سلملللللللللللللللم من الاخر تراني فاشله في البدايات مثل موضوعي الاول اخذ تنسيق على طول بس انين تقول ثاني موضوع لك بثبته و بحطه بالمنصه على طول --< نكبه عشان هيتس شطحت اليوم الاول الدراسي وسدحته اليوم طبعا مو من حب العين بالبصل بس عشان صفحتي الدراسيه حدها سودا اول يوم في المدرسه حتى وانا ما ادرس يهيض علي المشاعر ايه وربي ان عندي مشاعر لان انا تربطني بالمدرسه علاقه طرديه لانه دايم يطردوني من المدرسه يا جيبي امتس يا جيبي ابوتس يا اندزلعي اقعدي بالبيت ثلاثة ايام لان انا درست بالعصر الجاهلي ايام العصا ما يلعب ما غير فرش بكل حصهمافي حقوق طلاب مثل اليوم اتذكر اول يوم في الابتدائي توسدت شنطتي ورقدت كانت ايامها صقيع مهب بس برد والبنات يصيحون ما في احد يلعب --< يا عين ابوي بس الموهيم يوم قمت وش الدنيا تفافيخ والعاب وحلويات لا وهنيي رحت العب وضيعت شنطتي اقسم بالله مدري وين راحت ماهو الا من صغرها بس --< طعسه يوم كبرت شوي يمكن صرت ثاني ثالث صرت اطلع اشاعات مره طلعت سالفة الجني بالمدرسه يا انها هبلت فيهم ذا السالفه حتى انا بعدين تراوا لي انه صدز--< يا بثري ومره طلعت اني بنت الملك بس احط جمب جدي سعود آل ووناسه والله يا اني كنت حاطه فصلنا في جيبي لين ما كشفتني الابله وجابو امي وقالو بنتك وش تونس به بس ما شاء الله عليها اميمتي مهيب هينه قالت الا ابوها ملك ونص وهي بزر وش تحيط --< يا حبني لتس يمه يعني صراحتن ما كنت لم الدراسه ابد ومن يوم بداء الكرف جد ومواد دسمه انا ضعت صراحه بس الحمد الله صيطرت على الوضع اي بالله كانت منيب حاطه غير دفترين واحد لرياضيات لان ابلته كانت قلش تفتش كل يوم ما يمديني ما اجيب واحد للمواد كلها الابله حسب المزاج --< لا احد يقلد مره كنت فاشله بالابتدائي بس عمري ما رسبت صح ما كنت من الاوئل بس اقل من جيد جدا ما قد جبت كانو اهلي يجاكروني با اختي الي اصغر مني كانت غير الاول والثاني ما تاخذ بس ولا كان على بالي اهم شي وناستي طلعت للمتوسط وكانت شي ثاني من احلى ايامي صار عندي شلة وسع صدرك عربجيات غير شكل اذكر اول يوم لي فيها كان نكته ويا هو سوى لي سمعه كنت فيها اول مره البس عبايه على الراس واتغشى لا وبعد قفازات الموهيم عاد يوم نزلت من السياره صكيت على عباتي الباب والسواق مشى ما درى عن ارضي وانا اركض جمب السياره ابا افتح الباب او ينتبه لي ما ادري با ايش افكر عاد بواب المدرسه هو شفني ولا ما شافني الا وقف وقام يصيح ارجعي يا بنت ارجعي يا بنت بعدين حط رجله ولحقني وهو يقول البنت شردت البنت شردت قسم بالله نفسيه خوفني بعدين الله تاب علي ووقف السواق وفكيت عباتي عاد من قدي شهره على اول يوم البنت التي بغت تشرد --< مالت على الي ماله طاري كنا من شين السمعه الابله الي كانت تبي تدخل عندنا لازم تتحصن عشر مرات الا ما نكون مسوين لها شي مثل مره مسكت الطابشور ولغوستها بالفقس الله لا يوريكم قامت قيامتها ذاك اليوم قامت وحده من البنات علمت علي وفصلوني ثلاث ايام بس شلتي ما قصرن يا هن هبلن فيها يخفون اغراضها ويخلونها لين تروح ويشقون واجبها اخذنا ذنبها