. يسلم عليكم جارنا السوداني ويقولكم تعالو صيفو عندنا هالسنه ترى حرنا أشوى من حركم بجد والله صرنا حنا وسيارتنا قدور كاتم متحركة في الشارع ويقولون ان الحر لحد الحين ماجانا وسرى سرى حيــهم اعترف اني اكبر قطوع .. ماعدت اكتب مواضيعن مثل ماكنت اكتب قبل وإلا الود ودي كان مليت المجلس مواضيع .. بس اشغلني منتداي الجديد واشغلتني هالدنيا وغثاها ... وعقبال ماعرس واتزوج وافارق خشش اخوياي ... واصير اطلدز واحد في الدنيا من قدي متزوج ولا بعد ماعاد اشيل هم عفواً ممنوع دخول العوائل اللي صارت عقده نفسيه لي ولأخواني العزابيه من جد ماعاد بوه مكانن الا مكتوب عليه عفواً ممنوع دخول العزابيه .. حسيت اننا فعلاً ناس جحلط وراه ياكافي عزاب مايدخلون يامال اللي مانب قايل < ياقلبي علينا ننرحم بس وشلون اتزوج والأسعار طايرتن فوق كبر حجم جبال طويق والا وشلون نتزوج واسعار الإيجارات طايرن فالسماء ولاننسى شروط اهل العروس لازم مهر البنت فوق الخمسين الف ولازم طقاقات وقاعه تسبيرة واخوها يبيله بي ام دبليون يكشخ بها قدام اخوياه ... وانت كانك ماتقدر عليها ورنا عرض اكتافك << _ < وتقولون ليه نتزوج زواج المسيار الوالد قبل كم يوم يقولي فهد متى اشوفك متزوج وساكن في بيتك مع زوجتك وعيالك اللي يترسون بيتك يارب .... حمرت خديداتي وقلت لامني توظفت بوظيفه أعلى من 10 الاف ريال ذيتس الساعه تزوجت إلا على طاري الوظايف ! قبل شهرين ناط لنا غازي القصيبي بالصحف والإعلام ويقول معاً لتشجيع الشاب السعودي للوظائف.. والعمل بها مهما وليس عيباً للشاب .. وانا متأكد ان الشاب السعودي ليس عيباً ان يكون سباكاً او كهربائي او شغال في البلديه ... من زين ووجهك ياقصيبي وانت تقول هالكلام والا عشانك فوق الطاولة تقول كذا والا لو انك تحت الطاولة كان قضبت أرضك وسكت وإلا تدري طيب خلنا نشوف ولدك يشتغل هالوظايف وتبشر والله باللي يصير حارس عماره بحينا عاد تصدقون انا افكر اني اترك الجامعه تدرون ليه ؟ لأني اتعب نفسي على الفاضي وفي النهاية تنطق ببيتكم وتقعد تقشّر بصل الين ماييجك الربيع قصدي الوظايف واحيانا افكر اني اكمل الجامعه عشان ادبّر واسطة منا والا منا واروح اقدم على وظيفه وادّزها مع شهادتي الجامعيه كود اني احصل وظيفه ... الا على طاري الواسطات ! الواسطات صارت عندنا شيء سهل ومثله مثل شربة الموية ... يعني يفنشون موظف كرف اربع وعشرين ساعه وبالطقاق اخذ هالوظيفه ثمن يجي واحدن ماعنده ولا شهاده بس معه فيتامين واو ويدخل الوظفيه وزقارته في يده ويكلم بالجوال ومستانس وخوينا المفنش ياقلبي عليه مثله مثل اللي تفنشو قبل بسبب فيتامين واو هذا المرض اللي اسميه انفلونزا السعوديه المنتشر يوماً بعد يوم الا على طاري انفلونزا يقولون ان فيه مرض جديد اسمه انفلونزا اللحوم ! قبل كمن يوم جايني واحد من اخوياي في الإستراحه بيعرس بـ بداية الصيفيه ويقول فهد وش تنصحني شرايك اقضي شهر العسل في السعوديه ودول الخليج وماطلع اوروبا لانهم يقولون فيه انفلونزا الخنازير مدري اللحوم ! وانا بصراحه خايف من هالمرض لايصيبني وانا في بداية زواجي ثمن اردد ياحظي العسير ماصابني الا في زواجي ! قلت له ياخوك روح سافر واستانس مع حرمتك واكل من لحومهم كلها ولاتنسى ترسل لنا لحم من عندهم عشان تعرف ان ماعندهم سالفه وردد في شوارعهم كلها ( ماهمنيش حاقه وراسي مرفوع ) من جد صرنا شعب مخفه وخوّاف ونصدق كل شيء أجل ماني رايح اوروبا عشان مايجيني انفلونزا الخنازير ,,, عاد تصدقون ؟ ودي انشر اشاعه بيني وبين نفسي واقول ان جاء مرض جديد اسمه انفلونزا البعارين والأغنام عشان تنزل أسعار الأغنام والبعارين < تفكير عميق وخبيث إلا على طاري البعارين قبل مده وحنا كاشتين للبر واحدن من العيال ماقصّر ظابط لنا لحمة حاشي وش زينها ويوم جينا نبي نتغدى جانا واحدن زلابه وقال هاللحم لحم بعارين ؟ اووه خلاص مابي آكل انتم تغدو ماني فاضي اروح اتوضأ مره ثانيه .... عاد بغيت اصك قوطي البيبسي اللي كنت توني فاتحه في جهته واقوله تغدى لادوس في بطنك قال اتوضأ قال عاد تصدقون ؟ ودي ان مافيه الا لحم بعارين عشان كل واحد يتوضأ ونعرف منهو اللي على وضوء واللي ماهو على وضوء وبيقلّون الناس اللي يروحون للصلاة بدون وضوء إلا على طاري الصلاة انا من الناس اللي ابوه يقومه لصلاة الفجر يومياً وان كاني ماصلّيت طرد من البيت لحد الظهر ! عاد تحصل لي كثير وانطرد واروح انام باسترحتنا المصونه .. بس عاد تعودت خلاص ونعمه من الله ان الواحد يكون محافظ على صلاته خصوصاً الفجر وهالفتره الناس ماعاد يصلّون استغفر الله اللهم ياكافي صار المسجد ماعاد هو بـ مثل أول ! الله يرحم زمان أول يوم ان المسجد تدخله ماتحصل مكان عاد تدرون ؟ ودي ان كل أبو او ولي امر يقول لعبزرانه اللي يصلي كل صلاه مع الجماعه له 5 ريال واللي يترك صلاة يخصم من مصروفه 5 ريال , بتقولون هذا بيصل عشان فلوس , ايه انا معاكم بيصلي عشان فلوس لكن بعدين بيتعوّد وبتصير الصلاه في المسجد حاجه سهله بدنياه بعدين إلا على طاري الدنيا بيوم من الايام طلعت للإستراحه وشفت لي اخوياي ولقيتهم ساكتين قلت وش بلاكم ؟ قالو ياخي طفششششششش !!! .... رجعت ودخلت البيت ولقيت اخوي بوجهي قالي يافهد طفشششش والله طفشششش ! رحت ادخل النت والمسن ولقيت واحدن حاط توقيعه في حدى المنتديات يقول ملينا طفش ! واللي كاتب في ماسنجره طفشااان لحد يكلمني ! عاد تصدقون ! احيانا احس ان الطفش وباء منتشر انتشاراً فضيعاً عندنا بس ودي اعرف وش سبب هالطفش ؟ هذا اللي عجزت القى له سؤال الزواج + الوظائف + الوسطات + انفلونزا + الصلاة + الدنيا وطفشها + البعارين تعمدت اتطرق لهالموضيع بأسلوب جديد وفكاهي يخرج بشكل نهائي قضايا وودنا نتناقش فيها انا وانتم اسألتي هي ( الزواج ) س / وش الاسباب بنظركم اللي تجبر الواحد يتم ع العزوبيه ؟ وعطونا أبرز الحلول س2/ تعليقك على زواج هالأيام وتكاليفه .. إلخ ؟؟ نبي بشكل مختصر ( الوظايف ) س3/ وش الأسباب بنظركم اللي خلت نسبة العطاله كثيره ؟ ونبي أبرز الحلول س4 / احيانا نشوف الواحد عاطل ومايرضى بوظايف عاديه ... تعليقك بشكل مختصر ( الواسطات ) س5 / وش رايك بالواسطات اللي ضررها أكثر من فايدتها ؟ وكيف نقدر نتخلص منها س6 / لو انك مكان الموظف المكروش من وظيفته عشان واسطة ! نبي بشكل مختصر ( انفلونزا ) س7 / يقولون ان مرض الانفلونزا كذب واحيانا صدق ! أبي كلامكم وش هو ؟ ( الصلاة ) س8 / هالأيام صارو الناس ماعد يصلّون مثل اول يعني اقصد في المساجد .. وش الاسباب ونبي حل يمكن نقدر نحل القضيه مع بعض ( الدنيا وطفشها ) س9 / ابي جواب للسؤال اللي مالقيت له حل مقنع ... ليه تطفش ؟ ووش معنى طفش ! ( البعارين ) س10 / وش رايكم نتاجر بالبعارين ترى يقولون بترتفع اسعارها صدق مامزح ترى والكلام من شريطي بعارين خبير ونسيت اقولكم ترى ماهو شرط تجاوب على كل الأسئله لك الأحقيه تختار القضيه اللي تبيها وتجاوب على الأسأله اللي خصصتها للقضيه ختاماً اتمنى يحوز الموضوع على رضاكم خصوصاً اني تعودت اكتب بهالأسلوب وقلت اجرب اكتبه في القناص ومنها اغير الروتين شوي وأعوض عن صيامي بكتابة المواضيع وان شاء الله أفطرت بفطور دسم شوي العضو الكاتب الساخر البسيط فـــهـــد