. عادات أهل الحجاز ! " المدينة المنورة " عندنا احنـا متعة لمن يجيبو سيرة الزواج .. ترتيبات تستمر لفترة طويييلة ! ~* أول شي : يدقوا أهل العريس "أم العريس " على " أم العروسـة " و يكون معنى الكلام احنا حابين نطلب يد محروستكم لولدنا فلان الفلاني اللي يشتغل مدري فين .. الخ ! يعني تفاصيل الولد تجينا جاهزة من عند أهلو ، بعد كدا تشاور ام العروسة أبوها و يبدوأ يسألو عن الولد و أخلاقو و سمعتوا بدون ما يخوضوا في تفاصيل مالها داعي ! بعدها بكم يوم ترجع ام العريس تتصل مرة تانية و تحدد موعد الشوفة الشرعية .. ~* يوم الشوفـة الشرعية : تكون غالباً بعد صلاة العشـا .. بحضور العريس أم العريس أخت العريس عمته الكبيرة و خالته الكبيرة و ستهم اذا وجدت ! في بيت أهل البنت يكونوا موجودين ابو العروسة .. أمها.. أخوانها خالاتها و عماتها كلهم ! يدخلوا أهل العريس مع خالات العروسة و عماتها في مجلس الحريم و يدخل العريس يجلس مع ابو العروسـة و أخوانها و يتقدم لهم عصير و طبعا طوال الوقت دا العروسة في غرفتها جالسة على اعصابها خخخخـ ! بعد كدا يجي ابو العروسة يدخل على بنتو و يدعي لها و بعدين يمسك يدها و يطلعها للصالة اللي فيها العريس و أخوانها و يجي العريس و يمشوا سوى للمجلس اللي فيه الحريم ، تدخل العروسة و تسلم على اهل العريس و تجلس معاهم شويه بحضور الولد و بعدها تقوم تصب القهوة و تجلس تاني و يخلوهم فترة 10 دقايق لوحدهم يصير بينهم كلام ، واذا البنت دخلت مزاج الولد وسرقت قلبه يلبسها .. ( اسورة أو تعليقة و سلسلة أو ساعة ألماس ) و يكونوا أهل العريس جايبين معاهم بوكيه ورد كبييير و حلاوة و بعدها يتوكل الولد على بيته ! ملاحظة : اغلب الأولاد ما يلبسوا البنت اذا ما عجبتهم ، فيعني اذا لبسك يعني ان شاء الله الموضوع مستمر ! ~* بعد يوم الشوفـة : بعد الشوفة بيوم او يومين بالكثييير تتصل ام العريس وتقول عبارة ( مبروك ما سوينا لأولادنا ) و هنا يجير رد أم العروسة اذا موافقين ولا لأ .. اذا موافقين خلاص تطلب ام العريس رقم أبو العروسة عشان يصير كلام بين الرجال ! بعدها بكم يوم يتصل ابو العريس و يحدد مع ابو العروسة يوم يسموه ( قراءة الفاتحـة ) .. ~* يوم قراءة الفاتحـة : تكون بعد صلاة العشاء في بيت أهل العروسة و يكونو موجودين اعمامها و خوالها و أولادهم و أرحام أهل العروسـة .. يتسقبلو فيها أهل العريس ( ابوه .. أخوانه أعمامه و خواله ) و بعد وصولهم بحوالي ربع ساعه يقرأ أخو العريس ما تيسر من القرآن و من ثم يجي أكبر اعمام الولد و يقول يسعدنا و يشرفنا نطلب يد بنتكم الكريمة لولدنا فلان الفلاني على سنة الله و رسوله نتمنى منكم قبول نسبنا ! و يجي رد من أكبر اعمام أهل العروسة نسبكم مقبول ان شاء الله و على هذا الأساس الفاتحة و بعدين يقرو الفاتحـة و يقوموا على العشا ، يتعشوا و يتوكلوا على الله !.. طبعاً بعد دا اليوم خلاص البنت تعتبر مخطوبة رسمي بالكلام لمدة تقريباً شهرين ، خلال دي الشهرين يحددو موعد للملكة و موعد للشبكة !.. ~* يوم الملكة : غالبا يكون قبل الشبكة بشهر أو في نفس يوم الشبكة ، تكون في الحرم بعد صلاة المغرب بحضور أهل العريس وأهل العروسة و أحلى ما فيها التصوير بالفيديوفي الحرم و توزيعات التمر و شوكولاته التوزيعات على أهل العروسـة و غالباً تكون من شوكولاين و لا باتشي ! ~* يوم الشبكـة : تكون كبيرة في قاعـة " رجال و حريم " تكاليفها بالكامل على أهل العروسـة !.. في نفس اليوم و بعد صلاة العشاء مباشرة ينزف العريس زفـة حجازية ( خطيب و مجيب + الجسيس ) في الشارع قدام باب بيتهم و رقص و خبال و بعدين زفـة من بيتهم لين القاعة و الأغراض اللي يجيبوها معاهم من عربية و صندوق و طقم الشبكة والدبل .. الخ تنزف معاهم ! دي تقريباً فكرة العربية .. شوفوا الصور محتويات العربية ( عوده .. مبخرة .. مصحف .. عطورات .. شوكولاته .. جنيهات فضـة و جنيهات ذهب .. علبة فيها المهر .. طقم الشبكة و الدبل ... الخ ) تشريعة العربية و تزيينها يكون على حسب لون فستان العروسـة ، و تنحط في الكوشـة أول ما يوصلوا القاعة .. الفيديو دا يوضح فكرة الجسيس و الزفة للعريس أكتر ( ) .. و في الشارع زي الموكب لأهل العريس و طيط طاط وطوط < صوت البوري .. لحد ما يوصلوا القاعه ! و خلاص تتم الشبكة كأي مناسبة عادية لين وقت العشا و بعد العشاء يبدأ عند الرجال الطرب و الرقص لآخر الليل !.. ~* فترة الملكة : عندنا مسموح يزورها و يخرج معاها يتعشوا و يتسوقوا و يجهزوا بيتهم مع بعض .. .. الخ ! على قرب الفرح في شي عندنا اسمو غُمرة !.. ~* يوم الغمرة : من اروع الأيـام عند العروسـة ، تلبس فيها اللبس المديني و العريس يلبس ثوب بدون ما يحلق ذقنه عشان تطلع له طله يوم الفرح .. الغمرة غالياً قبل الفرح بأسبوع أو قبل الفرح بيومين برضو تكون في قاعه و التكاليف على أهل العروسـة !.. صورة للبس المديني الشعر ينقسم بالنص و يتلف على قطعة من الفضـة زي ماهو موضح ، و تغطي و جهها باللؤلؤ الخالص و تحط بس كحلـه خفيييفة و ما تكشف و جهها أبدا عشان الطله ليوم الفرح تكون أحلـى !.. تنزف على كراسي صغيرة و يسندوها اثنين من اليمين و اليسار ، و تكون الكوشـه قديمة نخل و ورد مديني و طايفي و حركات خفيفة !.. وترى اللبس مرررررة مرررررررة مررررررة تقيييييييل !.. ~* الزواج ترتيباته على الكل ، الكوشة و ديكور القاعه يكون بإختيار من العروسة و أمها و العريس و أمه و كمان عندنا تكاليف الفرح كااااااااااااملة بالنص بين أهل العريس و العروسة، و كمان عندنا طرب عند الرجال في يوم الفرح .. ~* الله يتمم للكل على خير ، و عقبال اللي ما انكتب نصيبهم يا رب !.. معليش طولت مع الحماس اللي جاني .. ~* .