إعداد :
بنت الخيال ، عـ20ـبودي .
تصميم :
V I O L A
عرض في برنامج " صدى الملاعب " الذي يعرض في قناة Mbc
اليوم الثلاثاء ليلة الاربعاء الموافق 9-6-2010 / 26 -6- 1431
الجزء الثاني من لقاء مع الكابتن ياسر القحطاني من باريس عاصمة فرنسا
الذي تحدث عن رأيه في خالد عزيز و محمد الدعيع و عن عرض نادي النصر
و الاحتراف الخارجي و عن الموسم الماضي مع الهلال و الجماهير الهلالية
و كأس العالم و استعداده القادمة وعقب إعلامي الرياضي " فهد خميس " على كلام القناص .
و الحلقه كانت من تقديم : مصطفى الآغا .
و يسعدنا نقدم لكم ما يخص الكابتن
" ياسر القحطاني "
:: نص اللقاء الكابتن ياسر القحطاني ::
ياسر : الجو اللي كان مهيأ لي سواء كان عائليا أو حتى الجو الجماهيري , جو النادي
كان كله يساعد على ان ياسر يقدر انه يرجع ويهز الشباك أكثر من مره والحمدلله رب
العالمين انهيت موسم أنا أعتقد إنه مرضي إلى حد ما , هناك المزيد
ولازال هناك المزيد ولكن إن شاء الله , أكل العنب حبه حبه .
المذيع : أبدا ماعندك أي فكر في الإنتقال لأي نادي محلي تحت أي ظرف ؟
ياسر : شوف أبداً أنا من ناحيه الأنتقال إحنا في عصر إحتراف وعالم إحتراف وأنا
أعتقد أنه أي احد يتكلم أنه انا مستحيل أنتقل أو من غير أي سبب هذا مارح يكون
يعني معاصر للإحتراف اللي احنا فيه , لكن أنا أتكلم معك مبدئياً أو منطقياً بموضوع
أن أنا موقع عقد جديد مع نادي الهلال مدته أربع سنين قادمه , فـ معناته أنه خلاص
يعني "يوم شاب ودوه الكتاب" زي مايقولون ولكن أنا أولاً فخور جداً وأحمد ربي يعني كل يوم
على إن أنا تشرفت بإني أرتدي فنيله نادي الهلال خلال عقدي للـ 4 سنين هذي , ممكن يجيني
عرض خارجي يتوازى مع كل مايبيه النادي أ وأنا أو مين ما كان ويقبله النادي وأقبله أنا
يعني ممكن , لكن زي ماقلت لك لازلت مرتبط مع الهلال فهذا كل شي رح يكون بإذن الهلال .
المذيع : وجود الدعيع في دوري أبطال آسيا ضروري جداً بالنسبه لكم ؟
ياسر : محمد الدعيع تاريخه يتكلم عنه يعني ولاهو بياسر اللي بيتكلم عن تاريخ محمد الدعيع
أو إسم محمد الدعيع أو ماقدمه محمد الدعيع للكره السعوديه أو للهلال , أكيد إن محمد وجوده
يعني لو حتى كان بالتليفون مهم , محمد لاعب كبير وتأثيره على اللعيبه بشكل كبير, أنا بتكلم كلمه
بصراحه خالد عزيز يمكن أنه غاب أوأخطا ماعلينا من الكلام هذا يمكن الكل خاض فيه لكن انا
أشوف خالد عزيز الموسم هذا أكثر إنضباط أنا شفت خالد عزيز فيه في حياتي يعني من يوم
عرفت خالد عزيز, واللهي أحنا حرمنا أنفسنا يعني بعد صراحهً زي ماتشوف بدال
مانا الحين قاعد هنا كان المفروض إن أحنا نستعد لكأس العالم لكن قدر الله وماشاء فعل أولاً وأخيراً
وزي ماقلنا وخضنا كثير في الكلام هذا ان الموضوع حصل وإن شاء الله إنه يكون كبوه جواد
أهم شي اللي راح نستعد فيه إلى كأس العالم 2014 لكن الأغلبيه للأسف دائما ماهم صار
الإعلام بالنسبه لهم مهنه من لا مهنه له وصار نظامهم خالف تعرف علشان أبان
وأظهر في الصوره هذا غلط يعني إحنا نتكلم على شي مصلحه عامه يعني لو
إحنا نتكلم على أنديه ياأخي كل واحد يتكلم براحته لكن إنت تتكلم على منتخب
المفروض تقف في صف المنتخب وتحاول إنك إنت تدعم بكل ماأوتيت من قوه يعني
إستخدم قلمك في مافيه مصلحه المنتخب موب أي وقت , بيسيرو أول ماجاء نفس الأقلام
اللي قامت تسبه كانت تمدحه وتمجد فيه .
