لو سمحتو بسرعة افتحو التلفزيون علشان تتابعون الموضوع
صــــــــــــــــــافرة البدايـــــــــــــــــــــــة تطلقها الحكمه ( عالي شموخي )
بداية الشوط الأول
أنا احب اتابع الكورة حييييل<<يقال بداية ودايم اذا تجمعنا ببيت اجدادي نتجه الى ملعبنا<<لايغركم الملعب هو الحوطه المحترمة وولد خالي راسمن حدود الملعب بخشبه<<ابوك ياالتطور نلعب مباريات مجنونة وطبعا حنا يالبنات نتقسم بين الفريقين<<اذكر لعبنا مرة فريق البنات وفريق العيال حارستنا اذا جته مرتدة انحاشت
وخلت الباب فاضي تقول اخاف واشين شي اذا جت الكورة حامية وضربت بوجهتس فجأة لا والأشين اذا كانت من رجل اخوتس مانساه ابد حسيت ان خشمي كبر
وزعلت وطلعت وياكثر ماكنت ازعل يسمونن الزعولة لا واذا كنت قاطة ريالين بصندوق التبرعات هديه للفريق الفايز
اروح واسترجع رياليني<<بعد بعد يزعلونن ولا أخذ رياليني شقا عمري واروح
اقعد عند خالاتي وانا ميتة لو ارجع لهم بس ماعندي مقدمات ارجع بهن مالي أمل إلا من بكرا <<يمدي الزعلان يرضى وكنا كل تجمع كذا مباريات الى الفجر<<يازين زمان اول قبل ماتدور علينا الدنيا
وتفرقنا وربي ماجاء ببالي نتفرق ماتت الغالية جدتي وماتت القلب الحنون عساهن بالجنة وربي اذكركن دايم وبقلبي دايم نهاية الشوط الأول
إستراحة مابين الشوطين: كنت ومازلت متابعة لقناة أناشيد إسلامية قصيمية << اعرفوه انتم قناة روعة ومسلية ويكفي انه دينية ودايم ارسل لشريط القناة وبنت خالتي ترسل بعد طبعا كل الي يرسلون سواء بنات او شباب يرسلون اشياء مفيدة ..اذكار..احاديث..تذكير...وكذا وطبعا الدوري عندنا قوي وكلن يتابعه بنات وعيال على حد سواء ويوم كنا بايام الدوري (الله يذكر ايامه بالخير) لازم يجي طاري الدوري بالشريط وخصوصا اذا كانت مباراة بين النصروالهلال عاد انا وبنت خالتي ما يحتاج انا نصراوية وهي هلالية وتبدا تفاجأن برسايل بالشريط كله ضحك طبعا والا احيانا تدق علي وتقول توجهي للصالة وافتحي القناة والله من الفضاوة المهم عاد يقلب الشريط نصر وهلال وطبعا بوه غارات من جدة اهلي واتحاد والله كل الكلام مؤدب ولابوه لا تجريح ولا غيبة ولاشي فجأة يرسل واحد رسالة حطمتن... ((أمحق مربيات أجيال بنات ويشجعن)) وهمن تقوم حملة كاملة علينا انتن بنات وش مشغلكن بالكورة
وربي رسايل كله تجريح من الشباب معترضين أننا نشجع
يبوننا بس بالمطبخ من صدزهم هم
يارب ما أخذ واحد بهالتفكير انا هنا انسحبت .................................ونوقف شوي هنا
انا تسآءلي: هل هو عيب البنت تشجع؟؟؟ انا اتبع سنة الرسول صلى الله عليه وسلم كان الرسول صلى الله عليه وسلم هو وعائشة رضي الله عنها يتابعون احباش يلعبون العابهم ولم ينكر على ام المؤمنين ذلك أو لم يمنعها من المتابعة ونص الحديث كالتالي: *- وقالت عائشة -رضي الله عنها - رأيت النبي صلى الله عليه وسلم يسترني وأنا أنظر إلى الحبشة وهم يلعبون في المسجد، فزجرهم عمر
- رضي الله عنه - فقال النبي صلى الله عليه وسلم " دعهم، أمنًا بني أرفِدة
" يعني من الأمن.
الراوي: عائشة - خلاصة الدرجة: [صحيح] - المحدث: البخاري -
المصدر: الجامع الصحيح - الصفحة أو الرقم: 3529.
