موقف ثاني حبيت أشارككم فيه...

مرة ودوني assignment مساعدة من القسم حقي لأحد الأقسام لأنه كان عندهم overload وزحمة شغل وبغوا احد يساعدهم...

كان already في واحد ووحدة واثنيناتهم خلقة مايدانون بعض وأنا بعدين عرفت إن الرجال هو السبب لأنهم بصراحة وقح بزيادة يعين مخازز حريم وماعنده ماعند جدتي مع إنه كبرها...

المهم مشى أول اسبوع كأحلى مايكون وكنت أخلص الشغل المطلوب مني وبس...

فجأة طلبوا مني كمساعدة فقط إن اخلص امور أخرى من أعذار مدارس وخرابيط...

وكعادتي شجيع السيما دقيت الصدر وقلت أنا لكم والشر ماينالكم وقلت لهم أكيد ليش لأ...

بديت أشتغل واخلص الأوراق أول بأول والمراجعين وايد مستانسين...

بعدها بيوم واحد بس، رجعت من فترة الغدا لقيت الأخ حاط لي كومة اوراق يقول لي هذولي جاوا وانت منتي موجودة وقلت لهم يستنونك إلين تجين من الغدا؟؟؟ طيب وانت يابوالشباب وش قاعد تسوي؟؟؟

ابد بس كنت استناك واجمعهم لك.... ياعيني...

سكت وقعدت أبي أخلص الورق إلا جات البنت وقلت لها الصراحة خذتني من يدي وودتني عند رئيسهم...

حلفني إني أقول الحق عن شغل الرجال وبصراحة مابغيت أتكلم بس قلت له بشرط ماتعلمه إني قلت هذي بس مجرد شهادة حق...

وقلت له انه متسيب في الشغل ويطلع بريكات ويروح ويجي... وقلت له ترى شوف أنا بنت وانتوا رجال بينكم وبين بعض تمشون أموركم ، مو بكرة تقول له وتسوونها علي... حلف ووعدني إنه مايقول له...

المهم رحت وقعدت وكملت الشغل وخلصت اللي لي واللي علي...

اليوم الثاني جايني ابو الشباب يقول : مسوية نفسك ذيبة ورايحة تشتكيني... قلت له: أنا ما اشتكيتك ولا سويت شي؟؟ إيش صاير... <<<<<<<< طبعا أنا ماجيه في بالي أن رئيسه ممكن يقول له وهو واعدني... بس طلع مو قد كلمته ....

المهم وتم لك علي وعلى أعدائي في الشغل معاي تقول حشى ذابحه أحد من أهله مع إن الكلام اللي قلته كله كان صدق وهو حتى معاملته مع المراجعين مثل وجهه...

المهم جيه ذاك اليوم وطلعت بريك ولا رجعت إلى وألاقي مكتبي معفوس ومقعد فيه واحد ثاني على كيفه وبراحته ماخذ المكان... انا ذيك الساعة شاطت معاي...

قلت له من اللي شال أغراضي وقعد هذا؟؟ قال بالفم المليان: أنا واللي تبين تسوينه سويه وعندك رئيسي روحي اشتكيني... وعطاني ظهره...

قلت له تعال كلمني؟؟ ولا الظاهر انك منت بكفو لاتكلم لا حريم ولارجال..<<<<<<<<<<<<<< بدت تعربج...

هههههههههههههههههههههههههههههه

واخذ التلفون وادق على رئيسه واقول له لا انت ولا موظفينك كفو ، على فكرة أنا هنا جاية والمنة عليكم كلكم، كان ممكن أرفض إني أجي لكني قلت معليش من الأهل وتمون (رئيس المعفن هذاك يعرف أهل أمي) المهم وهاتك يا كلام طالع ونازل مني على راسه ( بس والله بدون سب) ههههههههههههههههههههههههههههههههههه

بس كان كلامي قوي وفي الصميم يعني بينت له انهم قاعدين لعب في لعب ويمشون امور بعضهم بعض عشان مصالحهم مع بعض ولأنهم رجال مع بعض...

ناداني اجيه المكتب، ورحت له وقلت له نفس الكلام اللي في التلفون وأضفت التالي: <<<<<< لاحظتواللغة؟؟ هههههههههههههههه

أنا شهدت عندك شهادت حق لاني لا مع البنت ولامعاه لكن انا قلت اللي شفته بعيني تقوم تروح تقول له؟؟؟ حسبت إنك قد كلمتك لكن مع الإسف ....... وسكت... والصمت أقوى من الكلمات <<<<<<<<< أخيييييييييييييييييييييييييه علي وعلى لغتي العربية..ههههههههههههههههههههههههه

قعد يقول: يايما ترى هو تعبان ورجال كبير وعنده امراض في الكلى ومادري شنو... قلت له: مثل ماهو تعبان في غيره ملايين متحطمين لا تتعذر له بهالعذر... ثم أنت رئيسه ومو قادر تكلمه؟؟ على شنو اجل رئيس انت؟؟ يشيلونك أحسن... أنا شايفة انه شايب وكبر جدي وانا ترى كبر أحفاده، ومو أنا اللي بعلمه الأدب خله يتأدب وإذا كبير وتعبان حولوه على التقاعد المبكر للعاجزين مو تخلونه يقط بلاه على الأولي والتالي... لاتكلمني وتعيد وتزيد أنا عرفت الحين إن ولا واحد فيكم كفو يتكلم معاي... <<<<<<<<<<< والله بازة بعمرها الواثقة...

ههههههههههههههههههههههههههههههههههههههههههههه

واشتكيتهم عند رئيستي>>>>>>>>>> من جد ناوية شر...

المهم، الشي الوحيد اللي فقع مرارتي إنهم يوم رئيستي كلمتهم قالوا لها : قولي لها ترى أحنا مو زعلانين منها أبدا وهي بنتنا وهالخرابيط...

إلا شافوا العين الحمرا...

بس صج اكتشفت اني ارجل من أي رجال في هالبلد...

إلى اللقاء مع موقف ثالث...

وفي أمان الله... CC