تراني امزح اللي يبي يصوت يصوت واللي مايبي بكيفه ورح اكمل لكم القصة
يالله اقروا يامال العافيه<<بتتصفق
7
7
7
7
7
نزلت لعند المسبح وشافته جالس وراسه بين يدينه خافت اكثر..راحت جلست مقابله...
ريناد: محمد
محمد وهو يرفع راسه: هلا ريناد
ريناد: خوفتني فيك شئ؟
نزل راسه يطالع الطاوله ..ايش اقول لها؟؟كيف ابدء..
اما هي دق قلبها بقوه.....
محمد: ريناد باقولك شئ بس خليك ريلاكس
ريناد وهي تبلع ريقها: اوكي
محمد: الرقم اللي عطيتيني اياه
دق قلبها اكثر..احمد ...شفييييه؟
ريناد: شفيه رقم احمد
محمد بنظره استهزاء: قالك ان اسمه احمد؟
ريناد: أي احمد....محمد تكلم عاد
محمد: اممممممم طيب ريناد انا اعرف هالولد ..
ابتسمت له وفرحت من قلبها...
ريناد: جد تعرفه؟؟؟
محمد: أي اعرفه بس....
ريناد: بس شنو؟؟
بعد صمت دام ثواني..
محمد: عنده حركات
ريناد: حركات؟ مثل شنو؟
محمد: اممممم يعني يدخن ويقولون مغرور و
ريناد: ههههههههههه هذي الحركات طيحت قلبي يامحمد عادي كل الاولاد يسوون هاالحركات...
انقهر ولام نفسه لانه جبان وماقدر يقول لها الصراحه,....
محمد بارتباك: اوكي انا حبيت اقولك بس
سكت وسرح بعييد ...لاحظت هاالشئ ....وقالت وهي تبتسم
ريناد: هاااا شفيك سرحان ليكون حنينا للحبايب
محمد بحسره: ايييه سماح؟ مادري ايش اخبارها مرتاحه ولامتضايقه...وحشتني
ريناد: محمد مانسيتها؟
محمد: حتى لو على جثتي
ريناد: بس حبك مستحيل يامحمد
محمد: أي ادري ياريناد مالي امل معاها بس ايش اسوي ..هي القلب والروح كيف احيا بدونها
ريناد: الله يعينك ياولد عمي بس نصيحه مني انساها وعيش حياتك
محمد: لاتضحكيني ياريناد انساها؟؟مجنون انسى قلبي
تنهدت وسكتت...الله يعينك يامحمد على حبك ويسعدك
محمد: ساكته
ريناد: ايش اقولك...مليت من كثر ماانصحك بس الظاهر مافيه فايده
محمد: عليك نور مافيه فايده...وسماح مستحيل انساها
ريناد: بس حرام
محمد باندفاع: لامو حرام..حرام اللي تقولينه كيف انساها وانا متأكد انها مانستني للحين
ريناد: خليك واقعي البنت تزوجت واذا تذكرتك مع احتمال 40 % خلاص عاشت حياتها الدور والباقي عليك
محمد: ريناد ارجوك هاالموضوع منتهي
ريناد: براحتك محمد...
محمد: الاصح ابوي مااشوفه يكلم هااليومين
ريناد: دق عليهم
طلع جواله ودق عاالبيت جات خلود ورفعته..
خلود: الووو
محمد: خلود؟
حلود: محمد؟؟هااي سويتي هاو ار يوو؟
محمد: انا بخير يالدبه انتي اخبارك واخبار ناصر
خلود: تمام بخير
جات ام محمد لماسمعت اسم ولدها وسحبت من خلود السماعه...
ام محمد: محمد ولدي
محمد: هلااااا ياالغاليه وحشتيني اخبارك
ام محمد: بخير وانتوا اخباركم واخبار اختك عسى مو مجننتك
محمد: طلعت لي قرون يمه ليل نهار باالسوق
ام محمد: هذا موصيتها بعد ماعليه اذا رجعت اوريها
محمد: لايمه خليها تتونس مو كل يوم بنجي الامارات الا ابوي شخباره؟؟وينه عندك؟
ام محمد: لاوالله باالشركه لازم بيكلمك الليل
محمد: خلاص انتظره يمه ريناد تبي تكلمك
ام محمد: عطني اياها...
اخذت ريناد الجوال حتى تكلم ام محمد اللي تعتبرها مثل امها باالضبط
ريناد: الوو
ام محمد: هلا بنيتي ريناد اخبارك حبيبتي
ريناد: هلا خالتي وحشتيني والله
ام محمد: مايوحشك غالي اخبارك مستانسه هناك؟
ريناد: أي والله ليتكم معانا خلاص عاد مانسافر دونكم ...السفر دونكم مو شئ
ام محمد: حبيبتي والله ريناد..المهم انتبهوا لنفسكم زين وقولي لشوق تخف على اخوها شوي
ريناد: ههههه لاتوصين ...سلمي على عمي كثييير
ام محمد: يوصل وانتي سلمي على حور والكل
ريناد: الله يسلمك تبين شئ خالتي؟
ام محمد: سلامتكم بس خلي هاالقاطعه حور تدق علي
ريناد: من عيوني مع السلامه
ام محمد: الله يسلمك
عطت محمد الجوال وقامت...
