الابطال : انا "عنود الغيد" – حايره– بلو – بنو – بشاير – هوبه – ابتهال – مها – منال – رهام – فدى – الحالمه – ساره – ريما – نوره
15.. بطله ..

تعريف بالابطال :
(( للتوضيح فقط لا غير ))

انا : يا حبي لي .. حبوبه وطيبه وكل شي زين فيني !! (( ويلوموني فيني !! ))..اكثر 4 لاعبين احبهم و يعجبوني : رونالدينهو – ياسر القحطاني – محمد العنبر – مايكل اوين
حايره : دايم تتأخر في كل شي !! حتى في شوت الكوره ؟؟ استيعابها بطيء << اسمعوا من يتكلم؟؟ .. بس والله حبوبه .. تسرح واجد .. و ملصقين فيها عبدالعزيز الخثران
بلو : مرجوجه و خاقه على ياسر القحطاني .. تلعب وسط كويس مره << مدري وش دخل
بنو : يعجبها سامي .. ولا تواطن شي اسمه ياسر على انها هلاليه .. بس قولوا الحمدلله ؟؟ "وقت كتابه القصه كانت تعبانه عشان كذا في القصه طول الوقت نايمه "
بش بش (بشاير): تحب السواليف مره مره .. خبله و على نياتها و الظاهر انها هلاليه علشان اخوها نصراوي !! ..
هوبه : حساسه مره و مره طيوبه و تخاف بسرعه و تطفش من الكوره ..
ابتهال : عقل و ثقل و حبوبه و حنونه "تنفع ام"
مها: حبيبه و تسمع الكلام وهاديه و تحب كماتشو..
منال: ما قد شفتها ما تاكل على انها عصلا .. و دايم تجيب شبسات "على حد علمي" << مهيب معي بالفصل!!
رهام : هذي ما فيه واحد ما خقت عليه .. الا ياسر ؟؟ << ما عندها نظر !!
فدى : سنترال .. دايم ترد على التلفونات و مواعيدها مهيب دقيقه دايم تتأخر .. " تحب الجزم "
الحالمه : هذي وحده خطيره و خبله و مرجوجه وعلى طول تخق على أي واحد ولو انه عادي !! ..بس اسمها الله يهديها مدري وش يبي !!
ساره : هلاليه متعصبه .. تكره اللون الاصفر .. تفهمه على طول انه نصر !! اذا فاز الهلال ما في احلا منها و اذا خسر وخروا عنها !!
طوييييييييييييله .. ما تحب العيال و خاصه الحلوين .. عصبيه .. تشبه سعد الحارثي !!!<< والله امزح بس عشان اقهرها .. ما تدانيه
ريما : يا حبي لها هذي وحده في كل حصه لازم تروح للحمام .. واذا دخلت له ما عاد طلعت منه .. لازم نشوف لها صرفه !! بس انها حبوبه و تحب تسوي مقالب دايم دايم دايم .. و هوبه اللي تروح فيها !!
نوره : تحب الترتيب و النظام .. ما تحب تتأخر ابد ابد .. حبوبه وتسمع الكلام ..

طبعا هذا مو كل صفاتهم لان صديقاتي يا حبي لهم اتعب وانا امدحهم << وش عندك؟؟
بس هذي بعض الاشياء اللي تستند عليها القصه ..

**

" في البدايه كانوا اهلنا رافضين الفكره .. بس مع شد و جذب و ازعاج وافقوا بس بشرط : ان نتايجنا تكون كويسه !! وبكذا يسمحون لنا نسافر مع بعض "

" قررنا نسافر لالمانيا علشان نحضر حفل افتتاح كاس العالم 2006 "

الكل بدا يجهز نفسه .. من سوق لسوق .. نشتري ملابس وجزم و نظارات و كريمات و عطورات

الحمدلله نتايجنا مره مره زينه << هذا الشي اللي قهر ابوي
بس هو وعدني !!

جا اليوم الموعود .. و اتفقنا نتلاقى في المطار لان مستحيل سياره هوبه تكفي 15 لانها من عقب يوم الزواج خلاص ماعاد يستخدمونها
"( يوم الزواج : الخميس اللي راح رحنا لزواج 13 بنت .. في GMC صغيره !! )"

طلعت انا و بلو و ريما و هوبه و بنو بسياره وحده ..
و بش بش (بشاير) و ابتهال و نوره و ساره ومها مع بعض ..
و الحالمه و حايره و رهام و فدى و منال بسياره وحده ..


