كل عام وأنتم بخير ، بها يبدأ أول أيـام عيـد الأضحى المبارك تحت بداية جميلة فيها الأبتسامـة تتضح بروعـة وجمـال وبراءة أهـل وأطفال العيـد السُعداء بهذا اليوم ، يبدأ اليوم بالذهـاب لأداء صلاة العيـد في المسجد القريب من البيت ، وبعـد كذا يبدأ عيدنـا بالذهاب لبيت جدي وبعدهـا الخروج للحوش عشان يبدون بـ الضحايا ، و هالسنـة فيه عاملين و أنضم لهم ثالث طبعاً أكتفينـا بالمُشاهدة لهم وينطالعـهم من بعيييد ، شئ جميل ورايـع و بعـد ما تشير الساعـه الـعاشرة يدخـل الجميع بداخل البيت عشان تنـاول الكبده الطازجـة و بعدها نروح للبيت نتروش ويحـلف جدي أن نتغـدى معـه و أنه بيجتمعون و نتروش و نلبس و نرجـع للبيت وبعدهـا يقدمون الغداء و يبدأ ( مشروع الأكـل ) طبعاً السفرة مليانـة وكلها تدور حول ( رز بأكثر من نوع و لحم بثلاث أنواع و الجريش ومرق اللحم ) طبعاً كـ أول وجبـة مُمكن نأكل لين نشبع لأن من زمان اصلاً عن اللحم الطازج وطبعاً أكيـد له مذاق خاص بيكووون ، طبعاً أكثر من نوع رز و جـدي يلزم نأكلهـا كلها و أكثر من نوع لحم و لازم نأكلهـا وطبعاً لحُبي للجريش أفضله كثيير وأحرص أني أكلـه خصوصاً أنه من يدين جدتـي طبعاً نقوم من السمـاط و جدي بحلف الإ تأكـل .. نرجع نقعـد ونأكل أكثر من لقمه مجاملة بعدهـا ننتظرهـم يقومون كلهـم عشان نقوم وكل هذا مُجاملة لجـدي .. وبعدهـا يبدأ الحُكم على الأصناف و يناظرني أبو محمد هاه أي نوع عجبـك أكثر ؟ نرجع للبيت على أذان صلاة العصـر بعدهـا نقرر النوم لين الليـل لأن صاحين من الساعه 5.30 ولا نمنـا بعدهـا ابداً .. يدق الجوال كـل عام وانت بخير .. ترى بمرك عقب الصلاة نروح لخوالـي طبعاً بالغصب يمرونك ! و جو بالفعـل مرّوا علي و بعدهـا نروح لخوالي ولا أقدر أنـام ابداً نروح نسلم على جدتي و نتعيـد معها شوي ونطلع للشـارع عشان نشوف أهـل الحي ( كله خوالي ) و نشوف العيال وسواليـف لين الساعه 8 بالليـل بعدهـا ندخل بملحق صغير بأخر الحي لخوالي يجتمعون فيه وسواليف وهاه للحي على تشجيـع النصر ؟ و بعدهـا ينادينـا خالي عشان ندخـل ببيت جدتي نتعشـى وطبعاً كـ أول يوم عيـد بالثلاث وجبـات لازم يكون فيـه اللحم بشكل رئيسي بل واجـب وجود اللحم فيهـا وبعد هذا كلـه يحلف فلان أن تجلس هنا و انت تعال هنـا .. يأخي خلنـي على راحتي .. بكيفك وبعد هذا كلـه تقووم والله أن تقعـد أجلس يبن الحلال كـّل وش معجلك ؟ طبعاً بالوجبات هذي ( مُقدر الأكل اللي نأكلـه ) عن 88 وجبـة والواحـد يالله يالله يقوم ، عاد سوينـا مسابقة لأصحاب - الكروش - من يقوم بدون ما يلمس الأرض بيدينـه و بصراحه الموجودين كانوا مطاوعـه يعني ما توقعت انهم بيغشون لأنهم من أهـل الأمـانه واللي أدت بعجزهم جميعاً عن الوقوف لكن واحـد منهم غش ! ويوم قام قالوا له اجلس رفض .. ( ما صدق يقوم تبونـه يجلس ؟ ) + وكل عام وأنتم بخيـر