محمد: وين؟
ريناد: باروح لحور
محمد: اوكي
صعدت وهي داخله الممر اللي فيه غرفهم شافت مازن طالع من الغرفه وكان مخطط يروح مقهى ويكلم الجوهره..كان لابس بلوزه سوداء وبنطلون كحلي.....
ريناد: هاااي
مازن: هلا
ريناد: وين رايح؟
مازن: مقهى انترنت
طارت من الفرحه وابتسمت ابتسامه عريضه
ريناد: لاتمزح مزوون
مازن: ليش امزح عاد
ريناد: ياالله وحشني النت...يصير اروح معاك بليييز؟؟
مازن: من وين نازل عليك السنع
ريناد: انا سنعه من يومي
مازن: بتروحين يلا نقول لبشار وشوق بعد
ريناد: بس بدخل اكلم حور شوي
دقت الباب دقات متتاليه...طلع لها وجهه ماهر وهو مكشر وشكله كان ناايم..
ماهر: ماتخلوا احد ينام براحته...تفضلي انسه ريناد
ريناد وهو تدخل: هههههههه سوري عاالازعاج وين حور؟
ماهر: تسبح الحين بتطلع
ريناد: تسلم عليك خالتي
ماهر: الله يسلمها كلمتيها؟
ريناد: أي من شوي
طلعت حور من الحمام وهي تجفف شعرها
ريناد: ياالدبه كلمتين ورد غطاهم كلمي امك تحاتيك
حور: ليش مستعجله؟
ريناد: باروح مقهى انترنت
ماهر: مع من؟؟
ريناد: مازن وبشار وشوق
ماهر: طيب روحي خذي فلوس من ثوبي
ريناد: عندي ماهر امس عطيتني
ماهر: اوكي يمكن ينقصك المبلغ يمكن تمرون سناتر واسواق
ريناد: معاك حق
راحت وحضنت اخوها وحبته على راسه...
ريناد: الله لايحرمني منك
ماهر: ولامنك ياالدلوعه انتبهي لنفسك
,,في القهى,,,,,,
جلست ريناد جنب شوق جهه البنات ومازن وبشار جهه الشباب...
اول شئ سوته ريناد فتحت ايميلها صابتها خيبه امل كبيره يوم مالقته, مازن كان بيفتح الايميل لكن ..
مازن: بشار مو فاضي لحظه بفتح الايميل
بشار: بلا ايميل بلا هم تعال اوريك حاجه بسرررعه ترى مااكلمك
مازن: ياااي مرره قلبي عورني مالت عليك
بشار: اووه انت تعال
قام مازن لعند بشار وراه مقطع فيديو لبنات يرقصون بعرس..
مازن: والله انك فاضي استح يلا امسحها
بشار: وانا ايش دخلني من اول موجوده
مازن: امسحها بلا هم...
ريناد سكرت ايميلها ولفت لــشوق الجالسه عاالشات...
اما هو فتح ايميله وكله شوق لها لكن نفس خيبه الامل صابته ...اااه ياالجوهره وينك عني وربي افتقدك متى بس الاقيك عاالنت واقولك اللي في قلبي كله ترك ايميله مفتوح على امل تدخل لكن ريناد فقدت الامل وماعاد تفتح ايميلها....
لفت شوق على ريناد وشافتها صحيح تناظر الشاشه بس سرحانه..
شوق: الووو الحلو وين وصل؟
ريناد: معاك
شوق: صح باالعيد
ريناد: شوق مو رايقه لك
شوق: اوووه .ليكون مالقيتيه اون لاين
ريناد: مالقيته ولاشئ..
شوق: اها علشان كذا..
قامت ريناد من جهازها وجلست على كرسي عند جهاز شوق..
جات بهاالوقت بنت اماراتيه لهم..
شيخه: مرحبا الساع
ريناد-شوق: مرحبتين
شيخه: سوري عاالازعاج
شوق: لاعادي شدعوه
شيخه: عفوا بس هاالجهاز مو يالس عليه حد..بس شفتج من ساعه يالسه عليه..
ريناد: تفضلي مااحتاجه
شيخه وهي تجلس: مشكوره
شوق: حياك
شيخه: من السعوديه صح
شوق: صحيحين
شيخه: هيه عرفتكم من رمستكم
شوق: احم احم لهاالدرجه احنا مميزين
شيخه: هههههه ياحليلج هيه..احس جي حجيكم ينعرف بسرعه
شوق: وانتوا بعد كلامكم حلووو ودي اتعلم لهجتكم
شيخه: ارمسي عادي سهل..ترى الحجي الاماراتي ماشي اسهل عنه
شوق: لاترمسين خلاص باموت جذي
شيخه: هههههههههههه شاطره تعلمتي بسرعه
ريناد: من كثر ماتقرأ قصص اماراتيه
شيخه: وليش اماراتيه باالذات
شوق: يااااه اموت باالقصص الاماراتيه حلووه فيها حب صادق
شيخه: لايغرج يا....عفوا شسمج الشيخه؟
شوق: شوق وهذي بنت عمي ريناد
شيخه: عاشت الاسامي....لايغرج ياشوق كله قصص وكلام بس الواقع غير ماشي حب عدل هاالايام الشباب حياتهم لعب في لعب
شوق: اصابعك مو سوا ياشيخه
شيخه: هيه صادقه بس اقصد الأغلبيه جي..يرمسون البنت باالتلفون يقصون عليها وبعد ماتحبهم المسكينه يودروها
ريناد: اوكي يودروها يعني يتركوها؟؟
شيخه: هيه يتركوها
ريناد: ايووه بس حلوو كلامكم
شيخه: شو ح** المعجبين باالحجي الاماراتي
شوق-ريناد: ههههههههههههههه
سمع بشار ضحك الثنتين ولف شاف شيخه معاهم...
