السلام عليكم ورحمة الله وبركاته
اكتب هذا الموضوع بعد ان طفح بي الكيل وطفح بمساكين كثر غيري
ابكي ويبكي غير مليون عاطل او اكثر قدر الله علينا ودخلنا لغة عربية
قلنا يلا وظايف ومستقبل صدقنا كلام مدرسينا بالثانوية الوظايف مفتوحة
من هنا لعشر سنوات والاحتياج للغة العربية كبير
اوهمونا سامحهم الله بذلك ظننا بانهم قد صدقوا حينما قالوا ذلك
دخلنا الجامعه كما دخل غيرنا الكثير الجامعه قلنا يلا نبي نحصل
لنا وظيفة شي نبي نفك اهالينا من مصاريفنا دخلت جامعة الملك سعود
مصدق عمري اني بلقى وظيفه واصير مدرس في بلادي لكن نبطي عظم
خلصنا الجامعه قالوا لا مايقبلونك لازم تكون تربوي درسنا تربوي سنة كاملة
دفعنا لهم عشر الاف ريال وماقصروا الدكاترة معنا قطعوا فينا مسخرونا
قلوا ادبهم علينا وهذا وحنا ندرس بفلوسنا هذا الي يصارخ وينافخ علينا
يحسبنا بالابتدائية وهذا الي يدق فينا بكلام ماله داعي
تخرجنا من التربوي قلنا يلا ابواب الوظايف مفتوحة قدمنا قلنا يلا عسى خير
لكن قالوا لا مالكم وظايف ماتستاهلون توظفون خلونا ندور الدول الثانية
خلونا نركض ورى قطر والامارات والكويت كلها عشان نصير مدرسين
في بلاد كل سكان هالبلاد الثلاثة لو اجتمعوا ماصاروا ثلث سكان السعودية
لكن بلاد تحتاج ويطلبون لكن حنا محتاجين ولانطلب نجيب المصري والسوداني
والسوري والفلسطيني لان راتبه اقل نجيب كل غريب ونقول استلم وظيفة
مسكين سعودي مسكين يبي يتغرب عشان يتوظف مسكين يبي يروح
لديار غير دياره عشان يروح ياكل عيش عشان يعيش بكرامة عشان ياخذ
بالدول ذيك على الاقل (ثمان الاف) ريال وحنا (خمس الاف)ريال مايستاهلها
تعبنا وبكينا صحنا على خمس سنين ضاعت بين قلة ادب دكاترة وبين سراب كنا
نركض وراه سراب كنا نتمنى يكون حقيقة مشينا بهالطريق نبي وظايف
ياناس مادرسنا عشان نروح برى ديارنا مادرسنا عشان نبكي على حضنا
مادرسنا عشان بكرة نتغرب ونعيش غربة مادرسنا عشان نطلع برى ديرتنا
لحد يقول لي اهليه او مدارس اهليه من وين تبي تزوجك الاهليه
كم راتب المدارس الاهليه كم يعطونك كم يبون يخصمون عليك بالشهر
لو فرضنا يعطونك (ثلاث الاف)ريال طبعا انا من سكان الخرج كم ابي
استاجر لي شقة لحد يقول رح وتعال طريق الخرج الرياض يذبحك يالواحد
كم ابي القى الشقة الف الفين ريال صدقوني مايبقى من الراتب شي
ياناس نبي نتزوج من وين مانبي نصير عالة على احد مانبي احد يقول
ياخالد تعبنا منك مانبي احد يقول ياخالد رح شف لك اي شغلة مانبي نقول
لاحد تعال زوجنا تعال طالبينك نبي نتزوج كل الناس باعمارنا تزوجوا
وعندهم على ولد واثنين وحنا ماكلين وحل ماتزوجنا ولاشي لو عندنا
فلوس ووظيفة خطبنا من حبينا وخلصنا وابعدنا عن الناس لكن ماعندنا
بكينا وربي انمرضنا صارت فينا الامراض بسبتهم قولون غدة درقية
اكتئاب ضيقة صدر قلق انطوائية بكاء مستمر بسبب وبغير سبب
والله تعبنا والله بكينا والله انذبحنا ندمنا على اليوم الي دخلنا فيه تدريس
لكن للكل الكويت والامارات وقطر فاتحه ابوابها باي باي تعليمنا المحترم
عيشوا حالكم رواتب متسنعه صح في غلا لكن رواتبهم ترفع الراس
تعبنا وحنا نقول وظفونا اليوم نقلوها للوزارة لاتوظفونا ولاتفكرون فينا
اليوم نقول للوزارة جيبي الاجانب حطيهم فهم اولى برواتبنا منا
اليوم نقول للوزارة اغلقي الجامعات اغلقي الكليات مانبي منكم شي
اهلنا يبونا نتغرب حنا ياابناء اقوى دولة نفطية في العالم
اليوم نقول للوزارة ترانا طالعين وتاركين لكم التعليم تحكموا فيه بكيفكم
اليوم نقول للوزارة الف مبروك قد اهنتينا ووكلتينا تراب
اليوم نقول لاهلنا ترانا نبي نتغرب عادي اصبروا ماهي مشكلة
تدرون ليش يااهلنا اعلمكم ليش لان الوزارة الحبيبة
ماتبي تخسر من ورانا لان حنا ياعيال السعودية ماورانا الا خساير
اليوم نقول لاهلنا لاتبكون عادي نبي نتغرب نبي نطلع عنكم ومصير الكل يطلع
اليوم نقول لاهلنا لاتبكون علينا مثلنا مثل الهنود والبنقاليه وش فرقنا عنهم
هم يجوون وياخذون فلوس ويمشون وحنا نجي وندفع فلوس ونمشي
وش اقول اكثر من كذا غير كلمة وحدة
يازين دول الخليج رواتب ومدن راقية افضل منا
××××××××××
اسف اذا طلع مني شي غلط
23-08-2008, 01:15 AM
التعليم في السعودية<< نقاش جاد
العرض الشجري
