.
.
مدخـل :
نكتشـف مـر " الحقيقـه ".. بعـد مايفـوت الآوان !
قلت لـك لا تندفـع لـه , قلـت حبـي ( صـاينـه )
وينـه اللي صـان حبـك .؟ ما أشـوفه اليـوم بـان ؟
قلبـك اللي هـو قلبـك لا تحسبـنك ×-{ ضـامنـه .
اهلين وسهلين للأعضاء الشينين
< من أولهـا برى !
وانا افحط في منتدى من المنتديـات شفت موضوع يتكلم عن
" الوظايف "
بصراحه تستاهلون لا عمركم تلقون وظايف ابد < مدرعمـه تهاوش
أنتم يالعيال عجازين تبون كل شي يجيكم بارد مبرد ..
بالأول تدخلون " علمـي " وتجلسون فيها سنين وسنين !
واذا تخرجتوا النسبه ماتساعد ابد ولا في كلية التقنيه ! ..
وطبعا تكلمون فلان مني وفلان مناك
لين تدخلون بالواسطه وليت القسم يستاهل واسطه ,
ومن هنا يبدا ( مشوار الأحلام ) وانا بتخرج وانا بشتغل مدير في شركه
وببني بيت وبتزوج فلانه آل فلان ..
وكل هذي احلام مزيفه وخرابيط !
تجي الأختبارات الشهريـه وكل واحد درجته " ازفت " من الثاني
وكلن يقول ان شاء الله بعوض وتجي النتيجه ..
ناجح بمادتين من أصل ست مواد !
وليت هالمادتين متعلقه بالقسم اللي ماخذه !
وطبعا شعارهم بالحياه
(اذا غرزنا حفرنا حفرنا شوي لين نطلع)
ويجلس يحفر ست سنين ..
واذا تخرج بدرجه ازفت من الثانوي
يجلس في بيت أهله ويقول " مالقيت شغل " ولو أحلف أنه مامر
الا على الأشغال الحكوميه والأغلب مايدور الا في ( وزارة الداخليه )
ليش بس الشغل الحكومي هو اللي تدورون عليه ؟
عشانـه طول الوقت ماوراه شي بس يقرى جرايد وينام ؟
واخر الشهر يجيه الفين 3 الاف بارده مبرده ؟
ولا بعد لا قالوا له تـزوج قال يووه الزواج غلى والعقارات غلت وكل شي غالي !
ليـش من الأسـاس ماتدرس زي الناس والعالم وتاخذ لك نسبه صاحيه .؟
وتدخل قسـم مضمونـه أشغاله .. وتشتغلـك شغلـه كلن يتمنـاها ؟
ليش مايكون طموحكم أكبر من الأشغال الحكوميه !
بصراحه شي ينرررررفز
فـاصـل :
يـوهـ متـى أكبـر ..؟ 
.
.
" نجـي الحين للبنـات ومصالتهم "
يوم الأربعاء توجهنا نحنو انا وانا بنقاليه وبنات خالي وامهم ..
ومرت عمي لم الوشسمه .!
الله لا يوريكم يوم رحنا " للجنادريـه "
قلة أدب على مصاله على عربجه على ودك من يشوتهم من السعوديه ..
بقولكم مقتطفات من هوناك أحنا نمشي في أمان الله
وكـان فيه سيارة اسعاف طبعا اللي فيها رجال ,
انت اجلس على جنب ( الأسعاف ) وناظر قلة الأدب !
اللي تجي وهي طرحتها على كتفها ويوم مرت عند سيارة الأسعاف قامت تعدل شعرها ..!
وشله واقفين جنب الأسعاف وخذ سواليف أنت يالأخو ياهووه ياللي بالسياره !!
واللي لابسه لك بنطلون ضييييييييق ورافعه عبايتها عند خصرها ورابطه العبايه ..
والطرحه على كتفها
( ياشيخه ماله داعي افصخي العبايه وريحينا )
قلنا معليش " .... مراهقات " وشافوا عيال زيون مشيناها لهم ..
رحنا لم قسم المدينه اول ماتدخل من عند البوابه فيه كوشك حق عسل وماعسل ..
واللي يبيع فيه مطوع ومعه واحد شكله موب سعودي ,
هو مايدري يبيع والا ينصح هالبقـر (معليش لكن هذا اللي يصلح لكم ).
وكان يقول يالله اشتروا علبـه بـ 50 ريال وثنتين مجاناّ
جـت حرمـه مـاله داعي اشرح فاتشه وطرحتها على كتفها جايه عند المطوع !!
وتقوله عطني من ذي امـ 50
هو انصـدم مدري وش جاهـ ياعميري قام وكلم اللي موب سعودي يتفاهم معها
وهو وخر وابعد عنها ..
يعني لهدرجـه وصلت الوقـاحه وليتها تقول بنت تستعبط " حرمه ام عيااال " !
هذا كلـه كـوم وهالموقف كوم ثاني !
حرمـه راحت عند الأسعاف تقول ان بناتي ضايعين وشلون القاهم
مـرت وحده تسولف مع اللي جنبها وتقول
( جعـل عمـرها ماتلقاهـم )
خيير وين عايشين فيه يال... جعلتس انتي اللي تضيعين ولا تلقين اهلتس ابد ..!
ودك بس بسـاعه تصير فيها رجـل أمن
تقـش هال.... وتطيرهـم لأخر الدنيا ..
* تـرى هـذا أول مـوضوع أكتبـه يعني أستروا ماواجهتـوا 
مخـرج :
لا تعـذر بحتيـاجـك .. كلنـا نـاقص { حنـان .
كلنـا طفـل يتمنـى " أي شخـص " يحظنـه !
.
.