: : : : سلام عليكم من زمان عن مواضيع المجلس عموما هو تقرير بسيط جدا عن سفرتي لقضاء يوم خارج البلاد في مكان لم أكن أتوقع أن يكون بهذه الرقه والنعومه معلومات عن البلده : مدينة العقبه تقع في جنوب الاردن طبعا مدينه ساحليه على البحر الاحمر من اللي شفته عرفت أنها مدينة موانئ ومصانع بمعنى آخر مدينه تجاريه سياحيه سكانها بعد البحث في قوقل حول 120 الف نسمه العمله الدينار الاردني اللي يساوي بالسعودي تقريبا 5.5 ريال العقبه تبعد عن تبوك حوالي 190كيلوا بالتمام وتبعد عن حقل حوالي 10 كيلوا يعني المجموع 200 تقريبا . السفر : طقت في راسنا السفره بعد صكت بلوت مع 3 من الزملاء عاد قاعدين نحمس بعض أن الطلعه بدون تخطيط تطلع أحلى وخذينا الدول من لبنان لين سوريا لين الكويت لين الاردن لييييييييييين صفينا على العقبه وكانت الانسب .. خصوصا للمتزوجين وخص نص للناس اللي دفعت 1500 ريال في الاضحيه تقابلنا الساعه تقريبا4 ونص الصباح ومشينا بر طبعا ..وصلنا حقل تقريبا عقب صلاة الفجر مرينا محطه صلينا وعبينا بنزين ودخان وواصلنا لمنفذ الدره جلسنا في المنفذ حول نص ساعه مابين جوازات وجمرك دخلنا الاردن تقريبا مابين 7 ونص إلى ثمانيه الصباح .. نسيت أقولكم أن قطتنا كانت 1000 ريال كل واحد شامله للسكن والأكل والسياحه والسهره طبعا أما خرابيط اللي يبي يخربط مني مني ومساجات ومقاضي يحك جيبه مالكم في الطويله راح أبدأ على طول في الصور وبتكلم عن كل صوره قد ماأقدر - مثل ماعلمتكم البلده وأنت داخل مع المنفذ تشك أن فيها ريحة سياحه قوة مصانع فوسفات ودخاخين وبواخر وعجئه - - مثل ماتلاحظون حضراتكم كل مادخلنا شوي كل ماتبدأ تنكشف معالم البلده من حيث الطبيعه والتحضر والعمران والشاطئ وأشياء كثيره تحسسك أنك في مكان سياحي الصراحه اننا بدينا ننبسط في الهجوله والتعرف على المكان وأدهشتنا طيبة أهل البلد وقد أيش هم ناس يحترمون السياح لأنه في الأساس هذا أكل عيش ورزق بالنسبه لهم خذينا لفتين أو ثلاث على البلده لين حسينا أن كل شي أصبح مألوف بإستثناء مناظر مدينة إيلات الاسرائيليه واحد من الشباب كل ماشافها قعد يلعن ويسب وطلع من فتحة السقف مسوي يتفل ويقول ( كلمة الكاف حقت جمهور الاتحاد ) لبيريز ونتانتياهو وكله كوم وأكبر علم بالعالم كوم مشكله العرب شاطرين في اكبر علم وأكبر صحن كبسه ولايهون اكبر صحن شوربه وووالخ الزبده ان يوم رجعنا السعوديه قبل يومين كان العيد الوطني تبع الامارات وجابين اعلان عن اكبر علم بالعالم صراحه أننا أحترنا نصدق مين خخخ وهالشي كان مثار سخريه من أعضاء الطلعه بعد السفره الطويله ومزيدا من الفرفره والهجوله قررنا أننا نفطر فأخترنا مطعم أسمه البلبل اعتقد وطلبنا المنيو .. السفرجي كان مصري بياع كلام من جددددد قعد يهلس علينا بأكله عندهم أسمها الفطفوط المهم الزبده انه طلع شاطر وأقنعنا وطلبنا صحنين فطفوط وصحن كبده صوره احترافيه للفطفوط اللي يتكون من سجق ومرتديلا وبيض حقيقه عجبنا طعمه جدا جدا لكن المصيبه كانت في الكبده الله يعز النعمه طلعت كبدة دجاج وعصبوا اخوياي ماكلوها ولادفعوا حسابها والمصري اللي كان مسوي شاطر تهزأ من الكاشير بحجة انه ليش ماوضحت للزبائن أنها كبدة دجاج وليست كبدة غنم والزبون دائما على حق عاد كله كوم وواحد من الشباب سو في أمها فاهم وقعد يخبط على الطاوله ويصيّح آيام كاستمر هير آيام كاستمر هير حفظ هالكلمتين وبذنا هالصوره سالفتها بتجيكم لاتستعجلون المهم افطرنا ولله الحمد وخلصنا من الادب الانقليزي الموجود عند خوينا وطبعا أقرب مكان ممكن تتمشى فيه وتشم هوا هو البحر عندهم شاطي حليو ويفتح النفس فقلنا خلنا نآخذ لنش تمشى فيه لكن ماتيسرت الامور بسبب اختلاف بين الشباب وطبعا بماأني أمير الرحله قلت الحين نطلع ويقعد ذا يستفرغ علينا من دوار البحر محنا بناقصين خلنا نآخذها تمشي وضحك وسواليف وفعلا هذا اللي حصل تمشينا في حديقه عندهم على البحر تحت اكبر علم في العالم بس اني خفت أصوّر مليان عوائل قلت الحين بصوّر يطلع لي أزعر يلطشني مالها داعي فخليت الكاميرا في اجيبي لين طلعنا على الشاطئ وفي غمرة الاحداث والسوالف والذب والاستمتاع بالهواء النقي صارت الكارثه أكبر الكوارث اللي تصير لشلة جحلط وهم برا المملكه فقدان الجواز او سرقه او سجن او مضاربه لكن اللي صار لي مهو من هذي كلها جيت بطلع الكاميرا من جيب البنطلون الخلفي اللي فيه الفلوس وشوي إلا فلوس القطه طارت بالهوا كيف وليش ومتى ولماذا مدري عاد هذا المقدر الشباب من وراي يصيحون الفلوس الفلوس وانا خلاص ماعاد أقدر أمسك نفسي المصيبه أننا كنا على جسر مخترق البحر اختراق وكله ناس جالسين ولافيه امل تتصرف الحقيقه اني في موقف لاأحسد عليه حول 4000 آلاف ريال طايره في البحر وأنا اتفرج لكن بحنكتي المعهوده أتجهت للغواصين اللي صورتهم فوق وطلبت من واحد الفزعه انه المصاري طارت الحق علينا وماقصر الرجال طلع شهم بمعنى الكلمه وجمعها لي قرش قرش وحتى يوم جيت بعطيه كم دينار مكافأه رفض بس لطخني بكلمه : شو هاظ حدا بيطير مبلغ مثل هيك انا قلت الشكوى لله ياخي ماأنتبهت لها وطبعا شكرته وبغيت احب راسه من الخقه على شهامته معي الزبده قلب وضعنا كله تنشيف في الشمس لين ظبطت الامور ورجعت فلوسنا في جيبي مره ثانيه وسط ضحك وذب وملعنة جدف من الزملاء برب