بسم الله الرحمن الرحيم
..
شخباركم شعلومكم آل مجلس .. 
والله من زمان عن المواضيع سواء بالمجلس او الجمهور الهلالي .. 
بسبب الاختبارات الله لا يعيده ..
المهم مالي بالطويله والله بعطيكم زبدة الموضوع ..
حابه اتكلم عن الإيمو .. والله انا قريت كثييير واكتسبت معلومات كثيره
عن الايمو وحبيت أختصره لكم في هالموضوع ..
..
ظاهره غربيه ..قذره .. دخيله على مجتمعنا العربي ..
انتشرت بين المراهقين وبالأخص البنات .. حتى الشباب ما قصروا بعد .. 
تعريف الأيمو ..
الأيمو في الأصطلاح / هم عباره عن بني ادمين يحملون فوقهم كومه من الملابس والألوان ..
و3 اطنان من السلاسل والجماجم وغالباً ما تكون باللون الوردي ..
يحبون
يسمعون اغاني الروك ..
انا اصنفهم واحس انهم فئه غريبه جداً ..
لهم حياتهم وجوهم وشكلهم الغريب والخايس في نفس الوقت ..
حتى حركاتهم غريبه .. وتحس من اول ما تشوفهم ان فيهم بلا .. 
كلمة Emo اختصاراً لـ Emotion معناها ..[الأنفعال والأحساس]
وتتميز هذه الفئه الي ربي ساخط عليها ..
ان اكثر الي يحبون هذا الستايل هم من المراهقين ..
الي اعمارهم من 15 وطالع ..
راح اشرح لكم حياتهم وعيشتهم بالتفصيل الممل ...
أولا ..
كيف عايشين .. او بالأصح طريقه معيشتهم .. !!
يحبون يمشون لحالهم ويقعدون لحالهم غير اجتماعيين
وقليل ما تلقى احد يمشي معهم .. وجيههم كئيبه ..
وبعض الاحيان تلقى وجيههم ..كأن احد مصفقهم .. يعني وجه يصيّح.. 
عندهم اعتقادات غريبه.. حتى حركاتهم غريبه...
نجي الحين لشكلهم .. الستايل ..
اول شي الوانهم ...اهم لونين عندهم الزهري والأسود ..
تجيك عيونهم .. كأن احد معطيهم بقوس على عينهم .. 
انوااع الدوائر بالكحل .. لا ويجيك الكحل من زين الطبايع
ساايح واصل خدودهم
الشعر
كله يجي على وجههم .. حتى يالله تميز الخشه وش فيها من ملامح ..
يجيك لونه اسود .. و فجاه لون فوشي فاقع ..
على اطراف الشعر ..
ولا يجيك خصله وحده لونها غريب موف ولا اخضر ولا ابيض ..
ويجيك موقّف كنهم حاطين اصابعهم بفيش كهرب ومشبص يعني طاير..
ملابسهم ..
يحبوووون الضيق ..واهم شي يكون فيه شعار ( شعار قبايلهم ) حقين الروك
وفيه بعد شي يحبون يلبسونه كثير .. الكروهات <- يوه يا قدمي كروهات هههههههه
طبعاَ غير الحلقات الي يحطونها في اذانيهم ..
والي تحت شفايفهم ... الخ الخ..
هنا صوره لأحذيتهم الله يكرمكم ..
الأساور ..
ام حدايد الي لو اكمخ احد فيها انحفر راسه من قوة ما هي بارزه
طبعاً .. هم يعشقون الترقيع .. يعني فجأه شي داخل عرض لون داخل عرض ..
شراب ماله دخل بالجزمه .. تي شيرت مدري وش يبي شكله..
وهذا هم بادين يتكاثرون .. ويتوالدون .. ويتطورون > بوكيمونات
قال ايش قال موضه ..!!
الله ابوها من موضه الي بتخليني اشين نفسي ..
المشكله ان الشعب اللطيف الي عندك ..فاهم الموضه غلط.
اي شي غريب يلله بسويه عشان يخقون معي العالم
واصير انا اول وحده سويت هذا الستايل ...