**

" مطار الملك خالد بالرياض "

وصلـنـــــــــا للمطار .. والاخت بلو جوالها موب معمم .!.!. بس لعبنا على حايره و اخذنا جوالها !!
نوره و ابتهال قعدونا في صاله الانتظار و راحوا يضبطون الاوراق ويدخلون العفش طبعاً طلع معنا عفش زايد لان فدى الله لا يهينها جايبه دالوب الجزم حقها كله!!
كانت رحلتنا تستوجب ان احنا نمر دبي اول .. بس مو مشكله نقعد في دبي 3 ساعات نرتاح شوي ..

"الرجاء من المسافرين على متن الرحله رقم 1137 المتجهه الى دبي الصعود الى الطائره عن طريق البوابات 5-6" << هذي رحلتنا

كنا مره متحمسين .. دخلوا البنات وحده وحده وماراح فيها الا ابتهال و نوره تشوفونهم مربطين الجوازات بمغاطات من كثرها كن حنا شغالات بيحجون !! ..
كنت انا آخر وحده تدخل .. سأل حق الجوازات ابتهال "يأشر علي" : هذي وين اقامتها ؟؟ (( مشكلتي بيضا )) ..
انا : اقامه في عينك يا الطعس !! اخذت جوازي و دخلت ..

**

" الفريست كلاس "

طبعاً الدرجه الاولى ما فيها الا حنا << من قلكم ؟؟
كل وحده جلست في كرسيها .. اما بنو و الحالمه يتهاوشون مين يقعد جنب الدريشه ؟؟
جا على ازعاجهم المضيف "سعودي و مملوح " وقال لهم : خلاص انا ادبر لكم مكانين بدرايش !!
الحالمه : مايحتاج دريشه بس بقعد جنبك بس!!
قامت بنو سطرتها كف على وجهها و قالت لها : خلاص ما ابي دريشه اقعدي انتي ..وانت((تعاني المضيف)) اذا احتجنا شي ناديناك .. مع السلامه ..
و بلو مستانسه على الهوشه ومتنحه في وجهه.. و ساره تهاوشها !!

انا جلست جنبمها ومنال و بش بش و ابتهال..
الحالمه و ريما يناظرون فيلم هندي "البطل حلو" ..
بنو نايمه ((قعدت جنب الدريشه )) و هوبه جنبها طفشانه ..
و نوره قاعده تعد الجوازات اذا هي كامله والا لا ؟؟
اما ابتهال و بش بش قاعدين يسولفون كالعاده و يحشون في الرايح و الجاي ..
ومها حشرانه و لا تحب حمامات الطياره .. وحايره على طاري الحمام قاعده تفكر اللي ينشفط من الحمام وين يروح؟؟
وبلو و رهام مسوين ازعاج و قاعدين يلعبون " اونو " و اللون على الازرق و بلو عيت تغيره ؟!؟
و ساره نايمه ..
وعلى هالحال .. لين نامو..
اما انا من الطفش فتحت الفيلم الهندي حق ريما و الحالمه و قعدت اشوفه ..

" الرجاء من الركاب ربط احزمه الامان استعداداً للهبوط "

هوبه من سمعت كلمه هبوط قامت ترجع كل اللي كلته .. و بنو ما درت عنها .. نايمه ..


**

" مطار دبي "

طبعاً الاخوات ما صدقوا على الله دخلنا مطار دبي على طول فكوا الطرح "بس الطرح!!"
والله هذا المطار اللي يفتح النفس مو مطارنا اللي حتى النافوره ما شغلوها ؟!؟!
ريما و هوبه و نوره على طول اتجهوا للمحلات
اما انا و حايره ومها و الحالمه و ساره و بلو رحنا للمطعم ناكل..
و ابتهال و بنو و رهام و منال و فدى و بش بش راحوا لستار بكس ياخذون قهوه يصحصحون شوي !!
..
في النهايه جو كلم للمطعم عندنا .. نوره ملت من هوبه و ريما و قالت لهم بروح والحقوني ..
مرت الـ 3 ساعات بسرعه .. بين سواليف وحش و مقاضي ..