المذيع : ياسر القحطاني ظُلم من قبل الإعلام ؟
ياسر : لا .
المذيع : ماظلموك أبداً ؟
ياسر : ماأنتظر أصلاً ينصفني عشان أنتظره يظلمني .
المذيع : طيب سامي الجابر يقع في المكان المناسب , حديث إعلامي كثير
بأنه سامي الجابر عنده بعض الخلافات مع اللاعبين ؟
ياسر : سامي الرجل المناسب في المكان المناسب في الوقت المناسب .
المذيع : عبدالرحمن بن مساعد كان يعني ألمح وأكد بأنه كان من الممكن لو ماتجاوزتوا
ووصلتوا إلى دور الـ 8 في دوري أبطال آسيا كان ممكن يمشي ؟
ياسر : الله يخليه لنا بس .
المذيع : طيب المحطه , التفكير القادم بالنسبه لـ ياسر فقط هو
دوري أبطال آسيا , كآس آسيا مع المنتخب ؟
ياسر : والبطولات المحليه , أكيد انه أهتمامي بيكون في بدايه بطولات الموسم القادم
هي البطوله الآسيويه , آكيد إنه يكون تركيزنا آكبر ولكن أيضاً البطولات المحليه لها الأهميه
لأنها هي اللي توصلك للمراحل هذي وهو Record ( تسجيل ) يعني History ( تاريخ ) للآعب .
المذيع : أقدمت على شي هذا الموسم ندمت عليه ؟
ياسر : أبداً الحمدلله رب العالمين ماندمت رغم إني مسوي
عمليه بس إني ماندمت يعني .
المذيع : علاقتك مع جمهور الهلال لم تتغير لم تتبدل , واثق من إنك دائماً
تبقى في نظرهم اللاعب رقم واحد ؟
ياسر : واثق إني دائماً أكون في قلوبهم إن شاء الله .
:: نص تعقيب الإعلامي " فهد خميس " ::
المذيع مصطفى الآغا : هاه فهد شايفك تتطلع في الإهتمام ؟
المحلل فهد الخميس: إيه يعني حديث شيق وحلو يعني ودائماً ياسر يعني من الناس الي .
فقاطعه المذيع مصطفى الآغا : عم يعطي كثير للإعلام !!
المحلل فهد الخميس : والله هو يعني يتكلم وكلامه في مكانه الإعلام يكون .
فقاطعه المذيع مصطفى الآغا : هل الإعلام فقط مهمته يمدح ولا مو من حقه ان ينتقد ؟
المحلل فهد خميس : أيضاً ينتقد ويقول السلبيات لاكن اعتقد أيضاً أن الإنتقاد أيضاً يكون في وقته المناسب.
المذيع مصطفى الأغا : هل الإعلام مهنه ملامهنه له هذي الأيام؟
المحلل فهد الخميس : والله إحنا مانبغى نِعم يعني لاكن فيه بعضهم صراحة محسوبّي
على الإعلام صراحة خلنا نتكلم بصراحة فيه بعضهم لا بالعكس أقلامهم نزيهه وشريفة
ويتكلمون بـ كلمة الحق وينتقدون في وقت الإنتقاد .
المذيع مصطفى الأغا : لما كنت كـ لاعب هل تتأثر من الإعلام الي ينكتب عنك ؟
المحلل فهد الخميس : شوف يعني النفس البشرية تتأثر حصوصاً اذا كان الكلام ماهو
صحيح أو مافيه مكان يكون فيه تجريح أكيد راج يتأثر الشخص .
لمتابعة نص اللقاء القناص الجزء الأول [ أضغط هنا ]
لمتابعة فيديو وصور اللقاء القناص الجزء الأول [ اضغط هنا ]
لمتابعة فيديو وصور اللقاء القناص الجزء الثاني [ اضغط هنا ]
تقبلو تحيات فريق العمل
Yasser Media
|