف // بنتوته // هالديره صراحه تقدر تقول اوربيه لان اكثر اللي فيها اجانب .. من نوع اللحم الاحمر الاشقر .. وتشوفهم المساكين ياخذون تان يبون يصيرون مثل السيرلانكيين .. استاجرنا شاليه على البحر وكانت الدعوه فيذاك سايبه تطب المسبح وتلقى جنبك وحده بالاندوير اوووف تقوم تستحي وتطلع .. غير انك تلقاهم وانت ماشي معطيتك مقفاها وجنبها رجلها مدري خويها يناظرك ويبتسم هالديره ونيسه مش بطاله بس جوها تعبان شوي حر وكل ابودايم تلقاك تطافش بالمسبح ولا البحر واتذكر جلسنا فيها يومين ورجعنا لكولمبو وكان الدعوه تقضي واشياء للذكريات من سيرلانكا وهدايا والخ .. وماكان فيها ذيك المولات اللي تستاهل ماتذكر الا ماجستيك سنتر والباقي خمام // نوقمبو // هالديره خيااااااااااااااااااااااس .. لأحد يروح لها صراحه يقولون قريبه من المطار وكذا بس مخيسه وجوها زفت ولا فيها شئ يسوى جلسنا فيها يوم واحد وبالطقاق يالله صبرنا يالييت سيرلانكا تزيلها من ديارها اصرف لها وبعدها رجعنـا للوطن سالمين غانمين .. وعلى قوله جدتي الله يرحمها وش استفدتوا من هالسفره ؟ غير نفاذ اعمال ومال .. // مقتطفات تستحق الذكر // 1/ سيرلانكا ونيسه وتصلح لأكثر من عائله مع بعض صراحه شفنا هناك 6 عوايل قصمان سوا ياهم بنااااتهم مسوين رجه وزحمه بالفندق ماصارت ولا استوت ومن النوع البثر اللي كل 5 ساعات يصحى قروب وينوم قروووووب وغير كذا يركبون باص النقل الجماعي في تنقلاتهم خخخخخخ انا يوم حسبتهم لقيتهم فوق الـ 30 شخص وواك 2/ سيرلانكا بلد امين ولا فيه مشاكل ولا فيه خوف على نفسك ولا على عيالك .. منتب لاقي الا كل شئ يسرررك وبيشلونك بكفوف الراحه مقابل قليلاً من المال 3/ لغتهم طبعا مدري وشي بس اللغه المشتركه الانجليزيه ومايمنع انك تلقى بعضهم يتكلم عربي بحكم انه قبل كان سواق او شغاله بالخليج 4/ ازين مافي الديره انها طبيعتها ماحصلتش ابد ابد .. وفوق كذا رخيصه جداً .. 5/ الاكل انصح يكون من اكل الفندق يعني لما تحجز لك غرفه اطلب معها يكون فطور وعشاء لانه انظف لك صراااااحه من اكل برى بكثير الا كانك راعي طبخ وكذا شئ راجع لك 6/ احلى شئ بالسفره موب الدير احلى شئ التنقل بين الدير خخخخخخخ يلعن الوناسه بس تتمشى من ديره لديره يعني بينهم ساعتين الى 4 ساعات ماتحس بالطريق ابد تمر شلالات وانهار ومزارع شاي وكل شئ بالطريق شئ يونس ويوسع الصدر صح ان الخطوط خط واحد رايح جاي ويقلب الراس ويخوف وتتوقع بأي وقت انك بتصدم او بتطيح بس برضو الوضع اكشن ووناسه هههههههه وهذي باقي الصور ايييييش كول هذا سبحااااان الله صراحه كنت اشوفه بالتلفزيون ولا اصدق احد الفاندق بكاندي اتذكر اخوي نواف كان جنبي ونزل من هالدحديره ولا قد يمسك بريك خخخخخخخخخخخخخخخخخخ ابد ترى ماتقلب وتمخش وجهه هذي الصغيره هو تاكسيهم السريع صراحه الركوب فيها ممتع انواااااع الشاي عندهم انت بس صلح واشرب واستمتع عاد الفواكه والخضار اشكال والوان .. وكلوووو طازه ورخيصه جدا هذا اتذكر جيناه واثره يتروش ابد ترى ماخربنا عليه واستبثرنا وماروعنا ونزل الوزره خخخخخخخ ونوووكل الفيل وابد ماخفت يشفطني والعب عليه كل ماجى يلقطه ارجع يدي احلىىىىى شئ مثل ماقلت لكم تتمشى بالطريق من ديره لديره وتشوف هالمناظر واحد من المساجد عندهمـ .. ابد ماوقفنا وصلينا فيه وجلسنا نريح بوفيهااااات واحد من الفنادق ومثل ماقلت لكم احرصوا على اكل الفنادق لانه الانظف والاجمل واحد من الاسواق عندهمـ .. كلووو رخيص بس مخيس وحده من الحدايق الكبرى بكاندى .. تمشي وتتعب ونفس الاشياء شجر وورد وبس الشاطئ بكولمبو طبعا يطل عليه الفندق .. منظره الفجر شئ ماحصلش يوم نروح كانت مدارسهم تشتغل وهذولي طلابهم الحلوين نراكم ع خير بتقرير جديد .. وتابعونا ع التويتر اللي بتوقيعي بكون معكم بنقل مباشر بالصور من المانيا وماجاورها بعد بكره سفرتي ونشوفكم 2 رمضان ان شاء الله مشاركتي مب عشان المسابقه وافضل تقرير .. بس لان مشرفين المجلس واصدقائهم يستاهلون .. فمان الله