السلام عليكم ورحمه الله وبركاته
اول موضوع لي اتمنى انكم ماتردوني
وانتظر ردودكم
المهم مااطول عليكم هذي قصتي بالبر
في يوم من أيام الشتاء القارص
قال ابوي جهزوا أغراضكم ترى باتسر من الفجر بنروح للبر
المهم وتقوم وتقطع البصل وتحطه بطابوق من السنع
لا وناويه تقطع طماط بس الله ستر ومالقت الطماط الظاهر انه مخلص0
وبمساعده جمعا من المواطنين اللي هم أخواني الثلاثة تم تجهيز أد وات البر بحمد الله ورعايته 0
همن نروح نخمد بغرفنا وذلك تنفيذا لكلمه ابوي اخمدوا في مراقدكم ولايذن الفجر إلا إنكم قايمين ((أن شاء الله يا بابا))
المهم وجا الصبح طبعا القش مركب بالسيارة كما قلت سلفا
ما علينا الان نقوم ونركب بالسيارة
أقوم أنا والبس من خلا قين الشتاء قلت ايه بر ولااحد جاي واقوم اخلقن تسني فلسطينيه شال على قميص على بنطلون <<تعرفونن خلاقين الشتاء
لا وجزمه البر البسها بدون مااكلف على نفسي وادنو عليها لتربيطها<<<<خخخخ يمديكم على اللغه اذكروا الله
المهم ونروح في طريقنا للبر و نمشي يوم وصلنا حول الثمامه قالت امي/يووووة نسيت اقولك <<تقصد ابوي
ترى ما عندنا طماط
قال ابوي الأمر سهل ونوقف عند المحطة وندور طماط صار ما عندهم ونمشي شوي ونوقف عند سيارة مالقينا عندهم طماط
المهم قالت امي وشلون نصلح غدانا
وحنا واقفين دقت خالتي/قالت وينكم فيه
قلنا بنروح للبر تسانتس بتلحقينا قالت/طيب
اشوى ان رجلها ماعطاها وجه وقالها صلحي الغدا وقري في بيتس<<<تبون تعرفون ليه بعد شوي تعرفون
قالت أمي اجل امسكوا الجوال دقوا على خالتكم الثانية وخلهم يلحقونا للبر قلنا اوكي<<وش حليلنا نسمع كلام ماما وبابا
وندق عليها ونلقاها نايمه قالت بشوف زوجي إذا وافق ومير المسيكينه يكسر بخاطرها ويقولها اخمدي بس بللا بر بلا خراط فاضي وتخمد الضعيفة بحفظ الله ورعايته<<وش جاب هالكلمه مدري خخخخ أشوى أن رجلها ما طار بالعجه وقالها اخمدي <<< ونكرر بعد شوي بتعرفون
المهم ترى الى الحين مالقينا طماط<<<شايلتن هم ذا الطماط تسنها بتصلح الغذا هي خخخخخخخخخ
ونرجع لمحور حديثنا يوم وقفنا عند راعي السيارة لقيناة يبيع حطب وعبري وشرينا منه ونمشي ونلقى السيارة اللي حوله تبيع طماط وش زينه ونأخذ لنا منه ونكمل المشوار الى البر
ونمشي ونمشىىىىى ونتعدا دوار العويضه اللي بالثمامه
ونمشي ونمسك خط مدري وش اسمه هذاك الشارع اللي تسنك بتروح للفروسيه<<تسن أحد سألها
المهم ويوم مشينا وحنا طربانين مع ابو نورة ومقطوعته المشهورة
السيل ياسدرة الغرمول يسقيتس
ونسولف ومرتن نرقص
وقنا يؤ يؤ كن هالشارع خط الاحساء مدري وش قلنا
ويقول ابوي على طاري الشرقية وش رايكم نتغدى بالشرقيه وميرنمسك خط الشرقيه ؟؟؟؟؟؟؟؟؟وسط صمت وذهول
قام ابوي ودق اشارة ولف مع المخرج اللي يودي للشرقيه احنا نحسبه مقلب يختبر ابوي ذكائنا فيه إلا المسأله من جد يوم شفنا المسأله جد قام كل واحد منا يغني على ليلاة
انا قلت يوووووة كل يوم اجيب شنطه الكاميرا والشاحن واليوم ما جبت شي يوووووة
اختي تقول//يوووة لبسي يفشل<<الأخت الكريمة لابسه بلوزة بجامه على بنطلون جينز و بوت اسود <<<كما قلت سابقا خلقنه الشتاء
والعنود لابسه وكااااااشخه بس في الأخير لابسه نعال أم حديجان حقت الشتاء
وكل وحدة تتذكر لمى تقول خسااااارة لو أنى ماكبيت شنطتي عقب الأستراحه فيها مشط ومكياج وكلش
للمعلوميه ترى حتى مشط مامعنا <<
وفي هذة اللحظة أقوم بعمل جمارك على شنطتي واشوى لقيت فيها مشط وكريم اساس وكحل ونقوم بعمل احتفاليه صغيرة بهذة المناسبه <<<خخخخخ يمديكم
المهم وفي الساعة التاسعة صباحا وخمسه وعشرون ثانيه وست دقائق تعلن بالسيارة حرب صغيرة بين اثنين من اخواني على اثر هذة الحرب يقوم ابوي ويغلق مسجل السيارة غاضبا ويقول مقوله المشهورة:: بستكتون ولا نرجع للرياض
على طول قلنا ايه ايه نبي الرياض
ويقوم ابوي يسفهنا ويطول على ابو نورة ( معبد حمدو)
وكما قلت سابقا كلن يغني على ليلاة
امي تقول يوووة ماجبت علاج لأخونكم
وكما عودنا دائما وابدا عبودي على حركاته الاستهباليه
صار معه غيار لملابسه لابس بلوزتين وحدة شتاء واللي تحت صيف وقام وفصخ الشتويه ووصفطها عشان ماتتسوسخ
ونرجع نكمل كلن يغني على ليلاة
اختي الصغيرة تشوف الطريق تحسب ان ابوي الى الحين يدور مكان ماسكه ألعابها حقت الرمل<<<ياحبي لها
تقول بابا خلاص وقف هنا أبى العب
<<<<<<للمعلوميه هي الوحيدة اللي حيه قلب ومعها ملابسها كلها
ونكمل مسيرتنا للشرقيه وبدال الغدا وقفنا عند محطه وشرينا برينقلز وتسالي وبيبسي والخ00000
ويوم قربنا نوصل للشرقيه ونرسل لغادة بنت خالتي رساله
نقول فيها((ترقبوا جمس الفين وثلاثه في الخبر محملين قشهم على انهم بيروحون للبر ومسكوا خط الشرقيه ترقبوهم هنا عندكم ولا عليهم الا خلاقين البر ولا معهم شواحن))
ونقعد شوي وترد علينا تقول الخلاقين والشواحن عندنا
المهم وعلى طول دايركت البحر ونصلح غدانا عندة بدال مانتغدى في البر تغدينا عند البحر