هذا واحدن يبي ينصب علينا قبل سنتين سافر إمريكا مرافق مع مريض ومعه لغة يطقطق فيها يعني يقدر يخلص
نفسه المهم طاح بيديني وكفشته وما استحيت منه (( وسيع وجهه ما أحب اللي يتفشخرون )) المهم يقول أنا أتمشى هناك يقول دخلت مطعم وكانت اللي تقدم وجبة الغداء شقراء (( مدري وش يتوقع يلقاها يعني يبيها تكرونية )) المهم يقول فيه واحد يبيع أوراق اليانصيب بدولارين يقول أنا شريت منه ورقة يانصيب يقول يوم قمت
أحاسب على الاستقبال (( الرجال نصاب أصلن هم يجون لحدك ويعطونك الفاتورة وياخذون الحساب يحسبه بمحل القرموشي )) المهم يقول حاسبتها وتناظرلي تبي بقشيش يقول ماش مامعي شيء قلت لها شوفي أنا شريت ورقة اليانصيب هذي وإذا طلع لي نصيب فيها راح أتقاسمها معك (( أنا هنا فقعت من الضحك وعرفت السالفة كلها ))
المهم هذاك واصل بالسالفة يقول بعدها بثلاث أيام شفت البرانامج اللي يعرض الأرقام اللي فازت باليانصيب
يقول أنا يائس أفوز بالمسابقة لأنه يقول مافزت ببقالة هند بعلوك أفوز هناك (( خفيف دم بعد النصاب ))
المهم يقول عدوا العشرين رقم الفايزين يقول باقي خمسة إلا أنا يصير رقمي بالترتيب 21 يقول صرخت ما صدقت
يقول الجائزة طلعت 10 آلاف دولار مهي شي المهم يقول أول ماتذكرت اللي تشتغل بالمطعم ذيك الشقرى يقول جيتها
وقلت لها فزنا بالمسابقة وهذي خمس آلاف دولار لك يقول خمتني وصرخت ويقول من ذاك اليوم وهي تطلع معي كل ليلة نتمشى والبجح يقول للحين متواصل معها بالجوال
مالكم بالطويلة أنا واعدته من بكرى يجينا وقلت فيه فلم أمريكي يعجبك (( لأنه يحب الأفلام الإمريكية بشكل مو طبيعي )) جبت له فلم نيكولاس كنج والقصة نفس اللي قالها لنا وهالفلم شفته خمس مرات من حلاوته وقديم ونفس الأحداث بس هو مغيرها شوي المهم الرجال بجح قال يلعن أبو شكلهم سبحان الله نفس قصتي اللي صارت في إمريكا
أكيد ذيك البنت تعرف اللي كاتب السيناريوا وقايله له اللي صار بيننا وسووا الفلم والفلم له 12 سنة
ناس وسيعة وجهه
يتبع