بشار: مزوون مزوووون
مازن وعينه عاالشاشه: نعم
بشار: والنعامه ترفسك قول امين...شوف
مازن: شنو؟؟؟
بشار: والمنشار اللي يقص لسانك ياالدب لف وشوووف لايفوتك القمر
مازن: على اساس القمر يطلع بالليل واحنا لسه نهار
بشار: شوف القمر الجالسه مع ريناد وشوق
لف طالعها مازن ببرود ورجع يطالع الشاشه...
مازن: أي مافيها شئ عاديه
بشار: باالعكس حلووه طالع عيونها باروح لهم
مازن: الحين شوق تعصب عليك
بشار: لاماتعصب تعرف انها القلب
مازن: الله يهديك
بشار: جميعا...باي ياحلو
قام بشار من كرسيه وراح عندهم....
بشار: مرحبا الساع
لفت شوق تطالعه ورجعت تطالع ريناد وهي مستغربه منه...من متى الاخ يحكي اماراتي بعد..
الثلاث: مراحب
بشار: اخبارك شوق
ضحكت ريناد عليه...
شوق: انا بخير نعم أي خدمه؟؟
بشار: لاشفت معاكم ضيوف قلت اسلم
ريناد: أي هذي شيخه....شيخه هذا اخوي بشار خطيب شوق
بشار: اخبارك شيخه؟
شيخه: مانشكي باس انت شحالك اخويه؟
بشار: تمام
سحب له كرسي وجلس معاهم....
شوق وهي تكلمه في اذنه: قوم لاادوس في بطنك
بشار: روحي زين
شوق: لاوالله قوووم
ريناد : وكم عمرك ياشيخه؟
شيخه: 18 سنه اولى جامعه
ريناد: ماشاء الله حلوو
شوق: الله يوفقك
شيخه: جميعا يلا اسمحولي الحين
حبت شيخه تنسحب لانها لاحظت توتر الجو خاصه ان شوق واضح انها معصبه...
ريناد: وين بدري
شيخه: فرصه سعيده وحياكم باالامارات مع السلامه
ريناد: الله يسلمك....
بعد ماراحت شيخه واختفت لفت شوق لبشار...
شوق: ايش هااللي سويته
بشار: ماسويت شئ
ريناد: اووه انا حاسه انكم بتتهاوشون
شوق: نتفاهم..عيب هااللي سويته لاوتكلمها عادي كأنك تعرفها
بشار: انا سلمت عليها لااكثر
شوق: حتى لوو
بشار: انتي اصلا عقلك صغير
شوق: انا عقلي صغير؟؟؟؟ماكأنك انت الغلطان
بشار بعصبيه: ماغلطت وبعدين واذا جلست معاكم فيها شئ؟
شوق: الا فيها وفيها
بشار: انتي عارفه زين اني احبك ومستحيل افكر او اطالع غيرك بس عقلك صغير الله يهديك
قال هاالجمله بعصبيه حتى ان مازن سمعه وحمد ربه ان المقهى مو زحمه حتى ماتصير فضيحه...
قام دفع عنهم الحساب وجاء لهم....
مازن: خير خير؟
ريناد: أي خير تهاوشوا كاالعاده
مازن: انا مو قلت لك لاتروح لهم
بشار: مازن مو ناقصك طيب...الغلط مو مني
شوق: طبعا انا دائما الغلطانه في نظرك
ريناد: خلاص بشار وشوق فضحتونا ماصااارت
شوق وهي تقوم: انا طالعه
بشار: وين يابعدي رايحه
شوق بعصبيه : انت مو شغلك طيب ولاتكلمني بعد
بشار: احسن بعد
شوق: أي هذا اللي تبيه لكن تدري كيف لك اللي تبيه وانسى ان عندك بنت عم اسمها شوق
طلعت من المحل ودخلت المول اللي قريب نسبيا منه....
مازن: وين راحت بعد شوق
ريناد: اكيد دخلت السنتر
بشار: انا برجع الفندق
مازن: الله يهديك نرجع سوا
بشار: اتركوني براحتي باي
طلع وقف تاكسي ورجع....
ريناد: طيب
ريناد: الله يهديهم
مازن: اميين..مادري متى بيتركون هاالحركات
ريناد: يلا نروح لشوق
مازن: يلا
دخلوا المول ولفوا الدور الارضي كله....
ريناد: مازن انا تعبت خلاص
مازن: وانا اكثر منك وين راحت يعني
ريناد: الله اعلم
مازن: خليني ادق عليها
ريناد: ماتطلع بجوالها السوق
مازن: اووف اجل ليه شايلته معاها...طيب والحل
ريناد: انا عندي حل...اجلس انا في هاالكوفي وتروح انت تدورها
مازن: لاعااد؟
ريناد: أي والله
مازن: كلمه ثانيه واذبحك
ريناد: واهون عليك؟
سكت وقام يطالعها بصمت ونظرات عميقه...ذابت من هاالنظرات وحست ببروده تلف جسمها...بعد ثواني حست لنفسها...
