نرجع من جديد للشخص المعني أبو كذبة أولى
يقول أبوي خربت سيارته ويبغا قطع غيار لها ومو موجودة بحايل وقال لي ياولد ابغاك تروح للقصيم تجيب لي القطعة هذا الكلام الظهر ويقول ابيك تجي قبل صلاة العشاء عشان ما تسكر الورشة ويمديهم يركبون القطعة يقول أنا بصراحة ماودي أخيب ظن أبوي فيني لأنه أول مرة يوصيني بشيء ويفزعني بهالطريقة يقول مشيت الساعة وحدة ونصف الظهر يقول ما جت أربع إلا أنا بالقصيم وأمر التشليح وألقى القطعة يقول للحين الأمور زينة يقول يوم مسكت خط حايل قبل مايكون سريع وقفت عند محطة أعبي بانزين يوم جيت ابغا أحرك أحط القير بنمرة واحد ما يقبل مجيم باثنين نفس الحكاية بثالثة ابغا أقوم السيارة مارضى يلقم القير حاولت بالأربعة ما نفع تروس القير انفرطت
للمعلومية معه ددسن 86 يقول ذاك الوقت لا جوالات ولا شيء وش تسوي يافلان وش تسوي يقول قلت خليني أحاول بالريوس يقول ويلقم القير وتمشي على ورى قلت يافلان مالك إلا تمشي على ورى يقول أدوس بانزين وإذا حسيت تروس الريوس تبي تحترق فضيت القير يقول اللي اتعبني رقبتي لافها يقول ياولد وش تسوي وقفت وخذيت عصى العفريتة وخليتها ثابتة على البانزين وعصى ثانية على الكلتش ولقيت ظهري للدرقسون ويقول ادوس وأفضي
يقول الناس تمر من عندي وتصورني بكميراتها ويصفقون طبعاً يقصد كميرات عادية قبل الجوال يقول يوم وصلت التفتيش وقفوني وكلمني الملازم وقال أنت جريء وانتحاري تدري ماراح نخالفك الله يستر عليك بس توقع للخط
يقول دخل علي الليل وماشي وما أشوف اللي بالصطبات الخلفية يقول وقفت وخذيت الشمعات الأمامية للسيارة وحطيتها بالريوس ((( وين برنامج دلع سيارتك عنه )) يقول المهم لما بقى على حايل 3 كيلو ويجيم القير وتوقف السيارة يقول قمت أركض للصناعية لأنه مدخل حايل من جهت القصيم يدخلك على الصناعية يقول حتى وصلت الورشة وعطيتهم القطعة المهم يسولف هالسالفة والمغزى منها أنه ولد اصراره قوي واللي براسه يسويه
يتبع