وفي لفظ قالت: " لقد رأيت رسول الله صلى الله عليه وسلم يقوم علـى باب حِجرتي، - والحبشة يلعبون بِحِرابهم، في مسجد رسول الله صلى الله عليه وسلم
- يسترني بردائه، لكي أنظر إلى لعبهم، ثم يقوم من أجلي حتى أكونَ أنا الَّتي أنصرف ،
فاقدروا قدر الجارية الحديثة السن، الحريصة على اللهو " .
الراوي: عائشة - خلاصة الدرجة: صحيح - المحدث: مسلم -
المصدر: المسند الصحيح - الصفحة أو الرقم: 892
هذا والله أعلم....
يعني لو كان به ضرر لما سمح حبيبنا لأم المؤمنين عائشة رضي الله عنها بالنظر لهم لماذا في وقتنا هذا يسيطر علينا الجهل بالدين؟؟؟ لهالدرجة اصبحنا (أمحق مربيات أجيال والجريمة هي اننا نتابع كورة!!! أين هم من رسول الله؟؟؟ أين هم من (رفقاً بالقوارير)؟؟؟ أونعاب لمجرد متابعتنا لكرة؟؟؟
وش نشوف ؟؟ مغنيات؟؟ ما أبيهن لانه ببساطه حرام وش نشوف ؟؟ ممثلات؟؟ ما أبيهن المسلسلات في وقتنا ماهي إلا دعوة علنية للسفاح وهذا يؤدي للحرام
وش نشوف؟؟؟ تقولون البنات ما يتابعن الكورة إلا علشان الاعبين وانا أقول لا لا لا أنا نصراوية من قبل لاعرف أي لاعب ولو ابي الزين ما تابعت الدوري السعودي اخترت اي دوري اوروبي وتابعته والحمد لله لاعبيننا ساترين أنفسهم ولا أنا بيدي الريموت واغير يعني بسيطة
بداية الشوط الثاني طيب هالحين اجزم ان كل بيت مقسوم نصر وهلال و بيتنا كله نصر بس واحد من اخواني هلالي<<ماقدرت عليه احوله لنصر رغم كل العروض
الي عرضتهن عليه وهالحين استسلمت قبل كل ديربي اخذ احتياطاتي
(زمزية قهوة-حلاو توكس<<الشوط الاول,,,
شاهي- فصفص<<الشوط الثاني) اسكر الدرايش المحيطة والباب جيدا علشان الجيران مايسمعون صراخي ابعد الطاولات وافضل الجلوس على الارض<<اذكر يوم هدف الذابح على الهلال
دوري العام بالملز ضربت الطاولة وطرااااخ<<تلقيت تحذير شفوي من اختي
فصرت اتابع على الارض بنهائي كاس الامير فيصل الشوط الاول تابعته واقفه والثاني ادور
بالصالة وادعي (يارب النصر لنصر) واي هجمة انحاش لغرفتي واذا حسيت انة خلصت رجعت ومن الدقيقة ٩٠ وانا اعصابي ماتحمل اصرخ مع كل هجمة وخيو الصغير
يراكض وراي (ما عليتس كميل صد الكورة) إلما صفر الحكم هنا صرخنا كل الي بالصالة صغار كبار بنات شباب عاد
والي بتسى والي شال اصغر واحد يشوتوة فووق وكنبت اخوي العزيزة الي دايم ينقز عليه<<راسة يوصل لسقف بسم الله ماشاء الله عليه هو صغير بس طويل
واذا نقز توحفه وايامه ما كنت بالجامعه كنت نازلة تربية ميدانية
ويوم رحت للثانوية الي كنت أطبق به البنات يسألنن استاذة انتي وش تشجعين؟؟ هاه...ما اتابع كورة << اكبر نصابةاحس انهن كلهن هنا نهاية الشوط الثاني
هذه المباراة برعاية:
*بطاطس ليز الحار
*تايد مبيد الحشرات
*شركة زورو للسيارات
مقابلة مع الأعضاء بعد المباراة: * هل هو عيب البنت تشجع؟؟ * هل تؤيد مقولة (أمحق مربيات أجيال بنات ويشجعن)؟ *البنات أي موقف شبية أذكريه.... *الاولاد أتمنى تجاوبون بكل صدق..
كانت معكم في التعليق على مجريات المباراة
عالي شموخي
.... أحبك يانصر والله أحبك وأنوي على حبك أربي عيالي
التعديل الأخير تم بواسطة ( عالي شموخي ) ; 06-08-2008 الساعة 10:57 PM
06-08-2008, 10:54 PM
*O* البنــــــــــات وجنون التشجيع ^_^
لا والأشين اذا كانت من رجل اخوتس 
واروح 
<<ماقدرت عليه احوله لنصر رغم كل العروض 
العرض الشجري