ريناد: اممممم
مازن: اه.احم خلاص نريح شوي وندورها بعدين
ريناد: اخاف تمل وتدورنا ماتشوفنا
مازن: ذي تمل من السوق مااظن
ريناد: حرام عليك اكيد تبكي الحين
مازن: لاصدقيني تتسوق
جلسوا في الكوفي يشربون قهوه اكسبرس...ولما خلصوا صعدوا الدور الثاني يدوروها...ومالقوها
ريناد: ياالله....والحيييييين شنسوي؟؟
مازن: مادري هذي وين راحت
ريناد: امممممم يمكن في الحمام تبكي
مازن: عن الاستهبال ...
ريناد: ايي ليش لا
مازن: طيب هذا حمام نساء ادخلي يمكن تشوفيها..
دخلت ودورتها بين جموع البنات....بس مالقتها..راحوا لحمام ثاني دخلت وماتفاجأت لما شافت شوق واقفه وتبكي...راحت على طول وحضنتها
ريناد: خلاص حبيبتي لاتبكين
ماهدأت شوق باالعكس زادت من صياحها...
ريناد: شوق علشاني هدي حالك
شوق: رينااد احبه
ريناد: وهو يحبك اكثر
شوق بصوت مبحوح: لامايحبني ماسمعتيه ايش قال لي
ريناد: لانه معصب مو من قلبه...
طلعت ريناد منديل من شنطتها ومسحت دموع شوق وطلعوا وكان مازن مكانه ينتظر ....
مازن: انتي هنا واحنا قالبين عليك المجمع كله
شوق: ـــــــــــ
طالع مازن ريناد بنظره تساؤل وبنظره من ريناد عرف انها كانت تبكي...
مازن: شوق
شوق: نعم
مازن: حرام عليكم والله اطفال ..وبعدين بشار يمزح
شوق: لاتدافع عنه يامازن
مازن: خلاص براحتك يلا نرجع
ريناد: يلا...
.............
انسدحت على سريرها وجات هبه على بالها...اي ليش ماادق عليها ومنها اعرف اخبار حبيب قلبي..
هبه كانت تحط مكياج لانها بتطلع....لما سمعت صوت الجوال ركضت ورفعته
ورود: الوو
هبه: هلا وغلااا
ورود: هلا اخبارك ياالقاطعه ولاتقولين عندي صديقه اتصل اشوف اخبارها
هبه: هههههههه سوري حبيبتي انشغلت المهم اخبارك؟
ورود: اااه اخباري عادي
هبه: شفيك؟؟
ورود: انتي عارفه....اخباره؟؟
هبه: مازن؟؟؟ هههههه تمام كلمته امممم مادري امس او اللي قبله تدرين مع من كان قاعد؟؟
ورود باندفاع: من؟؟؟؟
هبه: مع ريناد باالمطعم لوحدهم تخيلي
ورود: تمزحين؟؟؟؟؟ رينادووه قاعده معاااه ؟؟؟اياالقهر شتبي هذي فيه
هبه: هههههه معجبه يمكن.. الغريب ان مازن شكله كان فرحان ويضحك عادي
ورود: مبسوط حضرته هين اوريها
هبه: ايش بتسووين؟؟
ورود: مالك شغل بتشووفين ايش باسوي لها ..
هبه: الله يستر من افكارك
......................
لما وصلوا الفندق تقدمت شوق ريناد ورمت نفسها على سريرها..اما ريناد ماحاولت تكلمها بأي طريقه حتى ماتضغط عليها وتزعجها...مازن لقى محمد يطل من نافذه الغرفه على بشار اللي جالس عاالمسبح حزين...
مازن: السلام
محمد: وعليكم السلام
مازن: ايش تسوي؟
محمد من غير نفس: ولاشئ
مازن: اها طيب وين بشار
محمد: عاالمسبح
مازن: طيب تعال ننزل نجلس وياه
راح محمد وانسدح عاالسرير وتغطى باالفراش
محمد: نعسان بنام انزل لوحدك
سكت مازن وهو يفكر ومحتار..شفيه محمد متغير علي انا شسويت له؟؟ مااذكر اني زعلته بشئ او ضايقته..
مازن: محمد
محمد:ــــــ
مازن: نمت..؟؟
طبعا محمد ماكان نايم بس ماتكلم لانه اصلا مو حاب يكلم مازن...
مازن: طيب براحتك
طفى الانوار ونزل جلس مع بشار
........
بعد ماسكرت من عند مازن دقت دايركت لشوق الي كانت شبه نايمه وسكرت من عند بشار....
شوق: الووو دبه
ريناد: نااااااااااايمه؟؟
شوق: لااا شفيك صاير شئ؟؟
ريناد: شوقووووووه كلمته
شوق: من؟؟ احمد؟؟؟؟؟؟؟؟
ريناد: أي
شوق: مجنونه انتي؟؟؟؟؟؟؟؟ وايش صار
ريناد: شوق يحبني مثل مااحبه
شوق: لاوالله مبرووك انقلعي باي
ريناد: شوق لاتكلميني كذا شفيك؟
شوق: قلت لك لاتدقين ليه تعاندين
ريناد: حتى مايزعل واعرف الموضوع اللي بيقوله لي
شوق: أي موضوع يهم الامه الاسلاميه عسى بس تحررت فلسطين؟
ريناد: باااايخه شوشو
شوق: وكيف طلع ؟؟
ريناد: اااه يجنن ياشوق اسلوب وكلام عسل ومحترم ماغلط معاي ولا كثر حكي
شوق: الله يساعد قلبك
ريناد: باكلمك بكره وباقولك التفاصيل
شوق: اوكي باي
ريناد: باي..
