((شاعرها))
لا يطـوّل سكوتـك ولا يطـوّل سكـاتـي
تـرى الـدعـاوي بسيـطـه لا تكبّـرهـا
خلـك علـى خبـري وظنـي وهقـواتـي
خابرنـي الضيـق والضيقـات خابـرهـا
وسّـع لـي البـال يـا سيّـد طموحـاتـي
ولا تغيّـر النظـره اللـي كنـت تنظرهـا
تقول : حـب البشـر طـوّق مساراتـي ؟
ابـك انـت حبـك مساراتـي يسيّرهـا !!
ان غبـت عانـت عيونـي مـن معاناتـي
وذكـرك يصبّرنـي وطيـفـك يصبّـرهـا
لا يـا بعـد شهرتـي واعظـم نجاحـاتـي
وكل القصايد مـن ابسطهـا ليـا اشهرهـا
ولا يـا بعـد مـن يــدوّر لانكسـاراتـي
شعّار سبب وجـودي ضيـق خاطرهـا !!
انت اجمـل اللـي تسجـل فـي سجلاتـي
ان جيت : وين البشر ؟ وان رحت : مكثرها
يـا اوّل وآخـر قصيـدي وآروّع ابيـاتـي
محـدٍ يحـب القصايـد كثـر شاعرهـا !!
مـا فـاق حبـي لـك الا حبـي لـذاتـي
يعنـي احبـك محبّـه مــا اتصـوّرهـا
يا اصدق من النشـوه اللـي فـي بداياتـي
لا قلت لي كـم بيـت .. وقالـوا انشرهـا
واغلى من الدمعـه اللـي كـل صدماتـي
تطلـب يدييهـا !! واحجّرهـا ولا انثرهـا
وآحـن منـي علـيّ ان شفـت زلاّتــي
القـاك بررتهـا لـو صـعـب ابـررهـا
واطهـر حكايـة محبّـه فـي حكايـاتـي
مـن قبـل لا عيشهـا حسّيتـك اطهـرهـا
لا تلومنـي لا بديـت آخــاف وآحـاتـي
كـل حاجـةٍ غاليـه مـا ودّي اخسـرهـا
ولا تضـايـق لـيـا كـثّـرت جـيّـاتـي
ضيّعـت فيـك السنيـن وجيـت ادوّرهـا
تـعـال رتبـنـي ورتــب حسـابـاتـي
او تدري شلـون ؟! رتبنـي و بعثرهـا !!
مو مشكلـه لـو تصيـر اطـوّل مسافاتـي
المشكلـه لابـديـت احـسّـك اقصـرهـا
اكبـر عيوبـي : بديتـك مــن نهايـاتـي
واكبر عيوبك : لقيـت اوّلـك بآخرهـا !!
يـا مكتشـف عالمـي واقـدم حضاراتـي
حـرام كسـر الخواطـر بيـد جابرهـا ؟!
مـدام تقـدر علـى اللـي فـوق قدراتـي
لا تذخـر الفزعـه اللـي قلـت ذاخرهـا
رجعنـي لوقتـي او رجعـلـي اوقـاتـي
عاميـن تنطرنـي .. وعاميـن ناطـرهـا
وتقـبـل الــود والشـكـر وتحـيـاتـي
يـا ساكـن الـروح والـروح ومشاعرهـا
وروّق وركّـز وحـاول تفـهـم الآتــي:
فكـره تـأكـد قلـيـل الـلـي يفكـرهـا
لـو ان غيـري معـاك يسـوي سـواتـي
قلت : انت نعمه وهـو عاجـز يقدّرهـا !!
....
(طمني عليك!!
يا الغايب اللي غابت سنينـي معـاك
يا جعل ما جاني من الفرقـا يجيـك
استغفر الله !! جعل ماجانـي فـداك
حتى لو ان نهايتي .. على يدييـك!
مسامحك .. واللي بقوله في قفـاك
خيرك كثير .. ويرحـم الله والديـك
ماصار شي ابلا رضاي الا رضاك
اللي ماهو فيني وابيه القـاه فيـك!
