. يالرياض متى تكونين رياض ؟ كلك زحمة وهياط اهل الكدش كوني تمام واصير لك راض وياهل التحلية نبيكم حنش حنش : أي انسان رجّال وراعي مهمات صعبة وماعنده لف ودوران وتراه مايتتّن حـــيهم فهد من سكّان الرياض والرياض هذي عاصمة السعودية < بالله عليك ومع ذلك ماحس اني ساكن في مدينة كاملة .. ناقصها خدمات ويالليل مطولك .. نبي سينما .. طفرنا من كثر مانروح البحرين نبي مكان عزّاب كثر اصابع يدينكم كلكم نبي شيء رخيص ماهوب غالي نبي بيئة نظيفة نبي استاد الملك فهد تنظيم وحجز الكتروني وبلاش زحمة جابر الصباح نبي طقة البنقال يذلفون .. ومنفوحة مانباها مانباها نبي مترو عشان اخذ زوجتي معاي ونروح نشري لنا ملابس لعيالنا من السدحان وحنا راكبين المترو < قلت زوجتي وعيالي لأني داري ماراح يجي هالمترو الا بعد 10 سنين مانبي زحمة مانبي حفريات مانبي كل شيء عوايل مانبي كل شيء يسكر الساعة 12 مانبي البنات يسوقون الى الابد .. ماعندنا بنات يسوقن < قهر البنات مانبي حقين الكدش وطيحني ورفعني وشققني يدورون في العليا مع جموسهم ويقعدون يهايطون على الشعب بالله لو جاء واحدن اجنبي وشاف هالربع .. ورجع لديرته وش بيقول عن السعودية ؟ نطالب المسؤولين في أمانة الرياض وبلدية الرياض انهم يسمعونا ويلبون لو نص هاللي كتبته فوق يامسؤول الأمانة ارحم امك تكفى سنعنا امورنا ترى من جد حنا نعاني .. وانتم ماتحسون فينا ’ الا تبون تزوجونا يعني وخويي سلمان عزوبي وماعنده اهل هنا وساكن في شقة يبي يتمشى وين يروح ؟ يفر بالدائري عشان تمسكون عليه مخالفات ويخسر بنزين سيارة ويحلل سيارته الين ماتخرب وياكلها الضعيّف مع تحيات معاناة شاب سعودي ساكن في الرياض ويطالب المسؤولين بسماع رسالته اللي كتبها بخط اصبع يده اليمين اللي كسره مدرس الرياضيات يوم اني في ثالث ابتدائي عشاني ماحليت الواجب طيب ماحل الواجب تكسر اصبعي يابن اللذينا في الختام / مجرد موضوع نقاشي بأسلوب ترفيهي ونبي نتناقش مع بعض لأجل الرقي برياضنا فهــد