....
رجع مازن راسه عاالمخده وارتسمت على ملامحه ابتسامه....لااكيد انا في حلم مااصدق لبت طلبي ودقت..يالله ايش قد همساتها حلووه...بيني وبينكم حبيتها..لاستغربون حبيتها هاالانسانه...
ملاك والله ملاك ومستحيل الاقي مثلها ...طيوبه وحبوبه تخاف علي ويمكن....تحبني..ليش لا
انا ايش ناقصني ماتحبني مافي بنت تعيف مازن...لااا بس هذي غير ...
لكن راح اخليها تحبني تبادلني مشاعري فتح جواله وخزن رقمها بأسم الامـل..
بعدها قفل جواله حتى ينام مرتاح..ومحد يزعجه..بس وين تجيني الراحه وهي اكيد بتسكن افكاره طول الليله...
ياربي كيف قدرت بنت تدخل قلبي بهاالسوله....بس ايش مصيرنا مع بعض...
حس ان لسه النهايه صوره معالمها مشوشه ومو واضحه للحين..
........
صحى وحس نفسه مفعم باالحيويه والسعاده لف عليها بسرعه...الحمدلله مااحلم يعني.قام راح لناحيتها تأمل ملامح وجهها البريء وخصلات من شعرها طايحه عليه بعد الخصلات عن وجهها ...
تحركت وشالت يده ضحك على حركتها وحب يعاندها ويعيد الحركه..
وهي لازالت مغمضه بس من تكشيره وجهها ينعرف انها منزعجه....
خلود: اوووه شووق روحي عني
ناصر: هههههههههه شوق يالدبه...
فتحت عينها على طول صوت رجال..ركزت شوي ناصر يالله الظاهر نسيت اني امس متزوجه
ناصر: احلى صباح حبيبتي
خلود: صباح النور
رفعت يدها بتعب ورفعت شعرها كله بمشبك..
خلود: كم الساعه؟
ناصر: اممم 11 ونص
خلود: اووه تأخرت في النوم
جلس جنبها وحط يدها على كتفها....
ناصر: لا ماتأخرتي ناسيه ان امس سهرانين سوا
ابتسمت بخجل وقامت لعند المرايه..ماتركها راح وقف جنبها....
ناصر: تدرين خلود
خلود: شنو
ناصر: اني اموووت فيك
لفت له وهي تشابك اصابع يدها....
خلود: جد؟؟
ناصر: صدقيني ماابالغ لو قلت انك كل حياتي
سحب يدها وباسها...سحبت يدها برقه وهو انقهر منها..
ناصر: بسيطه وين بتروحين مني
خلود:هههههههههه
ناصر: اضحكي باوريك
خلود: ايش بتسوي؟
ناصر: يعتمد على حسب مزاجي
خلود: واهون عليك؟
ناصر: اخ منك هنا المشكله انك ماتهونين علي ...
دخلت سبحت ولبست بدله موديل هندي زرقاء مع قميص طويل مطرز وتحته بنطلون ...حطت لها مكياج بنفس اللون مع جلوس وردي...
ناصر وهو يطالعها من المرايه: وااااااااااو ايش هاالزين
ابتسمت وكملت مكياجها..ولما خلصت راحت جلست جنبه عاالكنبه...
ناصر: توني عرفت اني ماخذ قمر
خلود: تبالغ...
ناصر: لاليش ابالغ
خلود: تسلم لي...
ناصر: مو كأني اتغزل فيك من صباح الله وانتي كلمه وحده ماقلت له..
خلود: انت تدري اني احبك و..
ناصر : بس بس باموووت ماسمعت عيديها
خلود: احبك..
باسها على خده وضمها لصدره...
ناصر: وانا احبك اكثر حبيبتي..
رن بهاالوقت جوال خلود بعدت شوي عن ناصر ..واخذت جوالها
ناصر: من؟؟
خلود:هههه شوق
ناصر: اراهن انها تشوفنا..
خلود: هههههههه الووو
شوق ليش تضحكين اعترفي ايش قال لك
خلود: حرام ماقال شئ
شوق: خوخه وحشتيني ارجعي البيت
خلود وهي تكلم ناصر: ناصر شوق تقول ارجع البيت
سحب الجوال من يدها ..
ناصر: سكري يلا باي
شوق: صبر صبر نصوور احم اقصد ناصر
ناصر: حد يتصل بهاالوقت يالدبه
شوق: جوال اختي كيفي
ناصر بنفس صوت شوق: جوال زوجتي كيفي
شوق: هههه اقول عنتر اعطيني اختي يلا
ناصر: مافيه اغار
شوق: تكفى ناااصر جيبها تنام معانا الليله
ناصر: شنووو ليش مجنون مو صاحي
شوق: اووف بامووت والله لوحدي ملييت
ناصر: لاشوق شوفي انا عندي اقتراح احلى شرايك امرك واجيبك تنامين معانا باالفندق
شوق: الله صدق؟؟ احلى واحلى
ناصر: اقول قلبي وجهك باي
شوق: باعلم عليك اختك سارووه
ناصر: كملت انتي وسوير...يلا اخذي اختك
عطى خلود الجوال وقام يسبح..
