الله والمنتخب عاد اللي يسمع مهايط منتخبنا وتأهلنا لكأس العالم 4 مرات متتاليه وحققنا كأس
أسيا 3 مرات يقول ذولا منتخب خارق مادروا أننا نروح ننهزم 8 ومع الرحمه نص الـ 8
ونجي فرحانين أننا تأهلنا .. 
منتخبنا على قولتكم يامنتخبنا لاراح كأس العالم يروح تكمله عدد بس يروح علشان بقيه المنتخبات
تشفط 3 نقاط مضمونه ويرجع ..
لاتقول لي تبخسين حق المنتخب أو تظلمين حق المنتخب ..؟
وشو منتخبك ..؟
من تولى سلطان بن فهد رئاسه الاتحاد السعودي عطني أنجاز واحد حققه منتخبك ..؟!
غير دورات الخليج والعرب يامساكين لانها مب مسجله عند الفيفا ..
عطني قل وصل الدورالربع لكأس العالم , قل حقق كأس أسيا .. عطني أنجازات يلا ..؟!
قل وصل كأس القارات وطلع من النهائي ..؟ قلي وش سوى منتخبك ..؟!!
أنا منب مجبره أشجع شيء لمجرد أني أشجع وصلى الله وبارك ..
ياعزيزي وطنيتي ماتحكمها كوره وعبدالله بن مساعد أتذكر مره لما داخل مساء الرياضه علشان
سالفه تدريب كوزمين للمنتخب قال شيء حلو وممتاز وقال شيء المفروض كلنا نفهمه قال :
( ترى مب بس حنا اللي نحب وطنا ..؟ كل العالم يحبون أوطانهم ..؟ مافيه آدمي مايحب مكانه
ووطنه وأهله ..؟ وماله داعي نسوي وطنيين زياده عن اللزوم بمثل هالامور .. وطنيتنا عارفينها
الحمدلله ومانحتاج تقييم فيها ولانقبل التشكيك فيها ) ..
وهالكلام أنا أقوله للي يقول لي أنتي منتي وطنيه علشان المنتخب ..
هذا أولاً ,,
الشيء الثاني يابعدي لاصار عندك طاقم تدريبي وطبي ورعايه على مستوى عالي تضمن لك سلامه
لاعبينك وتطور مستوياتهم وأنضباطهم ..
أقولك ونعم المنتخب .. لكن يروحون سلييمين ويرجعون مصابين ..؟ ماهي مره ولاثنتين ولاثلاث ولا
أربع ولاخمس كل معسكر يطلع أثنين ولاثلاث لاعبين مصابين لاصرنا هنود ومانفهم قولوا أنه أحتكاك
بس البلا أن سوء طبي ولياقي وضغط منهم ..
سبحان الله بس ..
هالحين تأخذ نجوم من أنديتهم والكلام لجميع النجوم مب بس الهلال .. متعافين وطيبين ولياقتهم ولاأروع
تجي مطفي النور وتلعن خامس عضلاتهم بالتدريبات اللياقيه والطبيه وتضغطهم بزياده مسوي بزيد المعدل
عندهم وترجعهم مصابين وتقول قضاء وقدر ..؟
ياخي حتى القتل لاقتل شخص أخر تراه قضاء وقدر بعد هل نسكت ونقول لاتعاقبون المجرم قضاء وقدر ..؟
كل شيء قضاء وقدر محد قال لا .. بس الواحد يفعل بالأسباب ..
بعدين على قولة حسام ..
مافيه جدوله نهائياً للمنتخب والنادي ..
ياعزيزي اللاعب المحترف وأنا أتكلم لاحظني عن لاعب محترف يعني لاعبينا الان اللي هم لاعبين المنتخب
المحترفين ..
اللأعب المحترف ناديه أحق به من إي مشاركه أو معسكر مع المنتخب إلا اذا كانت في أيام الفيفا أو اذا كانت
مشاركه رسميه مثل مشاركات كأس العالم وكأس أسيا وغيرها النادي أحق باللاعب ولاله حق المنتخب يستدعي
اللآعب ويحرمه من ناديه ..
وش معنى سلطان ونواف يمزعون علينا قرارات جايه من كوكب المريخ ويضمون لعيبتنا وقت مبارايات الدوري
اللي يسمونه دوري محترفين وهم عقولهم تحتاج للأحتراف ويحرمون النادي منه في مبارايات مهمه بحجه عندنا
معسكر ويرجعون عقب أسبوع تعبانين مرهقين والمباراه الوديه خسرانين بعد ..