اجتمعنا كلنا في صاله الانتظار لان رحلتنا لـــ " ميونخ " ما بقي عليها شي !!
قلنا عاد الحين احنا 15 اذا ركبنا مره وحده بيصير فيه خلل في توازن الطياره خلينا نتقسم احسن ..

انقسمنا 3 مجموعات :
1- ابتهال و بلو و مها و انا و بش بش ..
2- نوره و منال و فدى ورهام وريما ..
3- ساره و الحالمه و بنو و هوبه و حايره ..

" ركبنـــ ــ ــ ــ ــا " وكنا متفقين ان كل وحده تجلس بنفس المكان اللي جلست فيه في الرحله الاولى..<< على كيف امنا !!
واحنا قاعدين في امااان الله فجأه صرخت الحالمه !!
راحت لها بلو تركض : وش فيك؟؟
الحالمه : فيه سعودي حلو راكب قدااامي !!
بلو – قعدت تصارخ –
الحالمه : ما قلت لك انه حلو ؟؟
بلو : يا الخبله ريما وينها؟؟ الحين بتقلع الطياره !!
الحالمه – توها تستوعب ان ريما ما ركبت –
راحوا بسرعه لابتهال ..
بلو : ريما ما ركبت ؟؟
جت بنو بسرعه
بنو : حتى هوبه ما شفتها؟؟
بسرعه نزلت ابتهال و راحت لحق السكيورتي وقالت له ..
قال : خلاص لهم 10 دقايق اذا ما جوا بتقلع الطياره ما نقدر نأخر الركاب اكثر من كذا؟!؟!


" ريما الـ ....... و هبه الـ ........ ، الرجاء التوجه للبوابه رقم 26 للرحله رقم 1193 المتجهه الى ميونخ ، حان وقت اقلاع الطائرة "

عاد النداء 3 مرات بس دون فايده
لان ذا المسبه داخلين الحمام "ريما حشرانه " و هوبه تمسك عليها الباب و لا يسمعون؟؟
طولوا ما جو .. قالت ابتهال انزلوا بس لا تقلع بكم الطياره وتكمل الناقص !!
نزلنا .. وقلنا خلاص ما فيه روحه لاننا يالله لقينا حجز .. و ساره معصبه تقول والله لاوريهم ..
وقعدت تهاوشني تقول : الشرهه مهيب عليكم الشرهه علي مسافر معكم بيفوتنا الافتتاح كله منكم .. لو اني قاعده في البيت اصرف لي على الاقل اشوفه في التلفزيون ..
وبنان تقول: على الاقل انتي بتشوفينه اذا رجعتي البيت اما انا لا !! << مخلص اشتراكم
و حايره سافهتهم و عايشه جو مع البسكوت الخالي من السكر اللي قاعده تاكله !!
اما انا .. ما اقول الا الحمدلله انها قصه و الا كان علووم !!

ريما وهوبه موسعين الصدر راحوا كملوا لفهم على المطار ..
لين بلو شغلت مخها ودقت على جوال هوبه .. وقالت لها اللي صار وان ساره مره معصبه و ابتهال واصله معها !!
جو هبه وريما و قعدوا بعيد شوي عن ساره ..خايفين.. هبه اصلا من قعدت وهي تصيح!!
ساره ما هان عليها تزعل عليهم ولو انها تفلت في وجهي من القهر .. بس رحمتهم ..

**

" باريـــــــــــــــــس "

ابتهال راحت تحوس تشوف فيه حجز والا لا؟؟<< يا حبي لها
لقت حجز.. بس لـــ " باريس " نقعد فيها ليله بعدين نروح لــ " ميونخ "
ساره عصبت .. حفل الافتتاح بعد يومين .. تقول بيفوتنا << متحسفه ..هي اللي شاريه التذاكر
اما حايره في وادي ثاني .. قاعده تتخيل شكل الخثران بطقم المنتخب الجديد..
اما الحالمه ورهام قاعدين يسمعون اغاني بـ الاي بود حق هوبه ..
انا وريما مره مبسوطين بنرووح باريس نتسوق !!

.. الطياره ..