خلود: شوق اخبار امي وابوي؟
شوق: بخير مابتمرين البيت؟
خلود: الا بنجي انا وناصر نتغدى معاكم
شوق: خلاص حلووو انتظرك مو تتأخرين
خلود: اكيد يلا سلمي عليهم
شوق: الله يسلمك باي
خلود: باي...
وبعد ماطلع ناصر راحوا اول شئ بيت ابو ناصر وبعدها بيت ابومحمد....
.................
ربطت شعرهاو فتحت باب الحمام وينه ماهر ..انزل اشوفه...نزلت ومالقت الا ابوماهر باالصاله...
حور: عمي وين ماهر؟
ابوماهر: طلع الحديقه شوي
حور: ريناد وبشار وينهم ماصحوا؟
ابوماهر: لاوالله اكيد بينامون للظهر
حور: لا مايصير الدراسه قربت ولازم ينتظم نومهم...
ابتسم لها ونزل راسه حست انه تذكر شئ راحت جلست جنبه..
حور: ممكن اعرف ايش تذكرت؟
ابوماهر: ام ماهر الله يرجمها...الحمدلله اللي عوضني فيكم وانتي ياحور يابنتي لولاك مادري كيف بيصير البيت
حبت عمها على راسه...
حور: ماابي اسمع هاالكلام ياعمي انا لولاكم ولاشئ وريناد وبشار مثل اخواني واعز واحبهم اكثر مما تتصور
ابوماهر: الله يخليك لهم يابتيتي
حور: هذا الواجب ياعمي
ابتسمت لعمها وراحت المطبخ 10 دقايق وطلعت لقت ماهر باالصاله جالس جنب ابوه وبشار منسدح عاالكنبه والنوم بعيونه...
حور: براافو صحيت بشار زين وفرت علي التعب
بشار: ليش زوجك هاالدب يخلي حد ينام براحته
حور: ههههههههه زين يسوي فيك....صح النوم ماهر
ماهر: صح بدنك قلبي حطي الفطور
حور: فطور في الظهر
ماهر: جوعاااان
حور: طيب اصبر ساعتين واتغدى ..ليه ماصحيت ريناد
ماهر: ذي عاد اللي ماقدرت عليها
ابوماهر: مو هينه طالعه على ابوها
ماهر: في هذي صادق
ابوماهر: الا اقول ماهر مو كأنك مصختها شوي
ماهر: ليش يبه عاااد؟
ابوماهر: متى ناوي ترجع للشغل في الشركه هلكنا انا وعمك
ماهر: طيب يبه مو انت مشغل موزن ومحمد معاك وينهم؟
ابوماهر: محمد مايقصر ومازن والله يتعب معانا وانا احسبه مثلكم انت وبشار
ماهر : خلاص يبه انت تامر امر السبت بداوم وياك
بشار: وانا ليش مااداوم وياكم
ابوماهر: ياليت يابشار تجي وتداري حلالك
بشار: حلوو خلاص احسبوني من اليوم وياكم
ماهر:لاتكفى يبه كل شئ ولاذا ماحد بيضيع حلالنا غيره
حور: لاماهر خلوه وياكم يتعلم من الحين عاالشغل
ماهر: لا مافيه انا مو موافق
ابوماهر: ماهر وانا وين رحت؟ رأي مو مهم
ماهر : العفو ياالغالي بس انا كنت اقترح وبشار لسه عوده لين والشغل يبي له صلابه
ابوماهر: لابكره يصطلب ويطلع اكبر تاجر
بشار: احم طبعا وبشتغل في الاسهم بعد واصير واااو بزنس مان
ماهر: الله يعيننا عليك وعلى تفكيرك الاقرد
...........
حست بأنزعاج من النور فتحت عينها وطاحت عاالساعه..1 ونص الظهر اوووف مانمت شئ قامت سكرت الباب وطفت النور ورمت نفسها بتعب عاالسرير توها تغمض عينها الا جوالها يرن...يالله شنو مابنام اليوووم يعني..رفعته بدون ماتفتح عينها
ريناد: الووو
مازن: الووين
فتحت عينها واعتدلت في جلستها وطالعت الشاشه..حتى تتأكد
مازن: الووووو
ريناد: هلا احمد....هلا
مازن: شفيك تخرعتي من سمعتي صوتي
ريناد:هههه لا شدعوه بس ماتوقعت مفاجأه
مازن: عسى بس مفاجأه حلوه
ريناد:ــــــــــ
مازن: قلت شئ يستدعي الصمت
ريناد: لا
مازن: جاوبيني طيب
ريناد: امم ماراح اجاوب
مازن: طيب ليش؟
ريناد: امممم مزاج
مازن: افا يالجوهره الحين انا طلعت باالنسبه لك مزاج؟
ريناد: لاتفهمها بهاالطريقه
مازن: اوكي ايش كنتي تسووين؟
ريناد: نايمه
مازن: والله؟ سوري عاالازعاج كان قلتي حتى اسكر...