ووش الآليه لضم اللاعبين ..؟
أختيار مدرب ..؟ والله الخرطي اللي يبيعه علينا الاتحاد السعودي ..
لاعب مايرد على جواله يستبعده ليش مارديت ..؟
لايكون صايم ونقض صيامه يوم مارد عليكم بس ..؟
ومن متى منتخب يدار بالجوال يامالات العمى ان شاء الله ..
قلوا الاداريين والعاملين مافيه شيء أسمه أبلاغ قبل يومين
أو 3 مافيه شيء أسمه فاكس للنادي أو أصبر لين يرد عليك
المسيكين اللي تأكلون فيه منتخب ومعسكرات ..!!
ويوم أحتجتوه قلتوا قبلنا أعتذاره ..؟
هذي آليه بس ..؟
تضمون 40 لاعب وتقولون أعداد ويشوف المدرب تقل
مايشوف وقت المبارايات ولاجاء وقت الصدز كرشتوا 20
مساكين تعبوا وتغربوا وراح عليهم وقت الراحه وخذيتوا
20 ..؟!
اقول الله يخلف بس ..
النادي يصرف ويشقى ويتعب ويعالج ويجيب مدربين ولاعبين
علشان يحقق ويوصل ويشرفك خارجياً أحسن من منتخبك
تجي وتضم لاعبينه ويلعبون معك أكثر منه وحتى الدعم ماتعطي
اللاعبين وحتى العلاج لاأصيبوا ماتعالجهم ..!!
أنا أول مره بالتاريخ الرياضي بالعالم أشوف لاعبين يلعبون
مع منتخبهم أكثر من أنديتهم ولله الحمد صارت عندنا
بالسعوديه من ردى العقول ..
قليلاً من العقلانيه ياخي ..
ماعدنا بزمن 1990 اللي تكذبون على الشعب ويصدق
كل شيء ..
هالحين تطورنا صرنا مانتابع منتخبنا الفاشل صرنا نتابع
فرنسا والبرازيل والبرتغال وصرنا نتابع الليغا الاسباني
وغيرها ..
تطورنا صرنا نعرف الكوره والعالم أكثر من المسؤولين
أنفسهم ..
مافيه مجال لدغدغه المشاعر ومنتخبنا ووطنيتنا ..
اذا وطنيتكم يحكمها منتخب بس أنا الحمدلله ماأشجع المنتخب
بس مافيه ولاأدمي له حق أنه يقول لي أنتي منتي وطنيه والحمدلله
ماأقبل المساومه على هالآمر ولاعندي شك بوطنيتي ..
ولاني محتاجه كوره وهزايم وفشايل علشان اظهر بالصوره المشجعه الوفيه اللي تساند بعز الازمات المشكله أن المنتخب
منتخب الازمات مافيه وقت طيب معاه ..
ولين جاء مدرب ضعيف مسيكين يبي يشتغل تركوه لين يأصلون
كأس العالم عقبها جاك الرئيس المدرب وطب وتخير
ذا الأسماء ويلا ياعيال عليهم عليهم ..
ويطلع منتخبك الصدق ..
ياعمي الموضوع ذا سالفه منتخبنا مامنتخبنا وطنيتنا ومدري
وشو بسيطه لكن ماحد مظلوم كثر اللعيبه الضعوف..
هم اللي ضايعين بالطاسه مابين أرهاق / تعب / أصابات
وبعد سوء عقلانيه وحاطين لهم مدرب بالأسم ويلا ياويلكم
لو تنهزمون ..
خلونا واقعيين ليش أنتم تدسون رآسكم بالرمل وتقولون
حنا وطنيين وماعندنا مشاكل ..
إلا عندنا مشاكل ونص ..
متى أخر مره منتخبك العظيم لعب مباراه عليها الكلام
في كأس العالم وشرفك وشرف العالم العربي كله ..؟
من أيام فيصل بن فهد الله يرحمه ..
وعقبها ماشفنا شيء الله يعظم الأجر الا كأس اسيا الاخيره
يوم عطوها انجلوس ووصل للنهائي وتدخلوا
وخربت الامور وأرجع شف المباراه وشف منتخبك ..