كنت السما في عيني وعيني سمـاك
كانت حياتـي كلهـا منـك واليـك
كنت بيديني مير مدري مـن خـذاك
حسبي على تقصيري وحسبي عليك
علمتني.. وش الحياه مـن الهـلاك
في موادعك هذا وفي جيّتـك ذيـك
ياكيف ابلقى شخص يسواني سـواك
كل مانويت انهيك في شخص ابتديك!
أبـدى أقـارن مستـواه بمستـواك
واخاف لاتزعل وابيعـه واشتريـك
والمشكله : رغم محبتـك وغـلاك
واني رغم كل شيّ مشتـاق وابيـك
ما هوب من حقي يضايقنـي جفـاك
ولااعشقك ولاالمحك ولااحتريـك!!
لكن ما يخفانـي ولا اظـن يخفـاك
حقي عليك .. انّك تطمنّي عليـك!!
((...المساله ..)))
احضّـرك واتلـوا عليـك البسملـه
والفاتحـه والغاشـيـه والزلـزلـه
واعلّمـك وش الحديـث المنطقـي
من شان تعرف كل شـي ٍ تجهلـه
خدمه .. بقدمها بـلا شـرط وثمـن
يا صاحب آفـاق الخيـال الممحلـه
وماهيب من بـاب المـوّده والغـلا
لكّن من بـاب احتـواء البلبلـه !!
كنت احسب ان سود الليالي ربّتـك
واثرك على نفـس العلـوم الاولـه
موّسـوس وحالتـك حالـه مزريـه
الحلـم قدامـك وعاجـز تاصـلـه
على مدار العام مـن قـل الثقـه :
بينك وبين الشـك والريبـه صلـه
ذكائك المزعوم حاجـه مؤسفـه !!
تضحك علـى تفكيـرك وتستغفلـه
سويت نفسك فاهم الوضـع وذكـي
وكليتها يا بـو الشبـاب مفلفلـه !!
ما احد ٍ جبرك تضيع وسط المعمعه
وتستصعب الموقـف ولا تستسهلـه
القصد واضـح والمعانـي واضحـه
ليه اتمادى فـي الحكـي وتؤّلـه ؟
طويق ثابت والجبـل يبقـى جبـل
فلنعتبـر هــذا ســؤال وعلله ؟!
شفت ان مالك بالثقـه موطـأ قـدم
كـب الغـرور المفتعـل ولاّ اقتلـه
وان عوّدت نهـج وقناعـات وفكـر
الاجوبه ترضـي غـرور الاسألـه
المرجله لا صارت هايـط وشعـر
مـا عـاد ابيهـا لعنبوهـا مرجلـه
وان كانهـا مواقـف وقـول وفعـل
ماعندي الا : تـم وابشـر وازهلـه
خذ لك نصيحه كانت تسـام بجمـل
يا مسيلمه او بالاصح يا عبهلـه !!
لا عاد تخطب في شبـاب المجتمـع
ريّح .. وخل الدين والنصـح لهلـه
ولا عاد تشهد زور فارجـاء البلـد
وتبقى كذا مـن مرحلـه لا مرحلـه
حتى ابليس بيستحي من كذبتـك !!
من كبرها ما هيب من ضمن عملـه
واليا بغيـت الجـد سجّـل مايلـي
واستحملـه واستوعـبـه واتقبـلـه
ماهوب عيب انـك تغيّـر منهجـك
العيـب وانـواع الخطـا والمهزلـه
انـك تجـي كلـك وتستنقـد فئـه
على فعل وانت اول اللـي يفعلـه !!
راجـع حساباتـك وفكّـر واتعـض
واضرب على نفسك جميع الامثلـه
ان كان ما انت بكلهـا مثَـل مثَـل
مـاوالله اقـول الشعـر واسترسلـه
خلاصة الموضوع كله ( من - إلى )
بيت ٍ يوضح لك غموض المسألـه :
أنا .. لو اني مـا لعبـت بحسبتـك
ما كان يسبب لك قصيدي مشكله !!