ريناد: لاتقول هاالكلام احمد
مازن: عاالعموم ارجعي نامي خلاص وبدق اتطمن عليك في الليل اذا ماكان عندك مانع طبعا
ريناد: اوكي
مازن: خلاص انتبهي لنفسك توصيني على شئ؟
ريناد:سلامتك
مازن: الله يسلمك ....اكيد ماتبين شئ ترى مايردك الا لسانك؟
ريناد: ماابي الا سلامتك
مازن: طيب عيوني مع السلامه
ريناد: الله يسلمك..
بعد ماسكر مازن باس الجوال وضمه لصدره..اااااه ياربي احس اني احبها ...ابي اسمع صوتها كل دقيقه كيييف باصبر لليل ..الله يعين
هي نفس الحاله ماطاعت عينها تغمض مره ثانيه..
اه يااحمد كيف بس قدرت تخليني انجذب لك واحبك بهاالطريقه اموت واعرف كيييييف حبيته ؟؟
قامت بحيويه ونزلت جلست مع اخوتها وابوها...
.................
الساعه 4 العصر وبعد ماتغدوا في بيت ابومحمد رجعوا الفندق...
دخلت خلود ورمت الشنطه عاالكرسي وجلست..راح وجلس جنبها....
ناصر: تغديتي زين؟
خلود: الحمدلله
ناصر: بصراحه طبخ خالتي ام محمد لايعلى عليه
خلود: أي والله
ناصر: بس محمد ياخلود مادري شفيه اليوم فيه شئ
خلود وهي تقوم: لا
ناصر: حبيبتي شفيك؟
خلود: ولاشئ
ناصر: تخبين علي يعني
خلود: مافيني شئ
قام ومسك يدها وباسها...
ناصر: احلى خوخه باالعالم شفيها....
نزلت راسها بدون ماتقول أي شئ...
ناصر: قولي حبيبتي
خلود: امك ياناصر ليش ماتحبني
استغرب من جملتها ....ياربي حست على امي...ااه ايش اسوي لها حتى اخليها تحب خلود ..
ناصر: حبيبتي خلود اسمعيني هي تحبك بس ماتحب تظهر لك مشاعرها
خلود: بس انا احسها ماتحبني ابدا
ناصر: طيب حتى لو انتي بطيبتك وحنانك بتخلينها تحبك...
خلود: اوكي
ناصر: حاولي علشاني
خلود: اوكي علشانك ناصر
ناصر وهو يحضنها : الله يخليك لي حبيبتي..
..................
كان جالس يشاهد التلفزيون ومعاه اخته وامه...لف على شوق شافها تاكل مكسرات ومندمجه في الفلم..
محمد: شوووق
شوق وهي اخر اندماج: امممممممم
محمد: شوووقووه
شوق: هااااااااا اسمعك خير
محمد: تعالي فوق ابيك شوي
شوق: بعد مايخلص الفلم
محمد: لا الحين ابيك ضروري ضرووري
شوق: اصبر الحين بينتهي
محمد بعصبيه: اقولك الحين ماتفهمين
ام محمد: شفيك محمد معصب هدي حالك...شوق قومي شوفي اخوك ايش يبي
حطت علبه المكسرات وقامت وهي تتحرطم....
شوق: شرف محمد افندي قدامي
دخل غرفته وهي وراه جلست على طرف السرير وهو رايح جاي مقابلها...
شوق: تكلم شفيك؟
محمد: امممممممم حبيت اسألك عن شئ
شوق: اللي هو؟؟
حمل البرواز اللي فيه صورته ....
محمد: امممممم
شوق: تكلم لاتستحي مني هههههه
محمد: اوكي بسألك عن سماح
شوق: سماح؟؟؟؟؟ توقعت والله
محمد: اخبارها شفتيها امس؟
شوق : شفتها وسلمت علي
محمد: واخبارها مرتاحه حسيتيها ؟
شوق: تبي الصراحه لا و امممممم سألت عنك
محمد: لاااااااااااااا تمزحين جد؟؟؟
شوق: بسم الله شوي شوي علي أي قلت لها يسلم عليك
محمد وهو يحضنها: كفوو والله اختي اااه متى تتطلق واخذها
شوق وهي تحط يدها على جبينه: شفيك؟؟ مريض ؟؟ شنو تتطلق بعد انت صاحي
محمد: اكيد بيمل ويطلقها لانها ماتحبه
شوق: الله يهديك هذا كلام واحد عاقل فكر في نفسك ومستقبلك
محمد: اقووول توكلي اطلعي بره
شوق: صدق ماعندك ذوق
محمد: خليته لك ماابيه
شوق: باي
.........
دخلت سماح غرفتها شافت ابوعلي يقرأ في الجريده لما شافها تركها وارتسمت على وجهه ابتسامه...
ابوعلي: سماح
سماح: نعم؟؟
ابوعلي: تعالي ابيك شوي
سماح: شنو ؟؟
ابوعلي: انتي تعالي
طلعت زفره وراحت جلست مقابله ..
سماح: في شئ؟
ابوعلي: أي ابيك بموضوع
سماح: اللي هو؟
ابوعلي: انتي عارفه ظروف عملي تتطلب مني سفر للخارج
سماح: اوكي؟؟
ابوعلي: لهذا بسافر
حست بفرح دفين داخلها ....يعني برتاح فتره اااه واخيرا
سماح: وبتطول؟
ابوعلي: للاسف أي
سماح: كم؟
ابوعلي: 5 شهور
سماح: 5 شهور؟؟؟؟؟
ابوعلي: أي وان شاء الله السفر بعد 4 ايام باروح مصر ابيك تنتبهين لنفسك ولاتحتكين في ام علي مانبي مشاكل
سماح : اوكي لاتوصي حريص
قامت لعند المرايه وهي مبتسمه....فرحانه؟ أي ماانكر..بس 5 شهور كثير كيف بتحمل هاالنسره زوجته لوحدي؟؟لا لكن مو لوحدي معاي شهد ..طيوبه وحبوبه هاالبنت لولاها كان طفشت جد من هالبيت..
