.. السلام عليكم ورحمة الله .. قد عرف عن أجدادنا وشيوخنا الحكمه والاصاله العريقة .. ومنهم اقتبسنا تلك الحكم .. فـ أصبحت شي مهم وأساسي يتداول بيننا .. بتلك الحكم استرجعنا ذكرى الماضي العطرة , وهنا سـ نحلق بعيداً مع حكمهم التي يفوح شذاها الزكي بيننـا .. البداية :- * أكل ومرعى وقلة صنعـا .. - معناته : يضرب بالشخص العجاز الخامل اللي ما عنده لا شغل ولا مشغله .. هالمثل شيء مب صاحي ما يمر يوم الا وأمي قايلته لي * أحر ما عندي أبرد ما عندهـ .. - معناته : يضرب بالشخص اللي يجيه واحد مهتم مرهـ ويتجاوب معه ببرود .. * حوفج يالرفـلة إكليه او طبخن طبختيه يالرفـلة إكليـه .. - معناته : اذا سويتي أي شي وطلع مب زين او حواق وخرابيط يضربونه فيتس طبعاً كل ما دخلت المطبخ ينقال لي ذا المثل المخيييس * انطر ياحمار لين يجيك الربيع خخخ .. - معناته : يضرب للي يؤمر بالانتظار الطوييل وهو في وقت مستحيل الانتظار فيه .. شي اساسي اذا ما تقوله العايله الكريمة ض1 * إما حبا وإما برك .. - معناته : يعني اما الشيء كله او ولا شيء .. مثلاً انا اذا قلت لأمي أبروح السوق بس باخذ شي واطلع بعدين اقعد اقش كل شي عاد فوق راسي [ لحوووول إما حبا وإما برك ] * اتكل عويس على مويس وضاعت البقرة .. - معناته : يضرب للي يتكل على غيره ويصير شي مب من صالحة وبعدين يضيع كلش .. * قال تيس قال إحلبوهـ .. - معناته : يضرب للي يكابر بالأمور وهي واضحة او يعطي راي غريب في امر واضح .. * يد وحده ما تصفق .. - معناته : يعني التعاون بين الجميع احسن وافضل * اذا حجت البقر على قرونها .. - معناته : يضرب للأمر اللي مستحيل يصير .. هذا بطل واكيد كلكم تقولونه * اذا شفت صاحبك عسل لا تلحسه كله .. - معناته : يعني اذا كان صديقك وَفِي ومخلص لك .. لا تضيق عليه او تلحسه على قولة المثل خخخخخ * اذا فات الفوت ما ينفع الصوت .. - معناته : يعني ما فيه فايده بعد فوات الأسباب أو الأمور .. * البيت بيت ابونا والقوم طردونا .. هذا المثل احب اقوله كذا بس * من بغا الدح ما قال اح .. - معناته : يعني اللي يبغى شي و وصل له بس صار صعب عليه مررهـ وقعد يتشكى ينقال له ذا المثل .. * ديتس ومآكل فلفل .. ( ديك ) - معناته : يضرب بالانسان اللي كلامه كثير وما ينفهم وما يسكت يعني زي الديك اذا اكل فلفل احمر وقعد يصيح طول اليوم * حامض على بوزتج .. ( بوزك ) - معناته : اذا عندك شي وجاك شخص وهالشخص عاجبه هالشي بس يقول انو ما ابيه ويع ومب حلو عاد اجي اقوله حامض على بوزك * سعيد اخو مبارك - معناته : يضرب لـ الشيئين اللي نفس بعض .. * ما يعرف كوعه من بوعه او ما يعرف كوعه من كرسوعه .. - معناته : للي يتكلم عن شي واخر شي يطلع ما يدري وش السالفه * ما انشقت بس تخّر .. - معناته : يضرب لـ اللي يهون المشكلة او المصيبة بس بشكل مضحك * الطول طول نخله والعقل عقل صخله .. - ما يحتاج اقول معناته الكل يعرفه عسا بس ينقال لكم ؟ * جاك الموت يا تارك الصلاة .. * علمناهم الطّراراهـ و سبقونا على البيبان .. - معناته : اذا احد علّمك شي وهو لسى ما بعد سواهـ وتروح تسويه قبله .. زي مثلاً انا عندي طريقة طبخه واروح اقولها لوحدة وبنفس الوقت اقول لها اني بسويها لفلانه .. وتجي البثره وتروح تسويها قبلي وتوديها لنفس الفلانه تسلبه هذه تقريبا اشهر الأمثال اللي تُضرب .. بس فيه امثال او جُمل مدري وش معناتها وهي تكون لكل قرية او زي كذا مدري يعني وشي بالضبط .. انا ما اعرف الا واحدن من ديرتنا يقول لك * ما دريتااااااا ؟ المأذن رقى فوق المصّعدهـ , وخبّط ولبّط .. < اللي يقوله سديراوي اباً عن جد خخخخ " هذي بعض الأمثال اللي يحبونها البنات وتتكرر معهم دايم " - انين المشاعر: 1 :. موت في عز خير من حياة في ذل .. 2 :. السكوت أبلغ من الكلام .. - نسايم الهلال : عندي اثنين دايم اقولهم الموت مع الجماعة رحمة و اللي على راسة بطحة يحسسها - اوكسجين : ما في شيء معين بس يمكن .. مد رجليك على قد بساطك او ماكل مايتمناه المرء يدركه تجري الرياح بما لاتشتـهي السفن قبل الختام .. سـ أطرح تساؤلات عدة .. منتظره شذى كلماتكم , سـ1: شرايك بالموضوع بشكل عام يعني [ الأمثال اللي تُضرب ] ؟ سـ2: وشي الأمثال اللي تحبونها ودايم تقولونها او تنقال لكم ؟ سـ3 : اذا انتـ/ـي مثلا من أي ديره .. عندكم مثل مُعين تقولونه ؟ شكر كثييير اكثر شيء لأنين ع المساعدة .. ما قصرتي والله لكمـ تتمة الحديث لتكملوها ( ) ..