بسم الله الرحمن الرحيم
/
/
في البدايه أحب أهنيكم بالعيد
كل عام وأنتـــــــــــــــــم بخير
وعساكم من ع ـــــــــــــواده..
حبيت أطرح لكم بعض المواضيع الخاصه بالعيد على هيئة سوالف نتناقش فيها بعيداَ عن الطابع الرسمي ..
السالفه الأولى..
(ناس فرحانه بالعيد وناس حزنانه)
الكل يعلم بأن العيد عباره عن مشاعر فرح تبثها النفس البشريه المسلمه
معبرة عن فرحتها بأن من الله عليها بصيام هذا الشهر الفضيل وقيامه..
(أسأل الله لي ولكم القبول والعتق من النيران والمسلمين أجمعين )
لكن..
بعض الأسر فرحتهم قد يعتريها شيء من الحزن لفقدان عزيز كان في الأعوام الماضيه معهم وهذا العيد عند بارئهم..
( أسأل الله العظيم أن يرحم أموات المسلمين وأن يلهم ذويهم الصبر والسلوان )..
أرجوا من جميع المتصفحين الدعاء لهم لأنهم الآن في أمس الحاجة لدعائنا بعد إنقطاع أعمالهم..
السالفه الثانيه..
(هذه أشياء تحسسني بالعيد)
أسمحوا لي ان أتكلم بالعاميه 
من أول يوم يعطلون فيه الناس والعالم شغاله بالشروخ.. ومن يوم يطلع العيدي في التلفزيون يعلن دخول شوال إلا ماتسمع إلا (زييييط طع) بس والله تبون الجد ما تخيلت نفسي في عيد بدون ما أسمع هالأصوات والله تحسسني بالعيد مرررره..
والشي الثاني الي يحسسني بالعيد هو (ومن العايدين .. ومن الفايزين .. إن شاء الله .. أحباب أحباب.. أحباب.. أخوان أخوان أخوان...إلخ) قبل سنتين كان التلفزيون السعودي مسوي حداد على ياسر عرفات وما جابوها والله ما حسيت بالعيد إلا ثالث يوم يوم سمعتها 
وش الشيء اللي يحسسك بالعيد بالنسبه لك؟
السالفه الثالثه..
(أشياء غريبه تصييير قولوا لي ليييييييييييييييه؟؟؟!!)
طبعاَ بما أني بنت طبعاَ راح أتكلم عن البنات والحريم ما شاء الله عليهمالأغلبيه يحبون الأسواق لدرجة مستحيل أنهم ما يرحون للسوق ليلة العيد
اللي أنا مستغربه منه إذا صار الشهر كامل تلقاهم يوم 30 يرحون للسوق 
طيب لو الشهر ناقص متى بيشترون هذه الأغراض ترى أنا أولهم بس ما أدري ليه
والشيء الثاني طبعاَ أغلب العوائل في يوم العيد الصبح يتعيدون على رز ومفاطيح وجريش وقرصان...إلخ من المأكولات الشعبيه اللي ما تصلح إلا تنوكل في الغداء أو العشاء بس فطور ورز
وعادي نأكل بس الي قاهرني خل يوم من الأيام الثانيه تأكل رز الساعه 9 أو 9 ونص ؟!! مستحييييييييييييييل لييييييييييه مدري؟؟
السالفه الرابعه..
(هل حاولت مره أن تكسب في العيد يعني تشغل مخك التجاري؟؟)
أنا جبت لكم ثلاث نماذج تجاريه..
الأول..
قبل كم سنه أول ما طاحوا في شماغ البسام اللي تكون كتابة ( شماغ البسام) مطرزه بالذهبي .. طبعاَ بما أنها موضه كانت غاليه شوي.. المهم ولد عمي صج أبوه إلا يبيها طبعاَ هو كان بالثانوي .. المهم عطاه أبوه فلوس وراح وشرى شماغ البسام اللي بدون تطريز العاديه ثمن راح لخياط حق حريم وقال له طرز لي على الكتابه بالذهبي وعطاه عشرين ريال مدري ثلاثين المهم طلعت تكاليفها أقل وراح وأخذ الفلوس الباقيه وشرى بها زيادة شروخ
الثاني..
ولد عمي الثاني راح وشرى من نوير اللي في أم الحمام كرتون شروخ كوكتيل ويوم جاء العيد راح وأخذ نصف الكرتون وراح يبيعها على البزران اللي أبوانهم ما شروا لهم يعني اني خطره المهم وراح يغريهم لين ما راحوا لأمهاتهم وصجوهم وعطوهم فلوس وراحوا وشروا منه طبعاَ البزران ما يعرفون أسعارها الصدقيه و ولد عمي هذا قام يدبل السعر اللي شاريه بخمسه يبيعه بعشره..