.............
الساعه 11 ونص كانت جالسه مع ابوها وماهر وحور باالصاله ...
ريناد: ههههههههه حلوه يبه قول غيرها
ابوماهر: ماعندي خلصوا النكت
حطت راسها على كتف ابوها...
ريناد: توني ادري انك خفيف دم يبه
ابوماهر: صدق ماعندك سالفه قومي بس عني
ريناد: ههههههه ماباقوم احبك
ماهر: حياله مادري على من طالعه
حور: على اخوها الكبير
طالعها ماهر بنص عين
ماهر: هااا ماسمعت
حور: من قال هاا سمع
ماهر: شين وقوي عين
حور ويدها على صدرها: انا شينننننننننننننننننه؟؟
ماهر: من قال
حور: انت
ماهر: ظالمه الحين من قال شينه الظاهر الحمل مأثر على سمعك
ريناد: هههههههههههه عندك اياها
حور: وانتي بعد وياه الله يسامحك
كانت ريناد تاركه جوالها باالغرفه ومازن يدق عليها بس مايحصل رد...بعد نص ساعه صعدت للغرفه وشافت 4 مكالمات...فرحت من الخاطر وطرشت له مسج (( احمد...اسفه كنت جالسه مع اهلي وتاركه الجوال بغرفتي...))
وصله المسج وهو جالس مع بشار ومجموعه من الشباب في القهوه...لما شاف المسج ابتسم..
بشار: اعترف من راسل لك مسج؟
مازن: مالك شغل
سحب بشار الجوال من يد مازن لكن تداركت يد مازن الموضوع واخذه باالقوه...
بشار وهو يغمز: هااا مزوون مخاوي من ورانا..
مازن: مالت عليك يمكن..
بشار وهو يرمي نفسه جنب مازن: احلف احلف احلف
مازن: هههههههه خبل قووووم
تركي (واحد من الشباب): شفيكم شباب ضحكونا وياكم
مازن: لابس تعرفون بشار وخفه دمه
تركي: زين مازن تعال العب ويانا ورق
مازن: انا اعذروني بطلع اكلم شوي بره هنا ازعاج
تركي: خذ راحتك
بشار: بعد بره؟؟؟باجي معاك اسمع صوتها
مازن: اوووف باكلم الاهل
بشار: بسيطه ان ماسمعته اليوم بسمعه بكره
مازن: هههههههه باي
طلع بره وجلس على سيارته ..ودق عليها..
ريناد: الو
مازن: اهلين
ريناد: هلا وغلا
مازن: شلونك؟
ريناد: تمام وانت؟
مازن: بخير
مرت عليهم دقايق الصمت فيها كان ثقيل...
مازن: شفيك ساكته؟
ريناد: ولاشئ...وين انت؟
مازن: مع اصحابي باالقهوه...
ريناد: اها اوكي اجل رسلت بوقت مو مناسب
مازن: شدعوه جوهرتي...
سكتت ..وهي خلاص مستحييه..جوهرتي بعد؟؟ ليش يحرجني هالدب...
مازن: شفيها جوهرتي وين سرحت؟
ريناد بصوت منخفض: لا ولامكان
مازن : اها
سكتت وهي محتاره ايش اقول ياربي..ماابي اطول اخاف حد من اخواني يدخل علي ساعتها باروح في خبر كان...ويييلي
مازن: جوجو تكلمي ابي اسمع صوتك مشتاق لك
ريناد:ـــــــــ
مازن: اووه نسيت انك خجوله لكن مو مني من اللي ماخذه عقلي
ريناد: من؟؟
مازن: وحده ماتعرفيها
سكتت ريناد وهي تفكر ياشينك اذا صرت ثقل قول اسمي وخلاص
مازن: جوجو الووو
ريناد : لو سمحت اسمي جوهره مو جوجو
مازن: بدلعك كيفي
ريناد: لامو بكيفك دلع حبيبتك بس
هو مبسوط عاالاخر لانه حارق اعصابها ..
مازن ببرود: ليه معصبه؟
ريناد: لاابد سلامتك باي
مازن: وين بتروحين؟
ريناد: بنام
مازن: اوكي قبل ماتسكرين باقولك شئ...
ريناد: قول
مازن : ترى ماحد شاغل بالي غيرك لاتزعلين ياالغلا باي
سكرت بدون ماتقول شئ...اااه راحه وفرحه غريبه احسها لما اسمع صوته...احس كلماته..اسافر معاه لعالم ثاني......بس صدقوني احس بشعور يزلزلني ويحيرني.....الخــــــــوف من المستقبل
تتوقعون هل الاحداث والصدف بتصير لصالح ريناد ومازن؟؟
ولا شئ ممكن انه يخرب كل شئ بينهم؟؟
وايش ينتظرهم من مواقف ؟؟
كل هذا بتعرفونه في الجزء القادم
تحيـــــ1تــي