أمي وأبوي أغلى شيء بحيآتي - 2 إلحين نجي لأغلى وأحلى وأحب إنسانه لي أمي ( ) هالأنسانه لو أكتب الي أكتبه ما أوفيها حقها ،، حتى وصفها صعب أمي هي ، حبيبتي ، صديقتي ، حياتي ، صندوق أسراري كل شيء كل شيء يخصني أقدر أقوله لها وبكل صراحة وشفافية علمتنا أنا وخواتي نكون كتاب مفتوح لها وصديقاتها موب بنات بس وهي نفس الشيء بأتكلم عن نفسي كوني تدلعت أكثر وحدة وأقول السبب ليش هو إنه أنا الوحيدة اللي الفرق بيني وبين أخوي اللي بعدي 8 سنوات ونلت النصيب الأكبر من الدلع كنت من وأنا صغيرة بكل مكان معاها حتى أنام بحضنها لين جاء أخوي وخرب علي ماتخيلت يوم انه يجي واحد ياخذ مكاني وفيه شيء محرجة أقوله بس ماعليه إنتم يالقناصين والقناصات أخواني وماعلي منكم المهم لما صار لأمي 3 أسابيع والده إلا لاحظت خالتي بشيء غريب فيني تدقق فيني يمين شمال وأكتشفت إني قربت أصلع من كثر ما أنتف بشعري من القهر وماني حاسه << ياأحس إني خبلة بذاك الوقت بس الحمد لله أتجاوزت هالمرحلة من بدري والفضل لله ثم لخالتي أنا إلحين صار أغلب يومي معاها والـ 5 سنوات الأخيرة قلبت برأسها وخليتها تشجع الهلال معي بعد ماكانت أهلاويه صميمه من الصغر بس عرفت ألعب بمخها والهلال يستاهل وإلحين صارت مجنونه بالهلال أكثر مني وهي تخبرني بأخبارهم أول ما أقوم لاوصرنا مسمينها بالبيت المحامية الرسمية للهلال إدارياً وفنياً وكل مايخص اللاعبين وبالذات ياسر بجميع المجالس اللي تجلسها <<< ريحتني من مهمتي القديمة مثل ماقلت لكم أي شيء يخصني أخبرها على طول مهما كان هالشيء حتى بعض صديقاتي يقولون شلون تقولين مثل هالشيء لأمك لو إحنا مانقدر قلت لهم ليش لا مافيه سبب يخليني أخبي عنها أي شيء لو إيش ماكان أصلاً ما أتخيل حياتي بدونها ودايم أقول لها لو تزوجت بأسكن عندك أو موب متزوجه خير شر تقول لي مهبوله انتي قلت ايه الله يحفظها لي ويحفظ لكم يا أخواني وخواتي وكل من أمه وأبوه حي اللهم أمين ويرحم أمواتنا ويدخلهم الجنة من أوسع أبوابها ..