هوبه من الزعل نامت .. بنو برضو نامت ..
ساره قاعده تحسب كم باقي من ساعه على الحفل ..
.. انا قاعده اخرب عليها ..
رهام قاعده توصف واحد حلو شافته في المطار لحايره !!
مها الخبله نست تروح للحمام في المطار .. فقررت انها تروح لحمام الطياره وراحت معها
ريما << "دام الدعوه فيها حمام"
والباقين نايمين ..

..الاوتيل..

وصلنا الاوتيل حقنا .. و ساره مقفله علينا تقول : الحين تضيع وحده منكم ونبلش بعد !!
ما خلت احد يطلع الا بلو علشان تجيب لنا عشا ..
جابت لنا شاندويتشات بدون ببسي !! تقول ما ليقت ببسي عليه صوره ياسر ؟؟
..اضطرينا نشرب مويه من ثلاجه الاوتيل ..

.. انقسمنا طبعا على 3 غرف ..
اجتمنعنا في غرفه وحده نسولف .. قعدت الحالمه تسولف لنا عن تفاريس و عن قصه حبهم و مغامرتهم مع بعض و قعدت تغني الاماكن <<انا من سمعت اسمها وانا داريه ان الدعوه خربانه !!
قعدنا نضحك عليها و على استهبالها ..
قامت هوبه تجيب لها مويه .. قالت لها الحالمه : فيه عصير تفاح مره كويس في الثلاجه جيبي لي واحد على طريقك !!
راحت هوبه .. ورجعت هوبه ..
هوبه: ما لقيت شي ؟؟
الحالمه عصبت و قامت بسرعه للثلاجه !!
" طلعت الاخت مسربه الوسكي اللي في الثلاجه تحسب عصير تفاح "
حبسناها في غرفه لين نامت !!

من بكره جهزنا اغراضنا عشان رحلتنا لــ " ميونخ "
طبعاً ساره ما قصرت مقومتنا من الساعه 9 الصبح !! علشان ما نتأخر ..
بلو عجبها فطور الاوتيل و زرفت كم من خبزه في شنطتها ..


" الرجاء من الركاب ربط احزمه الامان استعداداً للإقلاع "



**

" الـــــــــــمـــــــــــــــــــا نـــــــــــيــــــــــــــــــــــــــا "

بنو مسويه فاهمه و قاعده تناظر فيلم فرنسي مهوب مترجم ..
وهوبه ملت منها ونامت ..
الحالمه قاعده تكلم " نجود " بنت خالتها من الطياره و ما بقي احد ما كلمته !!
الوقت مر بطئ مره مره
وساره على اعصابها

..

.. وصلنا بالسلامه ..
وساره ما صدقت على الله وصلنا ارسلت عفشنا على طول على الاوتيل و رحنا من المطار للملعب ..

..

الملعب انواع الزحمه .. بس مره وناسه وازعاج .. عاد احنا مو طويلات مره .. واللي قدامنا مره طواااال ..
و ساره من الفرحه تشيلنا دور دور لين جا دور بلو ..
قالت لها بلو : انا دوري خليه لمبارها السعوديه × تونس عشان يمديني اقز ياسر زين !!
.. لين رحمنا سكيورتي و حطنا قدام ..

بنان كنها احسن شوي من يشوفها في الطياره كنها مرشوشه بفليت << تعبانه
و في الملعب ماشالله مغير تصارخ و تناقز .. سبحان مغير الاحوال ..
بلو تصفر ..
و بش بش ما خلت كرسي ما صورت فيه ولا خلت سكيورتي ما صورت معه !!
و هوبه حايمه كبدها مننا و من ازعاجنا
و مها وفدى ورهام ياكلون فصفص << صدق سعوديات
ساره متشققه
وانا و بلو من الحماس جايبين شالات الهلال ..
هبه من الطفش نامت في الاستاد
و بلو من الحماس طقت " خشمي " بــ " كوعها "
و طاح " زمامي " !! ومها يا حبي لها هي اللي قامت تدوره معي .. طبعاً ما لقيناه !!
الزمام بكيفه المهم خشمي !!
بعد ما انتهى الحفل رجعنا الاوتيل و ساره حلفت تعشينا ..
بعد العشا هوبه وابتهال و ريما و الحالمه رقو ينامون ..
وبلو ورهام ومنال و باقي البنات قاعدين على النت
اما انا و حايره و ساره رحنا للمستشفى علشان خشمي!!
نسوي اشعه ونشوف وش فيها لانه انتفخ و طلع بنفسجي ..
جلسونا في الانتظار ..
جت الممرضه و قالت :
" عنود الغيد "<<ايه ترفقي بس
المهم رحنا للطبيب ..
الطبيب: what did you do with your nose ?
الترجمه : وش انتي مسويه بخشمك ؟؟
انا : I was playing with my friend ..
الترجمه : كنت امزح انا وو حده من خوياتي ..
الطبيب : Then ..??
الترجمه : بعديين ..؟؟
انا : And these is the result !!
الترجمه : و هذي النتيجه !!
الطبيب :I will see what I can do for you !!
الترجمه : بشوف وش اقدر اسوي لك !!
الطبيب : Ok
انا : Ok

