بركات الشمري 
ليل الهموم السرمديه بنا طال
......... والصبر ماأثمر ولابان ... تينه !
قم غن ّ ياشادي الأحاسيس موّال
......... لااهل القلوب المرهفات الحزينه !
كزّه دخيلك للخوي طيّب الفال
......... اللي بجفاف الوقت تندا يمينه !
هاك الصديق الوافي الشامخ العال
......... من بعد ربي جيت له / أستعينه !
رجّال لكن عن ثلاثين رجّال
......... لامد ّ مد ّ .. وشوف مدة يمينه
وادري لو إني قلت " تكفون ياعيال "
......... جاني يشيل الروح في راحتينه !
ياصاحبي جيتك وانا بشكي الحال
......... وبشكي عليك اشيا .. بعمري دفينه !
شتقول باللي لابغى الدمع ماسال
......... واللي يغني .. للمواني / حنينه !
ماعاد تسوى عيشة اليوم بريال !
.........ضاقت بعيني " ويل عيني " المدينه !
تعبت أنا احطب للصبر حزمة آمال
......... ومنّاك عمري يحطبنه .. اسنينه !!
قمت اكتم الضيقة وادور لها بال !
......... واكذب واقول لشين وقتي ! يازينه !
قالوا تصبّر والأماني لها جال !
......... طيّب صبرنا لكن الجال ... وينه !؟
ماقلت في هذا الزمن شي ! هو قال
......... إن الليالي ماتعرف السكينه !
ماكل كلمة داخل الصدر تنقال
......... بعض الحروف تموت ظيم وغبينه !
حتى الهنوف اللي لها القلب مدهال
......... غابت وانا للحين .. ناطر يدينه !
راحت وخلّت لي قصيدة وسلسال
......... وغصة ودمعه بالمحاجر .. سجينه !!
كنّا مع الأطفال ماكننا ... اطفال
......... نسكت وكل ٍ قام يشرح .. بعينه !
للحين طيفه في خيالي .. ولازال
......... للحين أحسّه بين قلبي ... وبينه !!
باصاحبي جيتك ولاعاد به حال
......... ضاقت بعيني " ويل عيني " المدينة !
بندر الرشود
أبطيت لكن ماعلى مثلك جدال
ياولد ( محسن ) طوّل الله سنينه
بالجود والطيبة .. وبجلال الأفعال
والمدّه اللي مثل طبعه سمينه
ياشاعرٍ ماطاح قدامه عقال
إلا على راسه لِقَطهْ ويمينه !
انت الذي لاقال .. قالو:- [ ترى قال ..
وان قال طال .. وكلنا عارفينه ] ..
مديّت لي صوتك .. وردّ الصدى طال
والحين جيت أعلّمك كان وينه
انا حبسته في ظلوعي ولازال !
أعتّقه .. وأشرب أساه وحنينه
صوتك ذبحني حط في حلقي أقفال
وأحكم حصاري بين صمتي وبينه !
تشكي علي الضيقة اللي بلا جال
وانا من أول قلت :- [ ماني سفينه ] !
ماني (سفينة عشق) .. ياشط الآمال
أنا ف بحر الضيق قصّة حزينه
تحكي بها الدنيا والأجيال ل أجيال !
وأكنّها بين الجروح الدفينه
وتشوف زولي لاوقف بين الأزوال
من طيبته .. تقدر كذا تستبينه
وأنا أتبسّم كلما شفت رجال
من طيب خِلق –الحمدلله- وطينه
مير انت تشبهني على كل الأحوال
وتدري .. تشابهنا غبنهم غبينه !
أخوي .. وأفخر فيك في كل موّال
ولاعلي من الحسد .. والرطينه
أنا علي إن شفت حاسدك يختال
آطا شِنِبِه .. وأحط صبعي بعينه
يعني توكّل وامش من عال .. ول عال
إلين تبني من طموحك .. مدينه
وجدال .. ما والله على مثلك جدال
وجنونك .. ادع الله يطوّل سنينه
.... يتبع