باك بعد ماخلصنا من البحر والذب والتنتيف اللي صار علي من الشله الفاسده اياها بدينا ندخدخ ونحن للفراش وكنا عارفين ومتأكدين أنه مدام الوضع إجازه واحنا طالعين طلعة بدون تخطيط شي أكيد راح نتعذب لين نلقى سكن مناسب وبالفعل تبهذلنا لافي الميريدان ولافي الموفنبيك ولاغيرها لقينا مكان لقينا في الموفنبيك لكن مهو في نفس الفندق يبيلك تنزل للشاليهات تحت على الشاطئ طبعا غير أننا استبعدنا هالموضوع إلا أنه السعر أيضا كان مبالغ فيه جدا جدا جدا 450 دينار للشاليه - ليييييييييين طحنا في هذا الشي المارينا هو بلازا فندق 4 نجوم طحنا عليه صدفه ورميه من غير رامي خصوصا أنه بوابته مدخلها غبي غبي غبي بماتعنيه الكلمه مدري كيف مستثمر يسوي كل هذا ويستخسر على نفسه بوابه مثل الاوادم المهم دخلنا للداخل وأسرنا الفندق بجماله وهدوئه وطبعا فوق كل هذا حراراة الاستقبال وأهم شي السعر كان رايق جدا ومناسب لميزانيتنا لأننا ناوين نآخذ غرفتين وهذي بعض الصور للفندق - - كل شي في الفندق كأنه كان مهيأ أنه يعجبنا خلاصة الكلام أننا استأجرنا غرفتين لمدة 24 ساعه قيمة الغرفه 120 دينار شامله وجبة الافطار اصلا بعد ماعطانا كروت الغرف ماطلعنا قعدنا نستمتع بالاجواء تخيّل يعني انك تعبان وجاي من سفر ومرهق وفلوسك بغت تطير في الهواء وفجأه تلقى الخضره والماء والوجه الحسن وش بيصير لك يعني أكيد تبي ترتاح وتطلب عصير طازج وتشفط لك قليلا من الدانهيل الفضي أحد الزملاء في طريقه إلى غرفته ونومة هل الكهف أن شاء الله وصلت لغرفتي في الدور الثاني وصراحه أني ادهشت من هول مارأيت كانت البلكونه تعطيك منظر ساحر أكثر من تحت وحبيت المكان أكثر من أول وهذي بعض الصور - المطعم في مكان عالي يطل على البركه اللي رفع ظغطي ان رسوم الخدمه 50% من السعر يلعن ام الاستغلال خلف الفندق تحس معطين ابو الخليجيين جوهم بيت شعر ودلال وجمر وحركات مطعسه أجمل مافي الموضوع ان فيه فنان أردني قاعد يعزف عود متواجد من الساعه 5 العصر إلى آخر الليل كل محد جاه يتقهوى يعزف له اغنيه راحوا له الشباب غنالهم اغنية الاماكن انا مامداني اشق عليه والا كان طلبت شي لراشد الماجد احس كان لازم يكون موجود وأنقهرت اني نسيت الايبود - الغرف من الداخل أيضا كانت تفتح النفس لا من ديكورات ولامن إضائه ولامن دورة مياه كل شي كان رائع بكل المقاييس .. بإختصار القنوات عندهم كلها غربيه الا روتانا سينما كل واحد رتب ملابسه وأغراضه .. وعلى حدود الساعه 2 الظهر الكل كان طافي يبي ينوم قبل النوم اتفقنا كلنا على 9 نكون صاحين من أجل السهره وانخمد الجميع في نوم عميييق الساعه التاسعه صحيت وصحيت خويي في الغرفه ودقيت على الشباب صحيتهم والكل يستعد للسهره طليت طله من البلكونه أيضاً كان الجو خااااالع والمنظر يأسر - اجتمعنا وفضلنا أننا نتعشى قبل الذهاب للسهره في مكان رايق وطبعا ماكان فيه أروق من مطعم الفندق نفسه - طبعا عشاء خفيف عشان السهر والشهيصه توجهنا إلى ملهى ليلي أسمه ( مارسيليا ) نظام السهر عندهم جميل جدا تدفع مبلغ لحجز الطاوله وأي طلب آخر تطلبه يكون بـ5 دينار الحقيقه الشباب انبسطوا من هالنظام وفلوها فله في كل شي خرجنا من الملهى تقريبا الساعه 2 في الليل ورجعنا كملنا السهر في الفندق وفجأه تمسك على المسبح في قمة البرد كانت موية المسبح مليئه بالدفء والحنان نزلنا تسبحنا لين حسينا أننا صحينا الاجانب اللي في الفندق كلهم شوي جاء السكيروتي طرد واحد من ربعنا يتسبح بالبوكسر تكينا في المسبح لين قرب الصلاه وطلعنا صلينا ونمنا صحينا اليوم الثاني في قمة البسطه على الساعه 11 تقريبا ..مالحقنا فطور الفندق كنا نبي نجدد يوم ثاني لكن الشباب ظروفهم كانت ماش اللي شايل هم اهله واللي شايل هم العوده للمدارس ويبي يقضي ووالخ فأتفقنا أننا نبقى للعصر ونمشي سلمنا الشقق وطلعنا للبلد وافترقنا في جوله حره للكل .. ناس راحت تتسوق وناس راحت تسأل عن صوالين المساج واتفقنا نلتقي الساعه 4 في مطعم اسمه علي بابا نتغدى وفعلا التقينا عقب الصلاه وتغدينا احلى مشاوي كانت النيّه اننا نركب اللنش الزجاجي بعد الغدا لكن أيضا صار فيه اختلاف في الرأي فصرفنا نظر وتوجهنا لسعوديتنا أخيرا صورة لسيارة التكسي في العقبه صورتها وإحنا خارجين من الفندق في اليوم الثاني اعجبني اللون مره وخقيت مع السياره كني شايف فيراري انذبحنا لون التكسي هنا ياأصفر ياأبيض طبعا للأسف هي آخر صوره لأن البطاريه خلصت ولاقدرت أتجمل معكم بباقي التقرير هذي بإختصارهي سفرتي لمدينة العقبه في يوم ماينسي في حياتي لامن مواقفه الصعبه ولامن اللطف والاريحيه والجمال في هالمدينه ولامن الفندق اللي قعدنا فيه ولامن شباب زقرت اتمنى ينال على اعجابكم واللي يبي يسأل يتفضل وسلامتكم