حايره فاقه خشتها ما تدري وش السالفه ..
وساره تقول : اخلصوا علينا !!

سوينا اشعه و طلع فيه كسر خفيف .. جبسوه لي !! << وشلون مدري؟؟

..


رجعنا الاوتيل ولا كل البنات نايمين .. راحوا حايره و ساره كل وحده لغرفتها ينامون ..
اما انا فــ نزلت تحت للوبي حق الاوتيل و فتحت النت بلابتوب بلو << امووون
و لقيت امي على الماسنجر وقعدت اسولف معها و اقولها وش صار ..
مليت و جاني النوم بس خشمي يعورني ..

دخلت غرفه بنو وبلو و مها و قعدت اناظر التلفزيون عندهم لا ن غرفتي انا و الحالمه و ريما ما فيها تلفزيون ..
نمت عندهم على الكنب ..
قمت من بكره الساعه 7 الصبح مقومتني بلو علشان تلحق على الفطور حقهم..تقول يمكن يطلع زي حق باريس؟؟
رحنا تحت طبعاً جحدنا الباقين لانهم عيّو يقومون !!
قعدت انا على الطاوله و حطيت راسي عليها ..على بال ما تجيب بلو لي الفطور لان فيني النوم و خشمي يعورني ولا نزلت الا عشانها !!
جتني البنت منسبهه !!
تقول : غيدا تعالي تعالي ..
انا : وش فيه خبزهم بعد؟؟
بلو : خبزهم مره حلو بس تعالي ..
انا رحت معها .. ودتني للعصير ..
انا : بلو بسم الله عليك وين الخبز ؟؟
بلو : شوفيه هناك ياكل .."تأشر على طاوله في الكورنر"
مهوب غريب علي هالمقفى ؟؟ وين انا شايفته فيه؟؟
ما امداني افكر الا وهي ساحبتني ..
بلو : تعالي معي انا اعلمك مين !!
راحت خذت شوكه من طاولتنا و سحبتني و رحنا لهم ..
رمت بلو الشوكه تحت كرسي اللي انا مشبهه على قفاه << مشوااار
وقالت : اوووه آسفه ما دريت .."وخقت"
انا يوم شفت وجهه ..اعرف هالسكسوكه وين انا شايفتها فيه يا ربي؟؟
ياسر القحطاني؟؟؟
لالا مو معقول
وش جابه هنا؟؟"يا ماما هو عنده مباريات انتي اللي وش جابك؟؟"
..طيب هذا ياسر وعرفناه . مين هذا البثر اللي معه؟؟
وبينما انا غارقه في هواجيسي الا و بلو تطيح الميانه و تطقها سواليف !!
انا: اهلين ..<< بدري
هم : هلا
انا: هلا والله الكابتن ياسر .. يله شدوا حيلكم في المباراه الجايه و بيضوا وجيهنا
ياسر : انشالله ما يحصل الا الخير انتم بس ادعولنا << تسمعون ياسر اللي يقول موب انا!!
انا : ممكن سؤال؟؟
البثر : أي اكيد ممكن!!
انا : وين باقي اللاعبين؟؟
البثر: والله نايمين لسّا ما قاموا ..
انا : زين استأذن ما اطول عليكم ..باااي.." غمزت لبلو يعني قومي"
بلو من السباهه:باااي
انا رحت جريتها مع بلوزتها و طلعتها برى المطعم لا تتهور ..
في المصعد:
بلو بس تهاوش و معصبه
انا: اركدي يا بنت الحلال بتشوفينهم في المباره انشالله

..