تفكير متخلف .. وسقيم في نفس الوقت ..
يعني ما ادري لين متى احنا على هالحاله ..
اللي اي شي يسوونه هااليهود عيال اليهود ..
نسويه على طول .. حتى لو كان حرام ..
بس اهم شي سوينا شي جديد ..
طيب فكروا قبل تسوون اي شي فكروا بشكلكم
كيف راح يكون عند الناس ..!
انا ما اقول .. لا تتبعون الموضه .. اتبعهوها بس بحدود
مو اذا طبوا في النار طبيت معهم ...
وعلى فكرة الستايل هو الي يعبر عن شخصيه الواحد..
يعني خلكم زي الاوادم .. واختارو شي صاحي ..
لشخصياتهم ..
يجيبون الكآبه .. من اول ما تشوفهم
يقولون ( اننا دايم منبوذين من مجتمعنا لأن محد يفهمنا ) ..!
عندهم ميول انتحاريه
يعني يجرحون نفسهم .. ويكتبون على اجسامهم اشياء .. ودايم تلقاهم مغطين يديهم ..
عشان الجروح والبلاوي الي فيها ما تبين..
يحبون يكتبون الشعر الحزين > والله طلع شي مفيد فيهم 
متشائمين ..ويكبرون المشاكل الي تصير في حياتهم ..
(الأيمو ليس ديناَ ..انما هو ثقاافه ثانويه ..ينتمي اليها مراهقوون عاديين .. لهم اديان مختلفه .. )
وفي جامعتنا بادين ينتشرون بشكل كبير ..
فيه وحده معي بالقاعه .. من نفس الستايل هذا..
كانت حاطه تعليقه بجوالها الي هو شيطان صغير مدري وش لون شكله غريب
المهم كنا قاعدين نستى الدكتوره جت وحده من صاحبات الأيمو وقالت لها
وش هذا الي معلقته انتي ..!
قالت البنت الأيمو .. خليييييييييه هذا حبيبي...
وتمسكه وتقعد تبوسه ..
وتقول .. هذا شيطونتي الصغير ..
وانا الي تطير عيوني وش حبيبك ..!
شيطااااااااان .. حبيبك .!!
..
يارب لا تسخط علينا ..
وقسم اني قمت ادعي له ان ربي يهديه لنفسه .. ويشفيه بعد
ادري ان فيه بعمرنا مرحله .. نحب ندور عن اي شي جديد ..
الي هي مرحله المراهقه ..
وادري بعد ان في الفتره هذي نتأثر بالناس الآخرين ..
وكل هذا الي يصير مرحله طبيعيه .. عند كل مراهق ومراهقه ..
بس المصيبه لا استمر هذا الوضع .. ولا احد نبههم وعلمهم ..
وش الصح ووش الغلط ..!
ووش الزين ووش الشين ..!
كذا بنروح وطي حنا ..
هذولي انا اسميهم / [ ضحايا الموضه ]
لانهم من جد ضحايا ..
واحب اقول لكم انه شباب الإسلام ما زال يراكض و يتابع وبقوه بعد أحدث
واجدد الحركات الي بدلوها بمسمى الموضات..
ونسى الهدف الأساسي الي خُلق عشانه ..
ومازالت بعدهذه الحركات الشيطانية تتابع في ظهورها للأسف ..
فمن عبدة الشيطان إلى الايمو الله لا يديمو
وغيرها الي انتشرت بين أبناء المسلمين ..
وهذي صور عن الإيمو حبيت أجمعها لكم ..
..
صرخة ..
إلى شباب الإسلام قد رزقكم الله العافية وكمال في خلقته وعقلا يميزكم عن بقية خلقه
ويدان تكتب وعينان تعي ما تقرأ فهل هذا شكر نعمته تعالى عليك
أما جلست يوما تتفكر كيف سيكون حسابك وأنت قد جازيت الشكر بالإساءة ..؟
وتذكروا أن من تشبه بقوم فهو منهم
الموضوع من عملي ..
روح ..