السلام عليكم ورحمة الله وبركاته اسعد الله ايامكم بكل خير .. بين فتره وفتره .. اضغط على ايقونه " اضافة موضوع " ولما اوصل الى نص الموضوع اتردد وامسحه .. كله خوف ان ما اكتبه لا يرقى الى ذائقتكم .. لكن اليوم قررت بما لا يدع مجالاً للشك اني انزل الموضوع غصباً عن نفسي .. ورغماً عن انفي .. وترا بجلدك واتوطى ببطنك <======@ خش جو يزاعق على عمره المهم .. قررت اني افصل الريوس واكتب وانا ما اطالع في الموضوع .. كوده يجي خفيف لذيذ بدون تكلف واصطناع نجي عاد للموضوع صليت العشاء قبل شوي ورجعت للبيت .. دخلت البيت وعلى طول لـ الصاله .. مدرعم امشي طبلوووني .. الا والوالده والخدامات وجدتي كلهم يركضون وراي " تخيلت اني قاطع اشاره والدوريات وراي " ويالله يالله مسكوني وكتفوني واخذ تهزيئ .. انت ما تعرف اتنحنح .. احم احم .. يا ولد .. قل اي شي اثاري عندنا ضيوف ..، بعد حب خشوم قررت اطلع للحوش وادخل مع الباب الثاني وانا اجر اذيال الهزيمه .. مريت من جنب اخوي الصغير اهو وعيال عمي وبنات عمي .. اكبر واحد فيهم ابو 8 سنوات حصلتهم يلعبون " فتاحية ورده " ما ادري اسمها كذا والا احنا نسميها كذا <<===@ : ما كان يلعبها ابد ايام اول : والله يا اخوي هذا خروووووف كبير مع انه توه نونو عمره 4 سنوات مدري اقل .. ما ادري طالع على من .. ما يدري ان اخوه جرح اذا مرت من قدامه خدامه قلب وجهه احمر خجلاً واستحياء باقي قصة اخوي مشفره دخلت غرفتي وانا اتذكر ايام اول .. ايام ما كنا نروح لـ الديره .. ونلعب الالعاب القديمه .. اللي لها طعم .. قصماً بغيت ابكي الا 5 سم مكعب .. # اتوقع عرفتوا هدف الموضوع .. في موضوعي هذا احاول ان اخلق جو مليئ بـ المرح .. بعيداً عن مواضيع لميس وطقتها # الالعاب الشعبيه : تنفرد كل ثقافة و مجتمع بمجموعة من الألعاب الضاربة في الزمن والعريقة التي تناقلتها الشعوب ،و الأجيال و هذه الألعاب يطلق عليها اسم الألعاب الشعبية و عبر هذه الألعاب تنقل عدّة خصائص ثقافية و حضارية مراعية بذلك التقاليد و العادات , فالألعاب الشعبيّة مرآة صادقة للحياة اليوميّة البسيطة فمن خلالها يتم نقل نماذج الحياة في البيئة بطابعها و تقاليدها و نظامها. فمن خلالها انتقالها عبر الأجيال يتم نقل النماذج الحضاريّة و الأنماط المعيشيّة. فلكل مجتمع و حضارة خصائصها و طابعها التي تنعكس من خلال ألعاب الأطفال.</B> بعض الالعاب القديمه : قديمه من ناحيتي انا.. كنت العبها لما كنت صغير الكيرم او لعبة الشيوخ مثل ما كانوا يسمونها ايام قبل هذي بعض الصور لها ويليها شرح لـ طريقة لعبها . طريقة اللعب : لوح خشبي مربع الشكل يتكون من اربع ثقوب .. وله 4 انواع من الحبوب " مثل ما يسمونها " وهي اللي باينه في الصوره .. ولها اربع الوان .. الاسود .. ويحسب بـ خمس نقاط . الاصفر او الخشبي .. 10 نقاط . الوردي .. 50 نقطه . اقصى عدد لـ الاعبين هو 4 اضخاص فقط .. والاخير يسمى " المضراب " وهو اللي تضربه بـ اصبعك وتوجهه لـ الحبوب .. اكثر الاعبين نقاط هو الفائز .. واذا الواحد جاء بيطرح الخمسين " الورديه " لازم يطرحها ثم يطرح بعدها اي لون اسود او اصفر .. واذا ما طرح شي .. يرجعها .. وعلى هـ الحال .. لعبة الكيرم قريبه نسبياً من لعبة الشطرنج .. وبحثت في الانترنت عن اصل الكيرم وحصلتها هنديه .. ثانياً طاق طاق طاقيه حيث ان عيال اول كانوا يلبسون طواقي 4 متر فوق روؤسهم وما لها هدف .. اخترعوا هـ اللعبه .. هذي اللعبه ما تحتاج الى ادوات او خرابيط اكثر ما كثر الله في هاك الوقت الطواقي .. ويالله يكونون دائره وينزلون رؤوسهم تحت للارض .. ويقوم واحد اهو اللي معاه الطاقيه .. ويدور