الله يسامحنا مير الفتنه اشد من القتل واذكر كان عندنا ابلة علوم من شرها نعتينها با ابو جهل ما تمر حصتها الا ونص البنات الي واقفه وراء والي براء والي با الاداره مير وين تنحب الدراسه وهذا حالنا الموهيم من كثر الشكاوي جابو موجهه ما ادرينا بالسالفه الا يوم دخلت والا الابله وش حلوها من خفتها مايندرى هي تمشي ولا تطير مير قلنا الهادي الله الا عاد يوم شفنا الموجهه عرفنا السالفه ويا هي تضحك مع ذي وتصحح الخطا لذي عمرها ما سوتها ولو بلغلط قلت وراء حد حد النفسينه زينه ما اتميلح معها الموهيم قلت ابله ممكن سؤال قالت تفضلي لا يقعد شي بخاطرك قلت بس تكفين يا ابله لا توقفيني رجيلاتي للحين توجعني من وقفت الاسبوعين الي راحو --< نذله مير الله لا يوريكم طلعت الشيب برموش عيني طول الترم ما جلست لها حصه ومره كان عندنا جغرافيا ابلته مرررره غثيثه وكانت المديره مجلستني قدام عشان حركاتي تكون مكشوفه الموهيم حطت الابله ذي دفتر التحضير قداي بعدين نادتها وحده من المعلمات وراحت انا اخذت الدفتر بسرعه وحذفته تحت برادة مويه من الكبار الحديد ---< الموهم دورت راحت جات جابت الاداره لفصلنا فتشونا تفتيش انا كبو شنطتي كلها دورو تحت كرسيا بدورو بجيوبي وبشعري بعد انا صراحه اول مره خوفوني واشوا الي ما احد شافني وربي كل وحده طالع لها قرون والشر معها عاد صرت اقراء وجعلنا من بين أيديهم سدا ومن خلفهم سدا فأغشيناهم فهم لا يبصرون عاد خير من ربي يوم ما كشفوني عاد الثانوي كانت سنه وحده وهي الي بعدها ندمت كثير يمكن صابتني دعوه من الي اذيتهم ويمكن من شر اعمالي في اول يوم لي فيها تضاربت او ووحده من البنات ويا هو تكفيخ مير السالفه هايفه دعستي على مريولي ودفيتيني وما يمديكم على تهاويل البني مير عاد فصلوني ثلاث ايام وما امداني اتهنى بالثانوي السنه الاولى مدري كيف مرت والسنه الثانيه دفتني وحده من البنات مع الدرج وطحت وتكسورت وانعثرت بالبيت ولا عاد كملت جتني سدت نفس مير السنه ذي سجلت انتساب وبدرس منازل امي تقول ما لي حيل اروح للمدرسه كل يوم اتوقع لو كنت ادرس على النظام الجديد الي هو انه الاولويه لطالب ما كنت راح ازعج احد او اهبل با احد اسلوب التدريس كان زفت لا جديد نفسيات الابلات مثل الاسهم كل يوم شكل وذاكان ينعكس على البنات الموهيم الزبده --< اهم شي تتوقعون لو الجيل القديم هو الي الحين كان بيبدع ولا بيسوي سوات ها الجيل ولا بيبدع فوق ابداعه القديم <<-- يقالك انك ابدعتي اي وربي ابدعت اقلها كنت انجح من غير لا اذكر وذا انجاز في الختام يا انين ترى الموضوع يحمل هدف جدا سامي --< سامي ولا ياسر ويقلب في صفحات الماضي ولا ما شفتي برمضان برنامج اكثر من اسره وكذلك يعبر عن مشاعري الي هيضتها اول ايام لدراسه وعشان اخبر ها الطلاب والطالبات اش كثر هم محضوضين كونهم يدرسون وان الايام الي تمر عمرها ما ترجع فيخلون لها ذكرى حلوه ازين لهم ويا تسبدي انتي كانك ما ثبتي الموضوع لا تحذفينه --< اختاري بس واشكر كل من راح يقراء موضوعي ويرد عليه واشكر كل الي ردو على موضوعي الي تنسق ويعطيهم العافيه وعام دراسي ممتع للجميع