ياعمي لاتقول منتخبي وأنت عندك أنديه وصلت كأس
العالم للأنديه وعندك نجوم على مستوى عالمي ومنت
قادر توصل للدور الثاني من كأس العالم ..!
منين البلا ..؟
اذا النصر وصل كأس العالم ..
الهلال وصل كأس العالم و ( ألغيت ) من سوء الحظ
وعلشان مايجيني منبرش يقول متى ؟
الاتحاد وصل كأس العالم ..
أنديتك حققت كأس أسيا يمكن أتوقع كأكثر أنديه
القاره اذا ماأخذت بالاعتبار أن الهلال بلحاله
حققها 6 مرات والاتحاد حققها والنصر برضو ..
يعني حققوها أنديه كثير ,,
اذا عندك نجوم مثل ( الدعيع , القحطاني , نور , عزيز ,
عطيف , الحارثي , .... ) وتطول القائمه ..
نجوم مأهلين للأحتراف بأي دوري ومنت قادر توصل ..؟!
اذا دوريك يلعب فيه ألمع النجوم بالعالم ,,
وفيه أفضل المدربين بالعالم ,,
ومع ذلك مكانك سر ماتعديت ولاوصلت ولاتطورت ..؟
وش المشكله ..؟
هنود حنا يطلع لنا الرئيس ونائبه يقولون أخطاء ويتم
تلافيها ..؟
وشو أخطائه اذا بكل هالفنيات منت قادر توصل ..!
الله يرحم زمان أول اللي دربهم الخراشي وحققوا ..
وحنا المع المدربين عجزوا من زين الدبره بالاتحاد السعودي ..
ترى ماهو كره للأعبين المساكين أو للشعار السعودي أو
حقد أو حسد في أحد ..
بس لاقلنا مهناش منتخب حنا نشوف ونسكت مانبي نطلع
الفضايح إلا لازم تسامونا على المنتخب والبلد والوطنيه !!
الله يبارك لكم بمنتخبكم ..
والله يبارك للمنتخب فيكم ..
أنا أشجع وأتابع لاعبين المنتخب وإلا المنتخب ككل غاسله
يدي منه تدري ليه ..؟
وشوله أتعب نفسي مع فريق ولاجاء وقت الحصاد تدخل
المسؤول وخربت الأمور ..؟
أنا أتابع اللاعبين لانهم ضعاف مساكين مالهم ذنب وغصب
عليهم هاللي يصيـر والله غصب ..
والله مافيه ناس كثرهم مظلومه وأنتم مدرعمين وراء
خطط مدروسه منتخبنا ومنتخبنا ..
شجعوا المنتخب وساندوه الله يبارك لكم ..
وأقص يدي اذا تطورتوا والا تعديتوا الدور الاول من كأس العالم
ياعمي الكوره صارت تعطي من يعطيها ماصارت أعقلها
وتوكل ..!
أجل منتخب يروح كأس عالم يصرف له الملك من الميزانيه
54 مليون ريال ..
يبيك تجيب مدرب سنع وعالمي يبي أعداد ممتاز يبي
مكافات ضخمه ..
تحطها بمخباك وتلقط مدرب الهلال باكيتا وتعطي اللاعبين
الف وخمسيه الفين اذا كثرت ويلا توكلوا ..؟!!
وين الفلوس ..؟ وين الميزانيه ..؟ وين المدرب ..؟
والمعسكر ..؟ والصرف ..؟
اييييه الله يرحم الحال بس فكروا ياناس فكرررروا
الواحد يفكر بعقله لاينبرش ماعندكم وطنيه وهو مايدري
وش المشكله ..
المشكله أنكم تتابعون العالم وتشوفون وتعرفون ..!
أنا أرجع مشجعه للمنتخب اذا صار فيه ناس تفكر وتعمل
وتشتغل لبلدها ولمنتخبها ..
ماهو ناس فاضيه تلعب علينا من وراء المكاتب وحنا نصدق ..
والله يخلي الدوري السعودي موسع صدورنا ونتناقر فيه حنا
وربعنا ونتراضى ونتنافس أبرك لنا من هزايم وفشايل
وبالأخير ماتربيتوا ولاتقيمون ومن أنتم علشان تكلمون ..؟!
من مشجعه بسيطه لاهي دكتوره ولاهي عالمه
إلا طالبه بالجامعه ..
سلام ياوطني العزيز ..