عليهم وهو يشدوا بـ صوته العذب .. وكانه بلبلاً فوق اغصان الشجر .. ويردد : طاق طاق طاقيه .. رن رن يا جرس .. محمد راكب ع الفرس .. <<====@ شفتوا اني مشهور قبل لا انولد بعد بعد ما يوقف من التغريد يرمي الطاقيه خلف احد الجالسين .. ويرفعون رؤوسهم اللي يلعبون ويدورون الطاقيه .. اللي يحصلها خلفه يقوم ويطرد المنشد اذا لمسه قبل ما يجلس المنشد في مكان صاحب الطاقيه .. يكون المنشد فايز .. اما اذا لمسه فـ يكون المنشد اهو الخاسر .. ويالله على هـ المنوال الين يفقعون وجيه بعض من الحماس @ " في فتره .. انتشرت في الانترنت مواضيع غير معروفه المصدر .. بـ ان فلان حرمها .. لو كانت محرمه لما كانت من ضمن النشاطات المصاحبه لـ الجنادريه .. وكلنا يعلم ان الحرس الوطني لديه جهاز الارشاد والتوجيه .. فيه مشائخ لو كان الموضوع كما انتشر لما سكت عنه .. " ثالثاً : المصاقيل .. البلورات .. البلي.. اختلفت مسمياتها في كل بلد ولكن بقي لها طريق واحدة في اللعب هي (التهديف) لعبة شعبية بسيطة خاصة بالأولاد تعتمد على مهارة يد اللاعب في رمي الكرات الزجاجية الصغيرة لتضرب بعضها البعض وهي أشبه نوعاً ما في كيفية لعبها باللعبة البليادو الآن ولكن بدون استخدام العصا ويستعاض عن طاولة بحفرة صغيرة على الأرض معدة لذلك الغرض. طريقة اللعب يختار الأولاد الراغبين في المشاركة في اللعبة باتفاق على موقع المكان في الحارة الذي يتسع للمشاركين والمتفرجين ومن ثم القيام بعمل حفرة صغيرة في الأرض يتم حفرها باليد لا تتجاوز قبضة اليد وضيقة الفوهة وبعدها يتم تهيئة سطح الأرض وتنظيفه من الحصى والعوالق التي تعيق مرونة انزلاق المصقال وبعدها يحدد عدد المشتركين الذي يتراوح ما بين اثنين إلى خمسة وبعدها يبعد المشتركون عن الحفرة بحوالي مترين ويصطفون بالقرب من بعضهم البعض ويبدأ الأول بالتهديف ورمي المصقال بقوة قاصداً أن يقع في الحفرة إن وقع فله حق أن يواصل اللعبة بحيث يضع أصبعه السبابة والإبهام من يده اليسرى في وسط الحفرة ويمسك بيده اليمنى المصقال ومن ثم يقوم بالتهديف بمصاقيل المشاركين معه واحداً تلو الآخر إن نجح في ضربه فإنه يكسب وإن خسر فإنه يتوقف عن اللعب ليأتي زميله الآخر ويكمل اللعب وجميع مجريات اللعبة تتم وهم جالسون. واهم مصقال كان يسمى المصاقل الكويتي .. لونه ابيض .. وكان غالي على الواحد للاسف ما حصلت لها صوره في النت الحين بعض الالعاب اللي موب قديمه مره مره لعبة حيوان جماد .. كان كل واحد ياخذ ورقة وقلم .. ويقسم الورقه الى خمسه اقسام .. قسم حيوان .. جماد نبات .. انسان .. بلاد.. وبـ الدور .. يختار كل واحد حرف معين .. ويكتبون عنه .. مثلاً انا اخترت حرف الميم .. حيوان : ماعز . جماد : ملعقه . نبات : ملوخيه . انسان : محمد . بلاد : موزنبيق . اذا كملت الاقسام الخمسه اقول stop .. stop .. ويوقفون عن الكتابه .. وكل واحد يكتب درجاته .. لكل قسم درجه وفي الاخير يجمعون الدرجات .. ويبين الفايز خامساً : عسكري حرامي كنت دايماً انجلد .. تتكون اللعبه من اربع اوراق صغيره مكتوب في الاولى .. عسكري .. والثانيه .. حرامي .. والثالثه .. الفراش .. والرابعه .. الجلاد ع ما اظن والعدد المناسب لـ اللعب .. اربعه اشخاص .. تجمع الاوراق بعد ما يخفون الكتابه اللي عليها وتجرى مراسم القرعه اللي ياخذ ورقة الحرامي يجلدونه هنا اتوقف لـ تعبي ولي باك ان شاء الله بعد ما استريح .. انتظر تفاعلكم مع الموضوع كتبت دون مراجعه او تدقيق .. نعيش وقتنا .. بـ بساطتنا بدون تكلف .. اتمنى ان يكون عنواني دونه جرح يشكي # الموضوع انزلته في شبكة الزعيم .. واعيد انزاله هنا . زعيم + قناص