دخلنا الغرفه ولا البنات "مها وبنو " على حطه يدينا ما قاموا..
راحت بلو بسرعه تقوم مها .. بس ما عطتها وجه ..
وراحت لبنان .. بنان بسرعه قامت تحسب ان عندها سالفه ..
يوم قعدت تسولف عليها و تقولها انها شافت ياسر ..
بنان تقولها : ايه ..صح صح .. ايه طيب << ما خشت مزاجها السالفه

وبلو تحلف لها وتقولها اسألي عنود الغيد ان بغيتي!!<< تنرحم

بلو ما خلت احد ما قالت له السالفه .. والله لو انها شايفه رونالدينهو؟؟

..

قرروا البنات يتغدون في الاوتيل عل وعسى يشوفون أي احد من اللاعبين ..
اما انا و نوره وريما و هوبه قلنا بتغدا برى لان غدا الاوتيل خايس "ما عقب فطورهم شي!!"

بعد الغدا البنات قعدوا يناظرون الداخل والطالع .. ملت منهم بشاير وراحت للرسبشن بزعمها الحين بتجيبهم ..

بش بش :hi << اللي يسمعها يقول عندها سالفه
الرسبشن : hi
بش بش :Do you know SAMI AL-JABER ??
الرسبشن : What ??
بش بش : No SAMI do you know YASSER?? ، No
الرسبشن : ؟؟ ؟؟
جت بنو ترقع لها
بنو : I want to ask about The Saudi football Team !!
الرسبشن : yaah ..they lived the hotel yesterday.. Iam so sorry..

.. بنو تشرح لبشاير..
دخلنا انا ونوره وريما وهوبه و لقينا البنات قاعدين في اللوبي ..
انا : وش عندكم هنا؟؟
ساره : ولا شفنا ولا واحد
انا : لاحقين تشوفونهم .. ولكم وعد مني انكم تشوفونهم و تسولفون معهم بعد ..
" ايوه يا غيدا المصيبيح "
البنات : والله
انا : أي والله بس خلونا نطلع ونشوف العالم ونتسوق ..

....

طلعنا و تسوقنا وشرينا لنا وللي يعزون علينا ..

رجعنا للاوتيل..
بنو كانت قاعده تقيس الملابس اللي شرتها وتوريني انا ومنال و بش بش و فدى ..
رن التلفون .. طبعاً فدى اللي قامت ترد كالعاده ..
بس هالمره كان الاتصال لي من السعوديه ..
انا : الوو
صوت من بعيد : اهلييييييييييييييييين و ش اخبارك يا وعه !!
انا : هلا بك ميين؟؟
.. : ..................
انا : ..... هلاليه وبكل فخر... ؟ ... ؟ ....
هلاليه وبكل فخر: أيه هلاليه .. كذا ولا كأن لك بنات عم تاخذينهم معك بس كذا تروحين ؟؟
انا : والله اني آسفه بس الظروف ما سمحت !! << اخس
هلاليه وبكل فخر: و كيف الجو عندك؟؟ ووش اخبار البنات ؟؟
انا: الحمدلله بخير ..
هلاليه وبكل فخر: ترى ريم عندي و تقولك اذا ما جبتي لها صوره وتوقيع احمد الصويلح ترى
بتنتحر !؟!؟!؟
انا : انشالله هذا اذا شفته ؟؟

طبعاً تعرفون سواليف البنات قلت لها كل اللي صار في السفر وش سوينا ووش ماا سوينا !!
طبعاً اكيد ان احنا كل يومين كل وحده لها دقيقتين تكلم اهلها بعدين يتسكر الخط << اخس يا فادي !!
وما راح فيها الا خالي (.........) ابو حايره لان حنا متقاطين في جوالها!!


المهم ما علينا
جابت لنا نوره تذاكر مباراه : السعوديه × تونس
بكره المباراه ..

