.
ابله تكانه 
السمستر الماضي كان عندي مشاهده يوم بالأسبوع في مدرسه تطبق نظام الدمج
انا اخترت هالمدرسه لسببين أولها قربها من بيتنا واشينها ان دلال اختي فيها 
تعرفون البنات الصغار اللي عندهم ام او اخت بالمدرسه ؟
انواع البثااااره انوااع الصياح لو أحد يقولها وخري صاحت , ليه ؟ عشان اختها ابله 
يعني يارب انها يوميا تطلع لحالها للبيت اليوم اللي أكون فيه هناك
تصيح لاجا ع البيت خايفه اني رحت عنها ليه 
حلفت اني ما أطب في هالمدرسه وقت التطبيق ,, اطق مشوار نص ساعه للمعهد ولا أتحمل بثارتها :p
يازين العيال بس 
من أول يوم دخلت فيه المدرسه وانا أحسني متسببه
ما أذكر اني كلمت بنت الا وصاحت
موب مني ما أنلام فيهم والله
مثل اول حصه لي في الحياه على ثاني ابتدائي
طلعت وحده نتفه تمشي ولا عليها من احد
قلت لها وين رايحه لفت علي وتخصرت وقالت : وانتي وش دخلك
انا انلخمت من الرد صراحه
قلت اول شي لما الأبله تكلمنا نتكلم بأدب 
مدري وش بتطلع ذي لاكبرت :/ جيل يخوف
ووحده بخامس كل من تكلم احد نشبت في حلقه
ان جاتهم ابلتهم تكلمهم والا ان تكلمت وحده من صديقاتها نطت وتدخلت والا قامت ترادد ولاهوب عاجبها شي
المهم حامت كبدي وناديتها وهاوشتها
بس ماصاحت البنت أبيها تصيح
واجلس اهاوش واهاوش لين صاحت 
وقتها بس برد قلبي وتركتها
رقيه خخخ
جالسه أفطر في امان الله جاوني بنتين وحده لها قرنين وتشبه رقيه وجالسه تصيح
والثانيه تمشي وراها
المشكله ان اللي وراها تناديها يارقيه :p وجايه تشتكي عليها
راضيتهم وقلت عيب انتو كبار وخوات والخ ,, راحو خمس دقايق ورجعو
رقيه عينها مضروبه خخ ليه تعلمين الأبله علي ض1
وديتهم للمديره وهاوشتهم المديره وخلصت
خذتهم بوديهم للفصل قلت لها : يلا يلا يارقيه مسحي دموعك 
انهارت البنت نفسيا انا نسيت الموضوع ,, اسم رقيه ثبت بمخي
وصديقتها تقولها شفتي حتى الأبله تقول
ونفس البنت مسكينه كنت انتظار عليهم وأسال عن أسمائهم
قلت لها وش اسمك ابي ارقع الموقف خخخ قالو البنات : دلييل
قلت عيب عليكم هذي صديقتكم لازم تحترمونها
وانتو كبار والمفروض مانصغر الاسم
وفي الأخير طلع اسمها الصدقي دليل خخ
ومره جاتني بنت ابلااا شوفي نورة تكش علي
جبت نوره وقلت لها عادي اكش عليك ؟
قالت لا بعدها وحده راحت الحمام (الله يكرمكم ) وتاخرت وهاوشتها قلت يلا يا بنات كشووو عليها
وكل الفصل يكش على الي تاخرت قامت بنت طقت بنت وكشينا عليها ,, انبسطو كل شوي يكشون
و اخر الحصه جاتني بنت : ابله خليهم يكشون علي خخخخ
اهم شي اني غيرت مفهوم الكش من سلبي الى ايجابي
برضو فيه انسانه مدري وش أقول عنها
شفتها تضرب بنت من بناتي وتقولها : يابنت الدمج
طبعا احس الدم وصل كله براسي
رحت وراها للفصل وحشرتها بزاويه
وانواع الصراخ ض1 وهي تحلف ابله والله العظيم ماسويت شي 
يابنتي شفتك بعيوني
وهاوشت زياده ويوم صاحت خليتها تعتذر لبنتي
تحسبون تابت ؟
بعدها بأسبوع أشوفها تركض وبناتي وراها
قلت لهم وش فيكم اشرو لي انها تسوي لهم بيدها بذبحكم وان وين مايروحون توقف بوجههم
لفيت عليها وقلت ليه وبرضو صيحتها
كان المفروض اوديها للاداره بس مابغيت اتسبب فيها :/ مع انها تستاهل
بوريكم بارت من رساله
أكثر شي منقهره منه اني ذبيت أغلب الرسايل هذي الوحيده اللي لقيتها
مدري وش الحكمه من طيب تأكيد او سجع ؟
,
وهذي بنت كل فسحه ترسل لي نكت توسع صدري
هذا الشي سويته في أخر يوم كان مطلوب مننا نشاط نقدمه للمدرسه
قامو القروب اللي معي سوو حفله للبنات ونظام الحفله كورنرات كل كورنر يسون شي
وكل كورنر انواع الزينه
الا حقي كورنر وحده مالها خلق خخخ
كان عن الرسم على الفيسات ولاحظو كل الزيننه حقتي بقايا اشياء البنات خخخ ماعدا الصوره المخيفه طبعتها من قوقل
بس ماعليكم من الزينه أكثر كورنر عليه زحمه حقي
تعبت وانا ارسم
بالبدايه متحمسه وفراشات واشياء
اخر شي صح ودائره ومربع خخ
,,
أجمل شي بالنسبه لي كان حصص الانتظار
أنواع الاكتشافات اكتشفتها
اللي طموحها تخلص ثالث متوسط وتجلس بالبيت تاكل حب وتناظر مسلسلات تركيه خخ
واللي تقولي يا أبله انا ما أبي اصير شي لاكبرت ابي أجلس ع النت بس ض1
واللي بتشتغل بمشغل واللي بتفتح بسطه خخخ
مافيه الا وحده تبي تصير دكتوره واكتشفت انها سوريه
جيل يبشر بالخير
وما ألومهم مدرسات المدرسه بكبرهم أمراض نفسيه :/
في يوم دخلت اتقهوا معهم
ييع كل سوالفهم حماتي سوت وحماتي فعلت
واعرف حركااتها ,,هي تستقصدني.. , وام زوجي ثقيله دم وام زوجي تغار مني
يااوك يالحريم جوهم شين
يارب ما أصير كذا :(