.
.
~ نثـر قصائـدهـ , ففـرش بهـا الورد
لـ تمهيـد الطريق إلى قلوب العاشقين
وصلـوا لإستراحـه بين طيـات الحـروف
ولأزفـ لكـم بعض قصـائدهـ ..
.
.
.. { يــا كـويـــت ..
يا كويت يا أجمل مدينة في الوجود
يالنغمة اللي ما يزغردها كمان
يا رحلة البحار لأمواج الخلود
وقصة كفاح البدو في وجه الزمان
انتي الوحيدة كلما عمرك يزود
يزداد حسنك .. فوق آلاف الحسان
اخذي المشاعر والأغاني والوعود
اخذي الصدور اللي مليتيها حنان
وقت المصيبة كلنا سباع وأسود
ووقت الأمان .. أهل البراءة والأمان
تنقلي .. بين التطور والصعود
تبختري في كبرياء وعنفوان
لا تزعلين ولا تحاتين الحقود
دامك كسبتي كل جولات الرهان
ياكويت يمكنك صغيرة في الحدود
لكن انا اشوفك نهايات المكان
لو طفله بالجهرا بكت خوف الرعود
تنبض قلوب الأمهات اللي فـ بيان
ومنتي بحاجة مهرجان ولا ورود
لأنك انتي بحد ذاتك مهرجان
.
.
.. { أمـــاهـ ..
ننزل ولكن الهوى يظل صاعد
ونموت ويبقى الشوق ينثر هداياه
اللي يعاني في الشتا وما يواعد
عليه يطول الليل .. ويضيق مأواه
في الليل أشتاق لرنين المضاعد
محلاه .. في وسط التناهيد .. محلاه
واشتاق عنقك والنحر والسواعد
واشيائك اللي سببت لي معاناه
حنا عشقنا والبخت ما يساعد
وحنا كتبنا واحترق ما كتبناه
يا حبي .. أمرض كلما احنا نباعد
واطيب اذا شفت بتلفوني ( امممااه )
.
.
.. { بــدون ..
إذا انولدنا نرفض الدنيا ونبكي بالمهاد
واللي رفضوها نفسهم من أجلها يتذابحون
صادفت بنت عيونها أوسع من حدود البلاد
وفي وجهها حزن المواني لما يغشاها السكون
كانت شفايفها مثل جرح يدّور عن ضماد
وكان البخور بشعرها يتحدى عطر الزيزفون
يا حسرةً على العيون اللي غفلو عنها العباد
كأنها محل ورد .. ونظرتي أول زبون
سألتها شسمك ؟ وقالت ( نادني بنت الرماد )
سألتهـا من وين هذا الهـم ؟ قالت لي ( بـدون )
يعني انا الحلقة الأخيرة من حكايا السندباد
يعني انا من ناس ماتو قبلما هم يولدون
أحيانا أضحك بس قلبي مرتدي ثوب الحداد
هم أكثر أهل الأرض أحزاناً .. هم اللي يضحكون
لأن الضحك مقرف .. ولكنه يخفف الاضطهاد
ولأن الفرح مثل الحبيب اللي نداريه .. ويخـون
قلت اسمحي لي أسكن بكحلة عيونك .. في السواد
اللي يذكرني بجنون العقل وبعقل الجنون
مشتاق اسافر وانتي تدرين السفر محتاج زاد
دفتر صغير ملوّن وأقلام وأحلام وظنون
علْميني فنون التحدي والبراءة والعناد
وعلّقي في داخلي صورة زرازير وغصون
وجاملي الدنيا مثل ما جاملتها شهرزاد
هذا هُو التاريخ يكرر لعنته عبر القرون
أجسادنا لولا الأمل صارت من أصناف الجماد
والا وش اللي يحمّس الأطفال بانهم يكبرون ؟
ترى البشاشه بذرة العشاق والحب الحصاد
ولا نفع هاملت سؤاله ( هل أكون أو لا أكون ؟ ) ..
وترى الفراشة عمرها أقصر من أعمار الجراد
لكن ما تحسد جرادة عايشه من غير لون !
.
.
.. { متهـم بـ الطفـوله ..
كلهم يبوني أشطب الحب وأنساه
يبوني أذبح نفسي بهالسهولة
شعري انا محد من الناس يقراه
محد يحاول يفهم اللي اقوله
وإذا حبيبك ما ربح في قضاياه
لأن حبيبك متهم بالطفولة
لأن حبيبك يرفض اللامبالاة
ويحلم ينظّف كل الأشياء حوله
هذي المدينة غارقة بعمق مأساة
تحتاج إلى عشقي وطيشه و فضوله
تحتاج همس الناي .. ورقة موسيقاه
والوز يبلل في البحيرة ذيوله
وقوس القزح اللي من الجو طردناه
وملائكة وأحلام ونجمة خجوله
ودي أغيّر واقعي واتحداه
ولو ميولي تختلف عن ميوله
يا واقعي انسى اسمي والا تناساه
ترى بدوس بعرض وجهك وطوله
ما جيت للعالم أعيش بزواياه
جيت أتحرش بالشعوب الكسولة
جيت أحمي ظهر الحب من سيف أعداه
اللي وصفو غباءهم بالرجولة
أرمم التاريخ وأغفر خطاياه
وأبني من ألوان الفراشات دولة
وإذا القدر بطش بجسمي وأفناه
إذا حصل ما كنت أخشى حصوله
وغاب الهوى وذابت مع الوقت ذكراه
والموت باغتني بزيارة عجولة
ماقول انا في ضيقة اللحد وظلماه
بغازل قبور النساء المهوله
لكن بهزّ الموت وأهزم نواياه
وأعلمه فن البقاء وأصوله
بموت ؟ نفرض مت ! شاللي أبخشاه ؟
الورد يغني رغم سرعة ذبوله
هذا شعاع الشمس يوزع هداياه
حتى واهو يدري بموعد أفوله
.. [ الرجـاء عـدم الـــرد ] ..