**

"يوم المباراه "

.. بلو ..
.. ما خلت صوره لياسر في الرياض الا وجابتها ..
.. بنو و ساره ..
.. متقاطين في بوستر كبييير لسامي الجابر ..
.. مها و الحالمه ..
جايبين صور كماتشو و تفاريس << ليه مدري؟؟
.. هوبه ..
.. معها علم السعوديه ..
.. بش بش و رهام ..
ملونين وجيههم نص اخضر ونص ابيض
وروابي عيت تكمل تلوين تخاف يتوصخ باقي وجهها << ايه صح ما خلصت الالوان على جبهتها !!
.. ريما ..
جايبه ورقه كبر راسها كاتبه عليها " حمد المنتشري " << الحالمه جايبه لها صوره التمياط وقايله لها ان هذا المنتشري..
.. حايره ..
جايبه بوستر للخثران ..
.. فدى و نوره ..
.. جايبين صورتين لمحمد الشلهوب ..
.. انــــــــــــــــــا ..
جايبه صوره كبيره لــ ياسر والعنبر و عزيز و التمياط و كاتبه تحت .. احبكم كلبوكم..
و راسمه على الجبس اللي في خشمي سيفين ونخله ..

**

"الشوط الاول"


رحنا للملعب .. وهالمره شغلنا عقولنا و قعدنا قدام..
طبعاً ما فيه شال اخضر وابيض ما خذناه ..
و بلو قعدت جنبي << ما تتوب
دخلوا اللاعبين .. و غنينا معهم سارعي << شف الطموح

..

طبعاً بشاير ما قصرت هي وكمرتها .. وبلو جايبه كميرا فيديو بتصور المباراه كلها !!
وكل ما طاح ياسر قعدت تدعي على اللي مطيحه!!
انتهى الشوط الاول بتعادل سلبي 0/0


**


" بين الــشــو طــيــن "


.. هبه دقت صداقه مع وحده عربيه جنبها ..
.. الحالمه وراها واحد مملوح ودها تخمه ..
.. حايره وبش بش و فدى ورهام يصورون مع اللي يبيعون في الملعب "اللهم لك الحمد"..
.. ابتهال وبنو راحوا مع ريما للحمام ..
..بلو قاعده تزين شعرها ..
.. مها مطلعه صوره لكماتشو تتأملها ..
.. انا و سارهنسولف عن المباراه مع خشات من نوره ..
.. ومنال راحت تدور لها شي تاكله ..


**




"الشوط الثاني"


كأن اللعيبه السعوديين شادين حيلهم و متحسن أدائهم عن الشوط الاول..
وبالفعل اثبتوا تفوقهم بكره عاليه جميله من خالد عزيز لتصل الى محمد امين الذي بدوره نقلها للشلهوب و بكره عرضيه من اقدام الموهوب لتصل الى رأس الحارثي الذي وجهها للمرمى لتصطدم بالعارض الايمن لتعود مره اخرى للشلهوب الذي ضبطها للقحطاني.. وبتسديده رائعه على الطاير من اقدام القناص لتعانق الشباك التونسيه ..
.. و قنصنا القناص بسهامه ..

طاحت بلو من الفرحه على رجليني .. وبدون شعور دفيتها<<الله من زين الصديقه
و قعدت اناقز من الفرحه .. وبلو يوم شافت محد معطيها وجه قامت تناقز معنا ..
و من الفرحه ما بقى احد ما خميته حتى ذاك المملوح اللي خاقه عليه الحالمه رحت خميته !!


حاول المنتخب التونسي ادراك التعادل بأكثر من كره خطره ولكن ما يلبثوا ان يخترقوا الدفاع في بعض الاحيان و بصعوبه حتى يجدوا في حراسه المرمى الدعيع واقفاً لهم بالمرصاد..

وكان حائط الصد الدفاعي المنيع سلاحاً فعالاً << لا تتحمسين تكفين!!