والله كسب طلع قيمة اللي صرفه وصارت الشروخ اللي خلاها له النصف الثاني من الكرتون ببلاش..
الثالث..
هذا أنا بس قولوا ما شاء الله أول تراي عبقريه
طبعاَ في ديرتنا كل يوم من أيام العيد العشاء على وحد من البنات هي الي تطلب وهي اللي تحوس وتطر أحد يجيب لها إذا ما كان المطعم يوصل يعني حاله .. والفلوس نصير قاطين من أول يوم من العيد قطيه واللي عليها الدور تروح وتأخذ من هالقطيه المجمعه..
المهم طبعاَ كل عيد على أربع بنات والعيد اللي بعده على أربع وهكذا.. طبعاَ والسكن حقنا في مزرعه يعني ألا يا موصلين المهم هذيك السنه كان الدور علي ثالث يوم من العيد وأول يوم تعشينا بـ500 ريال ترانا واجدين مررررررررره وثاني يوم مثل عاد أنا مرررررره ذكيه قلت عندي فكره روحت وأحد من البزران في سادس أبتدائي بعد البخاشيش طبعاَ روحته يجيب فول وفلافل وتميس وكرتون بيبسي وكرتون سفن أب طبعا هو كان يسوق لأن القرى عادي عندهم يسوق وهو في سادس.. المهم كلف العشاء مع البخاشيش حول 80 ريال وأنا مأخذه من القطه 500 ريال ورحت للبنات وفرشت السفره وحطيت المقسوم ..بعدين ناظرتهم قلت مو عاجبكم قالوا لا عادي بس فول ثقيل.. بس يلا ماعليه نغير.. المهم قالوا وين باقي الفلوس قلت مو أمس واللي قبله تعشيتوا بـ 500 قالوا ايه .. وكلتوا عشاء قالوا ايه .. وهذا اللي قدامكم مو عشاء قالوا ايه قلت أعتبروه انه بـ500 .. أنا قلتها وإلا ما قلتها الي شاده شعري واللي راكبه فوقي .. حاله مررررررررره .. المهم يوم جاء مثل بكره ما خلوني أتعشى معهم عقاب عشان أرجع الفلوس وأنا نو واي أحلموا وعشان ما أتفشل سويت نفسي كأن كبدي توجعني من الغداء
بس والله وش رايكم بالعباقره وخصوصاَ أنا
السالفه الخامسه..
(ذكريات في العيد )
صار لي في الأعياد مواااااااااااااااقف كثيره بس أبقول لكم موقفين صاروا لي وأنا في الإبتدائي..
الأول..
طبعاَ إنا عشانا نجلس بديرتنا كذا يوم نشتري كذا لبس للعيد وطبعاَ أكشخ لبس هو تبع ثاني يوم .. مره البنات سألوني وش بتلبسين بكره؟ وشلونه؟ تنوره وإلا بدله؟؟ وأنا على بالي قولوا أنتم أول ثمن أقول ؟ وبعد ما قالوا لي علمتهم .. ويوم جاء ثاني يوم إلا البس الي قالوا مهوب هو ؟!! ..وأنا رحمت نفسي مسويه فيها أمينه
الثاني..
مره كنا نلعب غميمه في المزرعه وكنت أنا الي ألحقهم وتعرفون يمديهم يتخبون بالراحه.. وأنا على بالي كل ما مسكت وحده حطيتها في المسجد .. (طبعاَ البيت في وسط المزرعه وبعد المزرعه مزرعة جيرانهم وبداخل مزرعتهم بيتهم وهكذا طريقة بيوتهم والمسجد صاير بين مزرعة عمي وبين مزرعة جيرانهم ) ورحت أنادي بالمايك حق المسجد لقيت فلانه لقيت فلانه وبعد برهات إلا والرجال طالعين من المجلس وأبوي معهم طبعاَ ما يحتاج أقول لكم وش صار طبعاَ الفشيله الرجال يزاعقون علي ويقولون لو أنك ولد بلعنا بس بنت
..
قفلــــــــــــــــــــــــــه..
إجعل هذا الع ــــــــــيد بداية للتسامح.. وتصفية الخلافات.. فلا نعلم هل نفقد أحد في العيد القادم أم نٌفقًد..
مروركم وأرائكم فيما ما طرحته من تسؤلات تهمني..
تحياتي