من أهم وأجمل التغيرات التي مريت فيها بعد الدراسة ومحاسبة نفسي على كل خطوة أسويها .. كنت أرددها كثير لمن يسألني وش هواياتك .. وبكل ثقه أقولها [ سماع الأغاني ] ..!! كان أغلب وقتي في المدرسة أردد الأغاني الي أحبها .. أو أكتبها على كتبي وقت المذاكراة , ولازم لما أذاكر أشغّل نوال أو أحلام .. وكان وقتي على روتانا أغاني راشد الماجد على عبدالمجيد عبدالله على ريم وووو...... وكنت من عشّاق ومحبين أحلام كثير ... وكنت أعشق أغنيه [ والله أحتاجك أنا ] .. ومجنونه فيها لدرجة يوم سافرنا [ دبي ] وأول مادخلنا تعرفون إلي في الشوراع يزوعون إعلانات وأستقبلونا بـَ إعلان [ حفلة للأحلام ] ومعها عيضه المنهالي .. بس الأهم عندي كان أحلام .. وكان وقتها نجحت من ثالث متوسط ورايحه على أولى ثانوي .. ومن بعد الاعلان جلست فوق رأس أمي وابوي عشان أحضر الحفلة بإي طريقة .. وبحكم أمي ماكانت تسمع أغاني رفضت اني أروح في البداية .. بس مانسيت السالفه دامها دخلت في بالي بس أفكر كيف أقنعهم ...؟ وقتها كان خالي وزوجته مسافرين معنا وكان من حسن حظي وقتها وأقنعتهم أني اروح مع خالي .. وبكل سهولة وافقوا وأنا طرت من الفرح .. أني أول مرة اشوف أحلام على الطبيعه .. وسرينا للحفلة بعد ما شرينا التذاكر وإنطربت بصوت أحلام .. " استغفر الله " وتمنيت أتهّور وأورح لين عندها في المسرح .. هذي من الامنيات في وقت المراهقه .. وسبحان مغيّر الأحوال .. يغّير ولا يتغير .. بعد تعلقي في هالأغاني والفنانين والفنانات بديت حبه حبه .. وأولها بتكسير الأشرطه إلي عندي وكانت قليله تنعد على الأصابع .. وحبه حبه لين ماحذفت قنوات الأغاني وكل شيء تعلق فيها من [ الرسيفر ] .. لأن ماكان إلا أنا أهتم فيها بهبال .. وكانت رغبة مني بدون تدّخل أهلي ، رغم أنها أمي كانت تحاول فيني قبل أني أترك الأغاني .. ودايم تقولها لي [ لو تتركين هالأغاني أحسن لك ] .. وأنا أجاوبها وأقول [ خليني أتمتع بحياتي زي ماكنتوا قبل ] .!! ماكنت وقتها واعيه في ها الأمور بشكل كبير .. والحمدلله صار البيت ألحين كلّه مايسمعون أغاني .. وزرعوا هالشيء في أخواين الصغار ونموهم على هالشيء والحمدلله ..
؛ ؛ أعتذر عن كل لحظة من غيابي .. مَرْ وقَتي وماعرفت أحسب حسابي .. /،