اعلن حكم الساحه السويدي ..((نحتفظ باسمه لدواعي امنيه)).. نهايه المباراه بفوز المنتخب السعودي على نظيره التونسي بهدف دون رد .. احرز الهدف السعودي .. مهاجم المنتخب الوطني ونادي الهلال السعودي ياسر القحطاني ..
(( بدايه الالف ميل .. خطوه))


من الفرحه ما طلعنا من الاستاد ..
قلت للبنات تعالوا معي ..
رحنا بسرعه لغرفه ملابس اللاعبين .. طقيت الباب .. محد رد ..
فتحت الباب ما لقينا احد .. رحنا بسرعه لموقف الباص حقهم ولاهم توهم بيحركون ..
رحت بسرعه .. طقيت باب الباص << ابوك يا الميانه
فتح لي واحد مهوب غريب .. هذا البثر اللي كان مع ياسر ذاك اليوم ..
انا : السلام
البثر : وعليكم
انا : عادي نروح معكم << براءه
هو : اكيد ..
انا : بس لا توهق عمرك معكم باص ثاني ؟؟
هو : ليه ؟؟
انا : لاننا 15 بنت!!
هو: لاعادي اصلا نص اللاعبين سابقيننا على الاوتيل ..
انا : اوكي ..

..





ركبنا .. الباص كان فيه : سامي – ياسر - سعد – كريري – الصويلح – نور – العنبر – و ذاك البثر !!

بلو ما خلت سالفه ما قالتها لياسر القحطاني
و حايره ضايق صدرها الخثران سبقنا على الاوتيل ..
ساره حاجره محمد نور في زوايه و تهزءه
طبعاً انا صورت مع الصويلح واخذت توقيعه لا تنتحر بنت عمي .. والله ريم تسويها !!
بنو ونوره و فدى وريما قاعدين مع سامي مدري وش عندهم
و هوبه والحالمه و مها و ابتهال و بش بش و رهام يلعبون مع كريري و سعد الحارثي "انسان حيوان نبات جماد " # " للمعلوميه خط سعد الحارثي شين!! "

اما انا سحبت منال و قعدنا مع محمد العنبر و ذا البثر ...
ايه على فكره البثر طلع اسمه خالد مدري وش قصته بس الوكاد ان ابوه كااش ومخليه يرافق المنتخب الى المانيا << الظاهر انه حق موبايلي ..

عزمونا على المباره الجايه بس رفضنا بأدب لان رحلتنا بعد 3 ايام و لا قدرنا نمدد لان الخطوط مزحومه !! والفنادق مليانه ..

هوبه تسمع البنات يقولون نشوفكم مره ثانيه .. يقالها بتقرب هالمره الثانيه ..
هوبه : نشوفكم بعد 3 ايام انشالله ..
عطاها سامي نظره اليمه ..
جت الحالمه ترقع ..
الحالمه : لا يعني و معكم الكاس !!

" ختام "

((نشوفكم مره ثانيه .. بعد "اربع سنين" ..)) << هذي وداعيتنا لهم
بعد اربع سنين؟؟
-ولكن-
بدون سامي .. بدون الدعيع .. وغيرهم من الابطال الذين سيعتزلون الملاعب..

هل –ستنجب- الملاعب السعوديه امثالهم ؟؟
نأمل ان نرى مواهب جديده ..

ونأمل ان نرى محمد الشلهوب و ياسرالقحطاني وسعدالحارثي و غيرهم ..
مرتين وثلاث واربع .......
في هذه –الاحتفاليه-العالميه ..

.. بالتوفيق للاخضر في المانيا ..

واتمنى من الاعبين على الاقل..
الاستفاده باللعب بجانب –اشهر- اللاعبين الاوربيين ..
فأنا لا اطلب –الكأس- !!

فالمطر لا يتساقط -دفعه واحده-
فبدايته قطره..
وكما -تحفر- قطرات المطر..
الحجر..
-بحرفيه- و تأني على مر الزمن ..

اريد بنفس –الحرفيه- وبنفس التأني ..
ان –يحفر- ابناء الوطن اسم الوطن
في –اذهان- كل من اراد ان يستمتع بمباراه كره قدم ..
و اريدهم ان يربطوا
الشرف و العزيمه و الاصرار و الروح الرياضيه
برباط –وثيق- ..
رباط يتبع اللاعب السعودي اينما كان..
**
اتمنى ان القصه اعجبتكم .. والله انه احنا ننرحم ..
ياعيال والله انكم في نعمه .. والله لو اني ولد والله لأحظر كل المباريات حتى مباريات النصر ..
ملاحظه : 50%من القصه واقعي 50% مبالغات
**

انتظر ردودكم و ارائكم .. و تبرعاتكم !!
ودمتم ...