. . - بداية- " بعض القلوب مغائر رعبٍ تدخلها مرّة و مرّة بفرح اكتشاف خباياها و تغادرها مذعوراً مشبعاً بمحلول رعبٍ مكون من ذرة أكسيد مكائد و ذرتي أكسيد دسائس " ربي يسعد أوقاتكم بكل خير أخباركم ؟ انشا الله طيبين ؟ السطور أدناه عبارة عن أفكار ، هواجيس ، تساؤلات أتمنى تشاركونا فيها .. لعلنا نفيد و نستفيد " بلا قيود " عمل مشترك أتمنى ينال الإعجاب .، BBP قبل ما أبدأ أحب أشكر " أختي و حبيبتي " ملتاعه على الملتاع اللي سولفنا و فكرنا في بعض ما سيأتيكم الآن " الله لا يحرمني منك يا بعدهم " ( الإعلانات السعودية ) تزدحم القنوات الفضائية بالإعلانات من قبل الشركات السعودية أكيد الكل مننا يشوفها يومياً .. لكن ماحد منكم لاحظ اللي لاحظته ؟! ليش كلها باللهجة الحجازية .. ليش مثلاً ما تكون بلهجة أهل القصيم و لا شقرا و و و سؤال من زمااان يتردد في بالي .. ليه طيب ؟!! يعني اللهجة الحجازية هي اللهجة السائدة بالسعودية مثلاً .. أو انها مفهومة أكثر من أي لهجة ثانيه أنا ما أطرح هالتساؤل تقليل من اللهجة الحجازية .. لا أبداً .. لكن هو مجرد تساؤل أحد فكر في هالشي مثلي . ( مالنا رب ) تناقشت أنا و وخيتي ملتاعه في مسألة اللي هي : ليش الشباب ما يعطون خواتهم وجه ؟! كل واحد لو طلبت منه اخته طلب .. قعد يتأفف و يتعذر و " مشغول بأروح لخوياي " و غيرها من الأعذار حنا ما نعمم .. لا بالعكس .. أصابع اليد الوحدة تختلف .. بس الغالبية كذا أنا أحياناً ما ألومهم .. بصراحة .. لأن فيه بنات ماينعطون وجه لاحد يقوم عليّ من البنات .. بس خلينا نكون واضحين يعني من يوديها مكان مره .. تغثه كل يوم .. و ان اعتذر مره جحدت كل اللي يسويه موضوع يطول النقاش فيه .. بس سؤال واضح للشباب : ليه تعاملونا كذا ؟! يعني لو أنا واحد من اخوياك بتعاملني مثل هالمعاملة ؟! ( أكيد تحبه و يحبها ) من دخولي لعالم النت لفترة ليست بطويلة .. شفت الشين و الزين و بعالم المنتديات .. شفت الكثير من الأشياء و من ضمنها شي يضحكني و يحزني بنفس الوقت اللي هو : بعض ناقصين العقول و أصحاب التوافه من الأمور يفكرون بطريقة سلبية .. بتقولون كيف ؟! مثلاً عضوه منزله موضوع و يرد عليها عضو بكلمة أنا اشوفها عادية .. " عزيزتي " و يحط أي فيس حلو .. و العكس طبعاً .. أو مثلاً يتعاونون بأشياء كثيرة تخدم المنتدى مواضيع و زي كذا .. يعني ثنائي رائع .. يستحق التشجيع هذولي الفئة اللي ذكرتهم فوق .. " أصحاب العقول الناقصه " .. تتوقعون وش تكون ردة فعلهم ؟! أكيد بتكون أحد هالردود اللي بين القوسين أدناه .. (( يوووه أكيد بينهم قصة حب .. ايييه مايرد عليها دايم إلا بينهم شي .. شفت كيف رد عليها بهذاك الموضوع يحبها قايل لك )) لاتقولون وش هالتخلف ومادري وشو .. ومافيه أحد كذا .. إلا فيه و قابلت منهم كثير للأسف .. ليش طيب هالتفكير السلبي .. ليش تطلعون اشاعات مالها فايدة .. وش بتستفيدون .. اللي يهمكم المنتدى و المواضيع و محتوى المواضيع و رفعة مستواه ؟! و لا كاتبها و العلاقات بين الأعضاء ؟! خصوصاً اذا كانو مختلفين الجنس .. ليش يعني اي علاقة بين ذكر و انثى على طول حب .. خلاص أجل اذا صار تفكيرنا كذا أجل لا اشوف ولد راد على بنت و العكس .. عشان ما يحبون بعض .. / الأسئلة / وش رايكم بهالفئة ؟ و قد قابلتو مثل هالأشخاص ؟ و إذا سمعت اشاعة مثل هالنوع تنقال قدامك بتسكت و لا بتوضح له نقص عقله و عقم تفكيره ؟ و هل قد عانيت من مثل هالإشاعات ؟ ( التنجيم الحديث ) انتشرت الكثير من المجلات أشكال و ألوان .. فيها الكذب و الصدق من أكبر الأكاذيب اللي تروجها هالمجلات .. " الأبراج " الكثير من الناس مهووسين بشي اسمه أبراج .. يقعد الواحد يقرا برجه هالشهر أو هالأسبوع و يشوف حظه و صفاته و مزاجه و خرابيط كثيره .. و الحمد لله ما أعرفها أصلاً لما أجي لصفحة الأبراج أطمرها .. خرافات و كلام فاضي .. ناهيك على انه محرم شرعاً كما قال أحد العلماء : // جعل الله النجوم لتزين السماء الدنيا وتكون رجوما للشياطين قال تعالى : {ولقد زينا السماء الدنيا بمصابيح وجعلناها رجوما للشياطين } أما أن تتخذ النجوم والكواكب مادة لإشاعة الجهل في المجتمع وترويج الخزعبلات فهذا مما لا يرضاه الشرع ، فليس معقولا أن تتحد صفات ملايين البشر بل المليارات منهم في صفات معينة ، ثم بعد نرتب على هذا التصنيف أن فلانا يستطيع أن يتعاون مع فلان أو العكس فهذا من الأوهام. وهذه الأبراج هي نوع من الكهانة لما روى الإمام أحمد في المسند والحاكم بسند صحيح عن أبي هريرة أن رسول الله صلى الله عليه وسلم قال: من أتى عرافاً أو كاهناً فصدقه بما يقول فقد كفر بما أنزل على محمد. // معقولة فيه أحد يصدقها أو يؤمن بها .. و المضحك في هالموضوع كل مجلة تطلع أبراج من عندها و كلام من عندها و بعض هالمساكين يصدقون .. سؤالي هنا : هل تقرأ الأبراج ؟ و تؤمن بها ؟ و تحرص على قراءتها باستمرار ؟ على فكرة قررت أفتح مكتب أبراج .. و أول برج بأسميه برج المطر و الباقي فالطريق و اللي يبي يعرف معلومات عن برجه .. يدفع لي قبل الله لايهينه .. خلوني أتكسب من المساكين اللي يصدقون هالخرافات . ( قصة واحد من الجماعه ) فيه واحد الله يسلمكم اسمه " محمد " .. يحب بنت عمه و يموت فيها من يومه صغير كبر و كبر حبه معاه .. و البنت تدري بحبه لها .. بس عادي يعني .. مانتابها اي شعور محمد انسان أناني بمعنى الكلمة .. تدرون ليش ؟! " حاجر " على بنت عمه هاذي .. يعني مايتزوجها أحد غيره طبعاً هو حالياً غير مؤهل أبداً للزواج .. لكن هي تقدم لها 3 شباب مؤهلين لكن بسبب هالحجر ما توفقت المسيكينه فبدل ما يحببها في نفسه .. كرهها فيه .. صارت ماتطيقه أبد .. لو بيدها تذبحه ذبحته ياخي تحبها ماقلنا شي .. لكن جاها نصيبها لاترده .. يمكن ماتكون من نصيبك .. و الزواج مو بالغصب " قسمه و نصيب " طيب هي ماتحبك بالغصب هو .. و عقاباً له و ردعاً لأمثاله .. وقفه الأمير سلمان عند حده كيف ؟ أنا أقول لكم جا بيسافر مع والده المريض .. عشان يتعالج " الله يشفيه " لما ركب الطياره .. نادو على اسمه بصوووت عاااالي " محمد بن فلان الفلاني .. ممنوع من السفر " استغرب الولد .. كيف يمنعوني من السفر ؟! ارهابي أنا ؟! يوم نزل يستفسر عن الموضوع .. رد عليه المسؤول : الأمير سلمان يمنع أي أحد يحجر على بنت عمه ممنوع بتاتاً من السفر خارج المملكه .. أنا آسف . يعني هو حجر على بنت عمه من هنا .. و الأمير سلمان " فديت عمره " حجر عليه من هناك و اضطر الشاب المحرَج من هذه الحادثة الفظيعه " بصراحه فشله " أنه يتنازل عن هالحجر و يفك قيد بنت عمه و أخيراً .. ابتسمت الحياة لهالبنيه .. و جاها نصيبها و راحت .. أما محمد ماجاه إلا الفشيله - أخيراً - مرادنا الإفادة و نتمنى أنها تحققت لكن لديكم المزيد فلا تبخلو علينا بمشاركاتكم ..، نحن بالإنتظار . " لكم منا أعطر باقات اللافندر " BBP <<< للمعلومية : صاحب هذا اليوزر بنت .. فلا أحد يغلط الله يعافيكم . . .