.
الســلام عليكم
الأغلبية إن لم يكن الجميع , عرف بمنع الأمانة لِبيع الدخان في منطقة بريدة : )
واللي أغضب جميع ( المدخنين ) لأنهم منعوا عنهم وجبتهم " الدسمة "
اللي لا يمكن يعيشون بدونها .!
أنا تمنيت إن السعودية كلها تصدر هذا القرار . لأن فيه مصلحة عامة
حتى لو خرج البعض وقال : انه راح يصير هناك استغلال للوضع
من قبل البائعين .. من سعودي و هندي وبنقالي !
أيضاً , السوق السوداء اللي طلعت بسبب المنع !
ولو استغل الهنود , البنقاليه ,...الخ المراهقين وباعوهم الحبة بعشرة ريال
ماراح تلقى كل المراهقين واقفين يشترون ..
لأن مو كل مراهق راح يقدر يدفع كل يوم !
هذي كلها نتائج سلبية لهذا القرار ..
لكن , مافيه أحد يقدر ينكر النتائج الإيجابية له .
بإذن الله راح تكون خطوة أولى لبداية المنع في السعودية كلها
قريت خبر لكن ما أدري عن صحته
إن حائل راح تبدا المنع في بداية العام المقبل : )
و القصيم لها مستقبل باهر في المنع ان شالله .
وهذا بعد :
" يستقبل هاتف عمليات أمانة منطقة القصيم 940 بلاغات من المواطنين عن الأسواق أو البقالات التي تبيع الدخان . ومنع بيع الدخان داخل المدينة وإنما فقط يسمح ببيعه خارج المدينة . . "
لو كل واحد شاف [ الممنوع ] يباع في المحلات أو أي مكان داخل بريدة , و بلّغ عنهم
راح يقل البيع , يختفي التكسّب في البيع .
و بكذا تقل أعداد المدخنين , تقل نسبة الأمراض بسبب التدخين , يقل التلوث الجوي داخل المنازل
يوفّر المدخنين الأموال اللي تروح في بكتات الدخان :/ ..
- مرة قريت نسب للأموال اللي تصرفها الشعوب في التدخين
صراحة نسب قوية وحرام تروح كل هالملايين في " زقارة "
يطفي فيها زعله / طفشه !
لو أنشؤوا فيه مشروع كان أنتجت لنا شي مفيد ! -
وهذا بينتج لنا شعب [ بريدي ] غير مدخّن .
وان شاء الله نرى السعودية ترفع شعار : لا للتدخين .
- آراءكم حول المنع , أعرف ان فيكم المؤيد والمعارض ..
ومستحيل الجميع يتفق على الموافقة / الاعتراض !
لكن , لازم نفكر برؤية مستقبلية : )
* المدخنين رجاءً لحد ينفعل ويصارخ ويسب الأمانة , لأنها تحبكم وتبي مصلحتكم . 
.
|